ކ. މާލެ
|
10 ފެބްރުއަރީ 2023 | ހުކުރު 12:46
ގަޟާޢީ އަހަރު 2023ގެ ހަފްލާގައި ރައީސް ވާހަކަފުޅުއްދަކަވަނީ
ގަޟާޢީ އަހަރު 2023ގެ ހަފްލާގައި ރައީސް ވާހަކަފުޅުއްދަކަވަނީ
ރައީސް އޮފީސް
ފަނޑިޔާރުގޭގެ ނިންމުންތައް
ފަނޑިޔާރުގޭގެ ނިންމުންތަކާމެދު ރައްޔިތުންގެ ހިތްތަކުގައި އަންނަނީ އިތުބާރު އުފެދެމުން - ރައީސް
 
އިންޓަރގްރޭޓެޑް ކޭސް މެނޭޖްމަންޓް ސިސްޓަމެއް އެކުލަވައިލުމުގެ މަސައްކަތްވެސް މިހާރު އެބަ ކުރިއަށްދޭ
 
ފަނޑިޔާރުގެއިން ކަން ކުރަންވީ ގޮތާއި ނުކުރަންވީ ގޮތް ބުނެދޭންޖެހޭ އެހެން ބަޔަކު ނުތިބޭނެ
 
ރަށްރަށުގައި ތިއްބަވާ ފަނޑިޔާރުންގެ ލިވިންގ އެލަވަންސްގެ މިންވަރުވެސް، ފަނޑިޔާރުންގެ އަސާސީ މުސާރައިގެ 35 އިންސައްތައަށްވުރެ ކުޑަނުވާނެ ގޮތަކަށް ހަމަޖެހިގެންދާނެ

ފަނޑިޔާރުގޭގެ ނިންމުންތަކާ މެދު ރައްޔިތުންގެ ހިތްތަކުގައި އަންނަނީ އިތުބާރު އުފެދެމުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ޤަޟާއީ އަހަރު 2023 ފެށުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސް ޞާލިހް ވިދާޅުވީ ފަނޑިޔާރުގޭގެ ޒިންމާއަކީ އެންމެހައި ފަރުދުންގެ މެދުގައި ޢަދުލު އިންޞާފު ޤާއިމުކޮށްދިނުން ކަމަށެވެ. އަނިޔާއިން އެއްކިބާވެ ޢަދުލަށް ނިޔާ ކަނޑައަޅައި، ރައްޔިތުންގެ ޙައްޤުތައް ހޯދައިދިނުން ކަމަށެވެ. އެ ޒިންމާ އަދާކުރެވޭނީ ޤާނޫނުގެ ވެރިކަން ދެމެހެއްޓުމަކީ، ފަނޑިޔާރުންގެ އެންމެ އިސް އަމާޒު ކަމުގައި ހަދައިގެން ކަމަށް ރައީސް ވިދާޅުވިއެވެ. އެ އަމާޒު ޙާޞިލުކުރެވޭނީ، ފަނޑިޔާރުންގެ ޙުކުމްތައް ބިނާކުރާ މަޞްދަރަކީ، އިސްލާމީ ޝަރީޢަތާއި، ދިވެހިރާއްޖޭގެ ޤާނޫނުއަސާސީއާއި ޤާނޫނުތައް ކަމަށް ހަދައިގެން ކަމަށް ރައީސް ވިދާޅުވިއެވެ.

އެ މިނިވަންކަމާއި ބާރު، ރާއްޖޭގެ ޤާނޫނުއަސާސީން އޮތީ ފަނޑިޔާރުގެއަށް ދީފައި. ޝަރުޢީ ދާއިރާ މިއަދު މަސައްކަތް ކުރަމުން އަންނަނީ ފުރިހަމަ މިނިވަންކަމާ އެކު، މުސްތަޤިއްލު ބާރެއްގެ ގޮތުގައި. ފަނޑިޔާރުގެއިން ކަން ކުރަންވީ ގޮތާއި ނުކުރަންވީ ގޮތް ބުނެދޭންޖެހޭ އެހެން ބަޔަކު ނުތިބޭނެ. ދިވެހިރާއްޖޭގެ ފަނޑިޔާރުގެއާ މެދު ރައްޔިތުންގެ ހިތްތަކުގައި ކުރިން އޮތް ނުރަނގަޅު ތަޞައްވުރު، މަޑުމަޑުން ރަނގަޅުވަމުން އަންނަކަމަށް މިހާރު އަޅުގަނޑަށް ދެންނެވިދާނެ. ފަނޑިޔާރުގޭގެ ނިންމުންތަކާ މެދު ރައްޔިތުންގެ ހިތްތަކުގައި އަންނަނީ އިތުބާރު އުފެދެމުން. އެ އިތުބާރު އުފެއްދުމަކީ، ސަރުކާރުގެ ސްޓްރެޓީޖިކް އެކްޝަން ޕްލޭންގެ ވަރަށް މުހިންމު އަމާޒެއް.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު

ރައީސް ވިދާޅުވީ ފަނޑިޔާރުގެއާ މެދު ރައްޔިތުންގެ ހިތްތަކުގައި އިތުބާރު އުފެދެނީ، ޢަދުލަށް ޙުކުމް ކުރުމުން ކަމަށެވެ. އަދި އެ ޙުކުމަކީ، ކަމުގެ މުއާލާތް ނުކެނޑެނީސް، ނުވަތަ ވަގުތު ފާއިތުވުމުގެ ކުރިން އިއްވާ ޙުކުމަކަށްވެސް ވާންޖެހޭނެ ކަމަށެވެ. މިއަދުވެސް ބައެއް ރައްޔިތުންގެ އެންމެ ބޮޑު ޝަކުވާއަކީ ކޯޓުތަކުން މައްސަލަތައް ލަސްވުން ކަމަށް ރައީސް ވިދާޅުވިއެވެ.

ޤާނޫނީ އޮނިގަނޑުގެ ތެރެއިން ކުރަންޖެހޭ ކަންކަން ވެސް އަޅުގަނޑުމެން މި އަންނަނީ ކުރައްވަމުން ކަމަށާއި، ކޯޓުތަކުގެ ޤާނޫނަށް މިހާރު ހުށަހަޅާފައިވާ އެއް އިޞްލާޙަކީ، ރާއްޖޭގެ އެކި ސަރަޙައްދުތަކުގައި ޑިސްޓްރިކްޓް ކޯޓުތަކެއް އުފެއްދުން ކަމަށެވެ. އެއީ މާލޭގައި ހުރި ސުޕީރިއަރ ކޯޓުތަކުގެ އިޚްތިޞާޞްގައި ހިމެނޭ މައްސަލަތައް ބެލުމަށް އުފައްދާ ކޯޓުތަކެއް ކަމަށެވެ. އެ ކޯޓުތައް އުފެދުމުން، ރަށްރަށުގައި ދިރިއުޅޭ މީހުން ޢަދުލު އިންޞާފަށް ވާޞިލްވުމަށް މިހާރު އުފުލަންޖެހޭ ބުރަ ވަރަށް ބޮޑަށް ކުޑަވެގެންދާނެ ކަމަށެވެ.

ދެން އަޅުގަނޑުމެން ގެންނަން ހުށަހަޅާފައިވާ އަނެއް ބަދަލަކީ، ރާއްޖޭގެ ޝަރުޢީ ދާއިރާއަށް މުޅިން އަލަށް ސަރކިޓް ކޯޓުގެ ނިޒާމު ތަޢާރަފްކުރުން. އެ ނިޒާމުގެ ސަބަބުން، މެޖިސްޓްރޭޓް ކޯޓުތަކަށް ހުށަހަޅާ މައްސަލަތައް، އަވަހަށް ނިންމުމަށް މަގު ފަހިވެގެންދާނެ. އޭގެ އިތުރުން، އިންޓަރގްރޭޓެޑް ކޭސް މެނޭޖްމަންޓް ސިސްޓަމެއް އެކުލަވައިލުމުގެ މަސައްކަތްވެސް މިހާރު އެބަ ކުރިއަށްދާ ކަމަށާއި، އިރާދަކުރެއްވިއްޔާ މި އަހަރުގެ ފަހުކޮޅު ކޯޓުތަކުގައި މި ސިސްޓަމް ބޭނުންކުރަން ފެށޭނެ ކަމަށެވެ.

ރާއްޖޭގެ ޢަދުލު އިންޞާފުގެ ދާއިރާއަށް މިދިޔަ އަހަރު މުހިންމު ބަދަލުތަކެއް އަތުވެއްޖެ. އުއްތަމަ ފަނޑިޔާރުވެސް އެކަން މިރޭ ފާހަގަކުރައްވައިފި. އޭގެ މަންފާވެސް ރައްޔިތުންނަށް އަންނަނީ ލިބެމުން. އެއް ކަމަކީ، މަދަނީ އިޖުރާއާތުގެ ޤާނޫނަށް މިދިޔަ އަހަރު ޢަމަލުކުރަން ފެށުން. 47 އަހަރަށްވުރެ ދިގު މުއްދަތަކަށް ފަހު، ހެއްކާބެހޭ މުޅިން އައު ޤާނޫނެއް އެކުލަވާލައި މިދިޔަ އަހަރު ތަޞްދީޤުކޮށް، މިދިޔަ މަހުން ފެށިގެން އަންނަނީ ޢަމަލުކުރަމުން.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު

ރައީސް ވިދާޅުވީ ޝަރުޢީ ދާއިރާ އަށް ބޭނުންވަނީ މި ބަދަލުތައް އެކަންޏެއް ނޫން ކަމަށެވެ. ކޯޓުތަކުގެ ޢުމްރާނީ ތަރައްޤީއަކީ ވެސް، ޢަދަލު އިންޞާފު ޤާއިމުކުރުމަށްޓަކައި ވަރަށް މުހިންމު ކަމެއް ކަމަށެވެ. މި ސަރުކާރު ފެށުނުއިރު ވެސް، ކޯޓުތަކުގެ ޖާގައިގެ ދަތިކަން ވަރަށް ބޮޑު ކަމަށާއި، ކޮވިޑުގެ ދަތިކަމުގެ ތެރޭގައިވެސް، އައު ކޯޓުތައް އިމާރާތް ކުރުމާއި، ކޯޓުތަކުގެ ޖާގަ އިތުރުކުރުމުގެ މަޝްރޫޢުތައް ފެށިފައިވާ ކަމަށެވެ.

ރައީސް ވިދާޅުވީ އެކި އަތޮޅުތަކުގެ ބައެއް ރަށްރަށުގައި ކޯޓު ޢިމާރާތް ކުރުމުގެ މަސައްކަތް، މި އަހަރުގެ ބަޖެޓުގައި އަލަށް ހިމަނާފައިވާނެ ކަމަށެވެ. ހައިކޯޓާއި، މާލޭގައި ހުރި ސުޕީރިއަރ ކޯޓުތަކަށް ދިމާވެފައިވާ ޖާގައިގެ މައްސަލަ ޙައްލުކުރުމަށް، ހުޅުމާލޭގައި ހަދާ ކޯޓު ކޮމްޕްލެކްސްގެ ޑީޓެއިލް ޑިޒައިންގެ މަސައްކަތް ނިންމައި، އިމާރާތް ކުރުމުގެ މަސައްކަތް ވަރަށް އަވަހަށް ބަޔަކާ ޙަވާލުކުރެވޭނެ ކަމަށެވެ. އައްޑޫގައި ހަދާ ކޯޓު ކޮމްޕްލެކްސްގެ މަސައްކަތްވެސް މިހާރު އޮތީ ބީލަން މަރުޙަލާ ނިމި، ބަޔަކާ ޙަވާލުކުރުމުގެ މަރުޙަލާގައި ކަމަށް ރައީސް ވިދާޅުވިއެވެ.

ކްރިމިނަލް ކޯޓަށް ކުރިމަތިވެފައިވާ އިމާރާތުގެ މައްސަލައަށް ވެސް އަޅުގަނޑުމެން އެބަ ޙައްލެއް ހޯދަން. އެ މަސައްކަތް މިހާރު ވާނީ އެޗް.ޑީ.ސީ.އާ ޙަވާލުކޮށްފައި. އިރާދަކުރެއްވިއްޔާ މާލަސްތަކެއްނުވެ އެކަމަށް ވެސް ޙައްލެއް ލިބިގެން ދާނެ. ޝަރުޢީ ދާއިރާ ތަރައްޤީކޮށް ކުރިއެރުވުމަކީ، ސަރުކާރުގެ އިޖުތިމާޢީ ޢަދާލަތުގެ އެންމެ މުހިންމު އެއް ވަޢުދު. އެ ވަޢުދު ފުއްދުމުގެ މަގު ފަހިކުރުމަށް، މިދިޔަ 4 އަހަރުގެ ތެރޭގައި، 9 ބިލެއް ރައްޔިތުންގެ މަޖިލީހަށް ހުށަހެޅިން. އޭގެ ތެރެއިން 6 ބިލެއް ވަނީ ޤާނޫނަށްވެ، ޢަމަލުކުރަން ފަށާފައި. އަނެއް 3 ބިލު އަދި އޮތީ ރައްޔިތުންގެ މަޖިލީހުގެ ކޮމިޓީ މަރުޙަލާގައި. އިރާދަކުރެއްވިއްޔާ މި ބޭފުޅުން އެ މަސައްކަތް ވަރަށް އަވަހަށް ކުރައްވާނެ.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު

ރައީސް ވިދާޅުވީ ޝަރުޢީ ދާއިރާގެ އިތުބާރު އެ މައްޗަށް ބިނާވާ މައިގަނޑު އަސާސަކީ ފަނޑިޔާރުންގެ ނަޒާހަތްތެރިކަން ކަމަށެވެ. އެކަމަށްޓަކައި ފަނޑިޔާރުންގެ ޒަރޫރީ ބޭނުންތައް ހަމަޖެހިފައި ހުރުން ކޮންމެހެން މުހިންމު ކަމަށެވެ. މާލީ ޢިނާޔަތްތަކާއި ބޯހިޔާވަހިކަމުގެ މައްސަލައަކީ ކޮންމެހެން ޙައްލުކޮށްދޭންޖެހޭ ކަންކަން ކަމަށާއި، ފަނޑިޔާރުންގެ ޤާނޫނަށް ސަރުކާރުން ހުށަހަޅާފައިވާ އިޞްލާޙްތަކަކީ މިކަމަށް ލިބޭނެ ޙައްލެއް ކަމަށް ރައީސް ވިދާޅުވިއެވެ.

އެ ބިލު ޤާނޫނަކަށްވުމުން، ރާއްޖޭގައި ހިންގާ ބޯހިޔާވަހިކަމުގެ މަޝްރޫޢުތަކުން ފަނޑިޔާރުންނަށް ވަކި ޢަދަދަކަށް ފްލެޓް ކަނޑައެޅިގެންދާނެ ކަމަށް ރައީސް ވިދާޅުވިއެވެ. އަދި އެފަދަ މަޝްރޫޢުތައް ނެތް ރަށްރަށުގައި ތިއްބަވާ ފަނޑިޔާރުންގެ ލިވިންގ އެލަވަންސްގެ މިންވަރުވެސް، ފަނޑިޔާރުންގެ އަސާސީ މުސާރައިގެ 35 އިންސައްތައަށްވުރެ ކުޑަނުވާނެ ގޮތަކަށް ހަމަޖެހިގެންދާނެ ކަމަށެވެ.

އެންމެ ފަހުން އަޕްޑޭޓް ކުރީ: 4 ހަފްތާ ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
0%
0%
0%
0%
ކޮމެންޓް