ސާންތި އެނބުރި އީގަލްސްގެ ކޯޗުކަމަށް
ސާންތި ސޮއިކުރީ ތިން އަހަރުގެ އެއްބަސްވުމެއްގައި
ސާންތި އީގަލްސް އެކެޑަމީގައި، ސީނިއަ ޓީމްގެ ކޯޗަކީ އޭނާ
ކްލަބް އީގަލްސްގެ އެންމެ ކާމިޔާބު ކޯޗު އިހުސާން އަބުދުލްޣަނީ (ސާންތި) އަލުން އެކްލަބްގެ ކޯޗުކަމާ ހަވާލުވެއްޖެއެވެ.
އީގަލްސްގައި ޓީމެއް ބިނާކޮށް އެކްލަބަށް ބޮޑަތި ކުރިއެރުންތަކެއް ހޯދައިދިން ކޯޗު މިދިޔަ ސީޒަންގައި ފެނުނީ ޔުނައިޓެޑް ވިކްޓްރީންނެވެ. މިސީޒަންގައި އަލުން އީގަލްސްއާ ހަވާލުވީ ތިން އަހަރުގެ އެއްބަސްވުމެއްގެ ދަށުންނެވެ. ސާންތި ޓީމްގެ ހެޑްކޯޗުކަމާ ރަސްމީކޮށް ހަވާލުވުމުގެ ކުރިން އޭނާގެ މަޝްވަރާގެ މަތީން އީގަލްސްއިން ވަނީ ޒުވާން ކުޅުންތެރިންތަކެއް ކްލަބަށް ގެންގޮސްފައެވެ. ސާންތި ފުރަތަމަ އީގަލްސްއާ ހަވާލުވީ 2011 ވަނަ އަހަރުއެވެ. 2017 ވަނަ އަހަރާ ހަމައަށް އީގަލްސްގައި މަސައްކަތްކުރިއެވެ. އީގަލްސް ދޫކޮށް ހަވާލުވީ އެފްއޭއެމްގެ ޓެކްނިކަލް ޑައިރެކްޓަރުގެ މަގާމާއެވެ. ޔުނައިޓެޑް ވިކްޓްރީގައި މަސައްކަތްކުރީ އޭގެ ފަހުންނެވެ. ޔޫވީގައި މަސައްކަތްކުރުމުގެ ކުރިން އޭދަފުށީގައިވެސް ކޯޗިންގ މަސައްކަތްކުރިއެވެ.
އީގަލްސްއާއެކު ސާންތި ހޯދި އެންމެ ބޮޑު ކާމިޔާބީއަކީ ޓީމެއް ބިނާކޮށް, އެޓީމާއެކު 2016 ވަނަ އަހަރު ޕްރެޒިޑެންޓްކަޕް ހޯދުމެވެ. މިދިޔަ ސީޒަންގައި އެންމެފަހުން އީގަލްސްގެ ކޯޗެއްގެ ގޮތުގައި މަސައްކަތްކުރީ މުޙައްމަދު އާތިފްއެވެ. އީގަލްސްއިން މިދިޔަ ސީޒަން ފެށީ ޕްރޯ ކޯޗު މުޙައްމަދު ޝާޒްލީއާއެކުއެވެ. ޝާޒްލީ ޓީމް ދޫކޮށްލުމުން ވަގުތީ ކޯޗެއްގެ ގޮތުގައި ނިމާދު މަސައްކަތްކުރިއެވެ. މާޒިޔާއަށްފަހު އައުސީޒަނަށް ތައްޔާރުވަމުން އަންނަނީ އީގަލްސްއެވެ.
