މާލެ ކައިރީގައި ޕިކްނިކް ދާނެ ރަށެއް ނެތުމަކީ މާލޭގައި ދިރިއުޅެމުން އަންނަ ފަރާތްތަކުގެ ވަރަށް ބޮޑު ކަންބޮޑުވުމެކެވެ. އާއިލާއާއެކު ޗުއްޓި ދުވަސްތަކުގައްޔާއި ހަފުތާ ބަންދުގައި ވަގުތުކޮޅެއް ހޭދަކޮށްލަން ދާނެ ތަނެއް ނެތުމުގެ ކަންބޮޑުވުމެވެ. މި ކަންބޮޑުވުމަށް ހައްލު ހޯއްދަވައިދެއްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވައުދުވެވަޑައިގެންފައިވާއިރު، އެ ވައުދު ފުއްދެވި، އަންނަ ހޮނިހިރު ދުވަހު ގިނަ ބައެއްގެ އިންތިޒާރަށް ނިމުމެއް އަންނާނެއެވެ.

މާލޭގައި ދިރިއުޅޭ ރައްޔިތުން ޕިކްނިކް ދިއުމަށް ފަޅެއް ހިއްކައި "ކުޑަގިރި" މިވަނީ ހަގީގަތަކަށްވެފައެވެ. ކުޑަގިރި ހުޅުވުމުގެ ތައްޔާރީތައް ވަމުން އަންނައިރު އާއްމުންނަށް މިހާރު ބުކިން ހެއްދޭ އިންތިޒާމުތައް ވަނީ ހަމަޖެހިފައެވެ. އެޗްޑީސީން ހޮނިހިރު ދުވަހު ކުޑަގިރިއަށް ދިއުމުގެ ފުރުސަތު ހުޅުވާލީ ބުރާސްފަތި ދުވަހުގެ ހަވީރު 4:00ގައެވެ. އެ ފުރުސަތު ހުޅުވާލުމާއެކުވެސް މި ޕިކްނިކް އައިލެންޑަކީ ގިނަ ބަޔަކު ކެތްމަދުވެގެން، އިންތިޒާރުކުރަމުން އައި ޕްރޮޖެކްޓެއްކަން އެނގިގެންދިޔައެވެ. ބުކިންގއަށް ހުޅުވާލިތާ ކުޑަވަގުތުކޮޅެއްގެ ތެރޭގައި ކުޑަގިރިއަށް ޚާއްސަކޮށްގެން ހެދި ވެބްސައިޓުވެސް ޑައުންވިއެވެ. އެއީ ވެބްސައިޓަށް އެއްވަގުތަކާ ވަންނަ މީހުންގެ އަދަދު އިތުރުވުމުގެ ސަބަބުން ދިމާވި ކަމެކެވެ.

އެޗްޑީސީން "ރާއްޖެ އެމްވީ"އަށް މައުލޫމާތު ދީފައިވާ ގޮތުގައި، ބުކިންގއަށް ހުޅުވާލުމުން ކުޑަގިރި މޯބައިލް އެޕްލިކޭޝަނާއި ވެބްސައިޓަށްވެސް އެހާމެ ބާރުބޮޑުވިއެވެ. އަދި ބުކިންއަށް ހުޅުވާލިތާ އެންމެ ދެ ގަޑިއިރު ނުވަނީސް، ހޮނިހިރު ދުވަހަށް ހުޅުވާލި ޖާގަތައް ފުލްވިއެވެ. ހޮނިހިރު ދުވަހަކީ ކުޑަގިރި ހުޅުވާ ދުވަހަށް ވުމުން އެެޗްޑީސީން އެ ދުވަހަށް ފުރުސަތު ހުޅުވާލީ 300 މީހުންނަށެވެ.

ޖުމުލަ 8 ހެކްޓަރުގެ ބިން ހިއްކައިގެން ތަރައްގީކޮށްފައިވާ ކުޑަގިރިއަކީ، 3 ތަރީގެ ފެންވަރަށް ތައްޔާރުކޮށްފައިވާ ރަށެކެވެ. މި ރަށުގައި 1.5 ހެކްޓަރުގެ ފިނޮޅަކާއި ދަތުރުދާ މީހުން މޫދަށް އެރޭނެ ސަރަހައްދުތަކެއް ވަނީ ތަރައްގީކޮށްފައެވެ.

ކުޑަގިރި ތަރައްގީކޮށްފައި ވަނީ މުނިފޫހިފިލުވާލައި އަރާމު ވަގުތުކޮޅެއް ހޭދަކޮށްލަން އެކަށީގެންވާ ގޮތަށެވެ. އެގޮތުން، ޒަމާނީ ކުލަތަކަށް ފެތޭގޮތަށް ހަދާފައިވާ އެ ރަށަކީ ރައްޔިތުންގެ ނަފްސާނީ ދުޅަހެޔޮކަން އިތުރުކޮށްދިނުމަށް އެޅޭނެ މުހިންމު ބިންގަލެއްކަމަށް ސަރުކާރުން ގަބޫލުކުރެއެވެ. އަދި އެ ރަށަށް މިހާތަނަށް ޒިޔާރަތްކޮށްފައިވާ ފަރާތްތަކުންނާއި ރަށުގެ ފޮޓޯތަކާއި ވީޑިއޯތައް ބެލި ފަރާތްތަކުން އެ ރަށް ސިފަ ކުރަނީ ރިސޯޓަކާ އެއްވަރުގެ ފުރިހަމަ ރަށެއްގެ ގޮތުގައެވެ.

ކުޑަގިރި ތަރައްގީކޮށްފައި ވަނީ އެއްފަހަރާ 500އާ 600އާ ދެމެދުގެ އަދަދެއްގެ މީހުންނަށް ދަތުރު ދެވޭގޮތަށެވެ. އަދި ނުކުޅެދުންތެރިކަން ހުންނަ މީހުންނަށްވެސް ފަސޭހަކަމާއެކު ދަތުރުގޮސް، މަޖާކުރެވޭނެ އިންތިޒާމުތައް ވަނީ ހަމަޖެހިފައެވެ.

ކުޑަގިރީގައި އާންމުން ބޭނުންކުރުމަށް ޑޭ ޔޫސް ރޫމްގެ ގޮތުގައި 12 ރޫމް ކަނޑައަޅާފައި ވާއިރު، އާންމުން ބޭނުންކުރުމަށް 13 ކުޑަ އަށި އަދި 4 ބޮޑު އަށިވަނީ ގާއިމުކޮށްފައެވެ. އަދި އާންމުންނަށް ބޭނުންވާ އަސާސީ ގިނަ ވަސީލަތްތައް އެ ރަށުން ލިބެން ހުންނައިރު، ދަތުރު ދިއުމަށް ބޭނުންވާ ހުރިހާ ވަސީލަތެއް ފުރިހަމަވާނެއެވެ. މީގެ ތެރޭގައި ފާޚާނާބަރި، ޗޭންޖިންގ ރޫމް، ނަރސިންގ ރޫމްވެސް ހިމެނެއެވެ. އެ ރަށަށް ދަތުރުދާ ފަރާތްތަކުން ގެންދަންޖެހޭނީ ހަމައެކަނި ބެކްޕެކްއާއި ލާނެ ހެދުމެވެ.

ކުޑަ ގިރިއަށް ދިއުމަށް ފެރީއަށް ދައްކަންޖެހޭނީ ކޮޅަކަށް 25 ރުފިޔާއެވެ. އަދި އެންޓްރެންސް ފީގެ ގޮތުގައި ދައްކަން ޖެހެނީ 50 ރުފިޔާއެވެ. އަދި 12 އަހަރުން ދަށުގެ ކުދިންނަށް ނަގާނީ މި އަގުތަކުގެ ދެބައިކޮށްފައި އެއްބައެވެ. މިއީ ސަރުކާރު ރަސްމީ ދުވަސްތަކުގައި ދާނަމަ ދައްކަން ޖެހޭ ފީއެވެ. އެހެންކަމުން ހަފުތާ ބަންދާއި ސަރުކާރު ބަންދު ދުވަސްތަކުގައި ކުޑަގިރިއަށް ދާ ފަރާތްތަކުގެ އަތުން ފީއެއް ނުނަގާނެއެވެ. މިއީ ކޮންމެ މީހަކަށްވެސް އާއިލާއެކު ނުވަތަ ރައްޓެހިންނާއެކު އުފާވެރި ވަގުތުކޮޅެއް ހޯދައިދިނުމަށް ނިންމާފައިވާ ނިންމުމެކެވެ.