ގެދޮރުވެރިޔާ ސްކީމްގެ ދަށުން އިމާރާތްކުރަމުންދާ ހައުސިންގ ޔުނިޓުގެ ސާމްޕަލް އެޕާރޓްމަންޓް، ހައުސިންގ މިނިސްޓްރީގެ މުވައްޒަފުންނަށް ދައްކާލައިފި
11 ފެބުރުއަރީ 2023 | ހޮނިހިރު 16:41ގެދޮރުވެރިޔާ ޕްރޮޖެކްޓްގައި ހިމެނެނީ 17 ބުރިއާއި 18 ބުރީގެ ޓަވަރުތައް
ގެދޮރުވެރިޔާ ސްކީމްގެ ދަށުން އިމާރާތްކުރަމުންދާ ހައުސިންގ ޔުނިޓުގެ ސާމްޕަލް އެޕާރޓްމަންޓް ހައުސިންގ މިނިސްޓްރީގެ މުވައްޒަފުންނަށް ދައްކާލަނީ
ގެދޮރުވެރިޔާ ސްކީމްގެ ދަށުން ހުޅުމާލޭގައި އިމާރާތްކުރަމުންދާ 4000 ހައުސިންގ ޔުނިޓުގެ ސާމްޕަލް އެޕާރޓްމަންޓް, މިނިސްޓްރީ އޮފް ހައުސިންގ، ޕްލޭނިންގ އެންޑް އިންފްރާސްޓްރަކްޗަރގެ މުވައްޒަފުންނާއި މުވައްޒަފުންގެ އާއިލާތަކަށް ދައްކާލައިފިއެވެ.
މާލޭ ސަރަހައްދުގައި ދިރިއުޅޭ މީހުންނަށް ބޯހިޔާވަހިކަން ފޯރުކޮށްދިނުމަށް 'ގެދޮރުވެރިޔާ' ސްކީމްގެ ދަށުން ސަރުކާރުން ހުޅުމާލޭ ދެވަނަ ފިޔަވަހީގައި އިމާރާތްކުރާ ހުރިހާ ފްލެޓްތަކެއް 2024ށް ނިމޭނެކަމަށް ހައުސިންގ މިނިސްޓްރީން ވަނީ ބުނެފައެވެ. ފަހި ދިރިއުޅުން ކޯޕަރޭޝަން (އެފްޑީސީ)ން ގެދޮރުވެރިޔާ ސްކީމްގެ ދަށުން 4،000 ހައުސިން ޔުނިޓު އަޅާނެއެވެ.
ގެދޮރުވެރިޔާ ޕްރޮޖެކްޓްގައި ހިމެނެނީ 17 އަދި 18 ބުރީގެ ޓަވަރުތަކެވެ. ދެ ކޮޓަރީގެ 1200 ހައުސިން ޔުނިޓާއި ތިން ކޮޓަރީގެ 2800 ހައުސިން ޔުނިޓެވެ. ދެ ކޮޓަރީގެ އެޕާޓްމަންޓްތަކަކީ 650 އަކަފޫޓްގެ ޔުނިޓްތަކެވެ. ތިން ކޮޓަރިއަކީ 900 އަކަފޫޓުގެ އެޕާޓްމަންޓްތަކެވެ.
މި މަޝްރޫއުގެ ދަށުން 13 ޓަވަރެއްގެ މަސައްކަތް އެއްކޮށް ނިންމައި, އަންނަ އޮގަސްޓް މަހުގެ ތެރޭގައި އެ ތަނުގައި މީހުންނަށް ދިރިއުޅެވެން ފެށޭނެ ކަމަށް ފަހި ދިރިއުޅުން ކޯޕަރޭޝަނުން ވަނީ ބުނެފައެވެ. އެއީ 1,624 ފްލެޓެވެ. މީގެ ތެރެއިން 12 ވަނަ ޓަވަރުގެ ދެ އެޕާޓުމަންޓެއްގެ މަސައްކަތް މިހާރު އެއްކޮށް ނިންމައި އާންމުންނަށް ބަލައިލުމުގެ ފުރުސަތުވެސް ވަނީ ހުޅުވާލައިފައެވެ.
ގެދޮރުވެރިޔާ ސްކީމްގެ ދަށުން ދޫކުރާ 4،000 ފްލެޓަށް އެދި ކުރިމަތިލުމުގެ މުއްދަތު މިދިޔަ އޮކްޓޯބަރ ހަމަވިއިރު 20،000ށްވުރެ ގިނަ މީހުން ވަނީ ފޯމު ހުށަހަޅާފައެވެ.
