އަންނާނެ އަންނާނެ، ބްރިޖާއި ބޯހިޔާވަހިކަން ވެސް އަންނާނެ: އަސްލަމް
ވާހަކަ ނިންމަވާލެއްވީ "އަންނާނެ، އަންނާނެ" ކަމަށް ވިދާޅުވަމުން
ކުޑަގިރި ހުޅުވި ރަސްމިއްޔާތުގައި ހައުސިން މިނިސްޓަރު މުހައްމަދު އަސްލަމް ވާހަކަ ދައްކަވަނީ --
ބްރިޖާއި ބޯހިޔާވަހިކަމާއި ދަތުރުފަތުރު ވެސް އަދި އަންނާނެ ކަމަށް ހައުސިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެއެވެ.
"އަދި ބްރިޖް ވެސް އަންނާނެ، ބޯހިޔާވަހިކަން ވެސް އަންނާނެ، ދަތުރުފަތުރު ވެސް އަންނާނެ. މި ހުރިހާ އެއްޗެއް ވެސް އަންނާނެ،" އަސްލަމް ވިދާޅުވި އެވެ.
ކުޑަގިރި ޕިކްނިކް އައިލެންޑް ހުޅުވުމުގެ ރަސްމިއްޔާތުގައި މިއަދު އަސްލަމް ވިދާޅުވީ ރައީސް މާލޭ ރައްޔިތުންނަށް ވީ ވައުދު ފުއްދަވައިދެއްވައިފައިވާ ކަމަށެވެ. އަދި މި ސަރުކާރަށް ފަސް އަހަރު ވާން ދާއިރު، ކޮވިޑްގައި ގެއްލުނު ދުވަސްތައް ވެސް ލައިގެން ފެންނަނީ ރައްޔިތުންނަް ވީ ވައުދުތައް ފުއްދަމުންދާތަން ކަމަށެވެ. އަދި އެ ވައުދުތައް ފުއްދެވީ އެއްވެސް މީހަކު ބާކީނުކޮށް ކަމަށް ވިދާޅުވިއެވެ.
"އެ އަތޮޅެއް މި އަތޮޅެއް މާލެއެއް ރާއްޖެތެރެއެއް ތަފާތުކުރުމެއް ނެތި ވައުދުތައް ފުއްދަވަމުން ގެންދަވާ އިރު މިއީ މާލޭގެ ރައްޔިތުންނަށް ވީ އެއް ވައުދު، މި ވައުދު މި އޮތީ ފުދިފައި،" އަސްލަމް ވިދާޅުވިއެވެ.
މި ވައުދުގައި އިތުރަށް ފެހިކަމާއި ރީތިކަން އަންނާނެ ކަމަށާއި މީހުން ވެސް އަންނާނެކަމަށާއި މަޖާ ވެސް ކުރާނެކަމަށާއި ކައިވެނި ހަފްލާތައް ވެސް ހިނގާނެ ކަމަށް ވިދާޅުވިއެވެެ. އެ ހުރިހާ ކަމެއް ވެސް ހިނގާނެކަމަށާއި މި ލިބުނީ ގެއްލިފައި އޮތް ބޮޑު ކަމެއް ކަމަށް ވިދާޅުވި އެވެ.
