ބޮޑުފިނޮޅުގެ މައްސަލަ ހައްލުނުވެއްޖެނަމަ އެތަން އަތުލާނަން - މިނިސްޓަރު
މި މައްސަލައަށް އަވަސް ހައްލެއް ގެނައުމަށްޓަކައި ކޯޓުން ބޭރުން ހައްލެއް ގެނައުމުގެ މަޝްވަރާތައް ދަނީ ކުރެވެމުން
ޓުއަރިޒަމް މިނިސްޓަރު ޑރ. އަބްދުﷲ މައުސޫމް
ލ. ބޮޑުފިނޮޅާއި ތުނޑީ އަވަށުގެ ބޮޑު ސަރަޙައްދުގެ މައްސަލަ ހައްލުނުވެއްޖެނަމަ އެތަން އަތުލާނެކަމަށް ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރު މައުސޫމް މިހެން ވިދާޅުވީ ލ. ބޮޑުފިނޮޅާއި ތުނޑީ އަވަށުގެ ބޮޑު ސަރަޙައްދެއް 2008 ވަނަ އަހަރު އަމިއްލަ ފަރާތްތަކާ ޙަވާލުކޮށް, 13 އަހަރުވެގެންދިޔައިރު، މި މަސައްކަތުގެ ޢަމަލީ މަސައްކަތެއް ފަށާފައި ނުވާތީ، އެކަމާއި ގުޅިގެން ގަމު ދާއިރާގެ މެންބަރު މުހައްމަދު ވިސާމް ކުރެއްވި ސުވާލަށް ޖަވާބުދެއްވަމުންނެވެ.
މިނިސްޓަރު ވިދާޅުވީ މި މައްސަލައަކީ ހައްލެއް ހޯދަން ބޭނުންވާ މައްސަލައެއް ކަމަށެވެ. މިހާތަނަށް ލ. އަތޮޅުގެ މެންބަރުން އަދި ލ. އަތޮޅު ކައުންސިލް މެންބަރުން ވެސް، އެއް މައްސަލައެއްގައި އެންމެ ގިނައިން މަޝްވަރާކުރެވިފައިވާ މައްސަލައަކީ އެއީ ކަމަށެވެ. އެހެންނަމަވެސް އެކަމަށް ހައްލެއް ނުލިބި، އެކަމަށް ކުރެވުނު މަޝްވަރާގައި އަދި ދެކެވުނު ވާހަކައިގައި ގަމު ދާއިރާގެ މަޖިލިސް މެންބަރު އަދި ގަމު ކައުންސިލް މެންބަރުންނާއި އަތޮޅު ކައުންސިލް މެންބަރުންވެސް ގަބޫލެއް ނުކުރައްވާ މިހާރު ގަމުން ދޫކޮށްފައިވާ ބިންތަކާއި ބޮޑުފިނޮޅު އަދި ގަސްގަނޑު ފިނޮޅު ޕްރިމިއަރ އެކްޓްވިޓީ ޕްރައިވެޓް ލިމިޓެޑަށް ތަރައްގީކުރެވޭނެކަމަކަށް ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ދިވެހިރާއްޖޭގައި ފަތުރުވެރިކަން ކުރިއެރުވުމަށްޓަކައި، ބައިނަލްއަގުވާމީ ޔުނިވަރސިޓީ ނުވަތަ ކޮލެޖެއް ހުރުމަކީ ކޮންމެހެންވެސް ފަތުރުވެރިކަމުގެ ދާއިރާއަށް މީހުން ތަމްރީނުކުރުމަށް ބޭނުންވާ ކަމެއް ކަމަށެވެ. މިވަގުތު މަޑުޖެހިލާފައިވާ ލ. އަތޮޅުގެ އިތުރުން އެހެން ސަރަހައްދުތަކުގައި ވެސް ޓޫރިޒަމް ޓްރެއިނިންގ ޔުނިވަރސިޓީއެއް ނުވަތަ ކޮލެޖެއް ގާއިމްކުރުމާއި ބެހޭގޮތުން މަސައްކަތް ކުރަމުންކަމަށެވެ.
މިނިސްޓަރު ވިދާޅުވީ ކައްދޫ އެއަރޕޯޓް ފުރިހަމަ މާނައިގައި އިންޓަރނޭޝަނަލް އެއަރޕޯޓަކަށް ބަދަލުވެގެން އަންނަ އިރު، އެތަނަށް ބޭނުންވާ އެނދުތައް ތަރައްގީކުރުމަށް މި ރަށް އަދި ބިން ތަރައްގީކުރުން ވަރަށް މުހިންމު ކަމަށެވެ.
