ބާސެލޯނާ އަށް ކުޅެމުން އަންނަ މިޑްފީލްޑަރު ސާޖީ ރޮބާޓޯގެ އެއްބަސްވުން އައުކުރުމަށް އެ ކުލަބުން ނިންމައިފި އެވެ.

މީޑިއާ ރިޕޯޓުތައް ބުނާ ގޮތުގައި އުމުރުން 31 އަހަރުގެ ކުޅުންތެރިޔާގެ އެއްބަސްވުން އައުކުރުމަށް ބާސެލޯނާ އިން ބޭނުންވީ އިތުރު އެއް އަހަރު ދުވަހަށެވެ. ބާސެލޯނާގެ މެދުތެރޭގައި ގިނަ ދުވަސްތަކެއް ވަންދެން ކުޅެފައިވާ ރޮބާޓޯގެ އެއްބަސްވުން އެ ކުލަބުން އައުކުރާނީ އަންނަ އަހަރުގެ ޖޫން މަހުގެ ނިޔަލަށެވެ. އެގޮތުން މިހާރު ބާސެލޯނާ އިން އެއްބަސްވުމުގެ ހުރިހާ ކަމެއް ނިންމާފައިވާ ކަމަށާއި، އެއްބަސްވުމުގައި އޭނާ ވަރަށް އަވަހަށް ސޮއިކުރާނެ ކަމަށް ވެސް ރިޕޯޓުތައް ބުނެ އެވެ. މީގެ އިތުރުން ރޮބާޓޯ ބާސެލޯނާގައި މަޑުކުރުމަށް އެ ކުލަބުގެ ކޯޗު ޒަވީ ހެނާންޑޭޒް ވަރަށް ބޮޑަށް ބޭނުންވާ ކަމަށާއި، އެކަމުގެ މަޝްވަރާތައް ޒަވީ ކުލަބުގެ އިސްވެރިންނާ ކުރި ކަމަށް ވެސް ރިޕޯޓުތަކުގައިވެ އެވެ. ބާސެލޯނާއާއެކު ރޮބާޓޯ ހަދާފައިވާ އެއްބަސްވުމުގެ މުއްދަތު ހަމަވާން އޮތީ މި ސީޒަންގެ ނިޔަލަށެވެ.

ބާސެލޯނާ އިން ސީނިއާ ކެރިއަރު ފެށި ރޮބާޓޯ ވަނީ މިހާތަނަށް އެ ކުލަބަށް 334 މެޗު ކުޅެދީފަ އެވެ. މީގެ އިތުރުން އޭނާ ވަނީ ބާސެލޯނާ އަށް 14 ލަނޑު ޖަހައިދީފަ އެވެ. ރޮބާޓޯ ވަނީ ބާސެލޯނާއާއެކު 20 ތައްޓެއް ކާމިޔާބުކޮށްފަ އެވެ. އޭގެ ތެރޭގައި ހަ ސްޕެނިޝް ލީގާއި، ހަ ކޮޕަ ޑެލް ރޭ މުބާރާތާއި، ފަސް ސްޕެނިޝް ސުޕަ ކަޕާއި، ތިން ޔުއެފާ ޗެމްޕިއަންސް ލީގާއި، އެއް ޔުއެފާ ސުޕަ ކަޕް އަދި އެއް ފީފާ ކުލަބް ވޯލްޑް ކަޕް ހިމެނެ އެވެ. ރޮބާޓޯ ވަނީ 2016 އިން 2021 އަށް ސްޕެއިންގެ ޤައުމީ ޓީމަށް ވެސް ކުޅެފަ އެވެ. ޤައުމީ ޓީމަށް ކުޅެދިން 11 މެޗުން އޭނާ ވަނީ އެއް ލަނޑު ޖަހައިފަ އެވެ.