ނިޒާމީ ބޮޑު ބަދަލަކަށް ޝަރުޢީ ދާއިރާ ވަނީ މިޞްރާބު ޖަހާފައި: އުއްތަމަ ފަނޑިޔާރު
9 ފެބުރުއަރީ 2023 | ބުރާސްފަތި 18:35މިއަހަރުގެ ތެރޭގައި ޖުޑީޝަލް ސަރވިސް ކޮމިޝަން އެކުލެވިގެންވާ ގޮތް ބަދަލުކުރުމުގެ މަސައްކަތް ކުރިއަށްދާނެ
"ޤަޟާއީ އަހަރު 2023" އިފްތިތާޙްކުރުމުގެ ރަސްމިއްޔާތުގެ ތެރެއިން
މި ހިނގާ 2023 ވަނަ އަހަރު ޝަރުޢީ ދާއިރާއިން ވަނީ ނިޒާމީ ބޮޑު ބަދަލަކަށް މިޞްރާބު ޖަހާފައިކަަމަށް، އުއްތަމަ ފަނޑިޔާރު އަޙުމަދު މުޢުތަޞިމް ޢަދުދާން ވިދާޅުވެއްޖެއެވެ.
"ޤަޟާއީ އަހަރު 2023" އިފްތިތާޙުކުރުމުގެ ރަސްމިއްޔާތުގައި ވާހަކަފުޅުދައްކަވަމުން އެމަނިކުފާނު ވިދާޅުވީ، މި އަހަރަކީ ޝަރުޢީ ދާއިރާގެ ނިޒާމީ ބޮޑު ބަދަލަކަށް މިޞްރާބު ޖަހާފައިވާ އަހަރެއް ކަމަށާއި، މިއަހަރުގެ ތެރޭގައި ޖުޑީޝަލް ސަރވިސް ކޮމިޝަން އެކުލެވިގެންވާ ގޮތް ބަދަލުކުރުމުގެ މަސައްކަތް ކުރިއަށްދާނެކަަމަށެވެ. ހަމަ އެހެންމެ، މި އަހަރުގެތެރޭގައި ޤާނޫނު އަސާސީއާ ގުޅުންހުރި ޤާނޫނުތަކަށް ބަދަލު ގެންނެވުމަށް ރައްޔިތުންގެ މަޖިލީހަށް ހުށަހެޅުމަށް ނިންމަވާފައިވާތީ، އެކަމަށްޓަކައި ރައީސަށް މަރުޙަބާ ދަންނަވާ ކަމަށްވެސް އެމަނިކުފާނު ވަނީ ވިދާޅުވެފައެވެ. ރިޔާސީ ބަޔާނުގައި ރައީސް ވިދާޅުވެފައިވާފަދައިން، ޖުޑީޝަލް ސަރވިސް ކޮމިޝަނަށް އިޞްލާޙު ގެނައުމާއި ޤާނޫނު އަސާސީއާ ގުޅުންހުރި ޤާނޫނުތަކަށް އިޞްލާޙު ގެނައުމާއެކު، އެކަމުގެ ސަބަބުން މުޅި ޝަރުޢީ ދާއިރާއަށް ބޮޑެތި ބަދަލުތަކެއް އަންނާނެކަން އެމަނިކުފާނު ވަނީ ފާހަގަކުރައްވާފައެވެ.
އެ ރަސްމިއްޔާތުގައި ވާހަކަދައްކަވަމުން އުއްތަމަ ފަނޑިޔާރު ވިދާޅުވީ، 47 އަހަރަށްފަހު ހެތްކާބެހޭ ގާނޫނު އުވި، ހެތްކާބެހޭ އާ ޤާނޫނަކާއެކު މަސައްކަތް ކުރުމަކީ ޝަރުޢީ ދާއިރާއަށް ލިބުނު ވަރަށް ބޮޑު ކުރިއެރުމެއް ކަމަށެވެ. އަދި 2022 އަހަރަކީވެސް ރާއްޖޭގެ މަދަނީ އިޖުރާތުގެ ނިޒާމަށް އިންޤިލާބީ ބަދަލުތަކެއް ގެނެސްދިން އަހަރެއް ކަމަށެވެ. އެގޮތުން ކޯޓުތަކަށް މައްސަލަތައް ހުށަހެޅުމާއި، މައްސަަލަތައް ކުރިއަށް ގެންދާ ގޮތާއި، މަދަނީ މައްސަލަތަކުގައި ކޯޓުތަކުން އިއްވާ ޙުކުމްތައް ތަންފީޒުކުރުމުގައި ބޮޑެތި ބަދަލުތަކެއް އައިސްފައިވާކަަމަށް ވިދާޅުވިއެވެ.
އުއްތަމަ ފަނޑިޔާރު ވިދާޅުވީ، ރާއްޖޭގެ ޤާނޫނީ ނިޒާމު ތަރައްޤީވެ ކުރިއަރަމުން ދިއުމާއެކު، އެނިޒާމުގެ ޙަޤީޤީ މަޤްޞަދު ޙާޞިލްކުރެވޭނީ ޤާނޫނު ރަނގަޅަށް ތަންފީޒުވެގެން ކަމަށެވެ. އެހެންކަމުން ޤާނޫނުތައް ތަންފީޒުކުރަން ތިބި ފަރާތްތައް ޤާނޫނުތަކަށް އަހުލުވެރިވުން މުހިންމުކަމަށް އެމަނިކުފާނު ވަނީ ވިދާޅުވެފައެވެ.
