ހޮނިހިރު ދުވަހު ކުޑަގިރިއަށް ދިއުމަށްޓަކައި ރަޖިސްޓްރީވުން މިއަދު 04:00ގައި ހުޅުވާލާނެ ކަމަށް ހައުސިން ޑިވެލޮޕްމެންޓް ކޯޕަރޭޝަން އެޗްޑީސީ އިން ބުނެފިއެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެޗްޑީސީގެ ޑިރެކްޓަރ މާކެޓިން އެންޑް ސޭލްސް، ނިއުޝާދު ޝަރީފް ވިދާޅުވީ ހަފްތާ ބަންދު ދުވަސްތަކާއި ސަރުކާރު ބަންދު ދުވަސްތަކުގައި ކުޑަގިރި އަށް ދިއުމަށް އެއްވެސް ފީއެއް ނުނަގާނެ ކަމަށެވެ. އެހެންނަމަވެސް ކުޑަގިރި އަށް އެ ދާން ބޭނުންވާ ފަރާތްތަކުން ދުރާލާ ބުކިން ހައްދަން ޖެހެއެވެ. ބުކް ކުރާ އިރު އައިޑީކާޑު ނަމްބަރު ކަށަވަރުކުރުމަށް އޭނާ އެދިވަޑައިގެންނެވިއެވެ. މީގެ އިތުރުން ބުކިން ހައްދާ އިރު ކޮންމެ މީހަކަށް ވެސް ބުކިން ހެއްދޭނީ 7 މީހުންނަށް ކަމަށާއި އެ ގޮތަށް ނިންމާފައި ވަނީ ގިނަ މީހުންނަށް ކުޑަގިރި އަށް ދިއުމަށް ފުރުސަތު ދިނުމުގެ ގޮތުން ކަމަށް އޭނާ ވިދާޅުވިއެވެ. ނިއުޝާދު ވިދާޅުވީ ކުޑަގިރި އަށް ޚާއްސަ ހޮޓްލައިނާއި އީމެއިލް ވެސް މިއަދު 04:00 އިން ފެށިގެން އެޗްޑީސީގެ ވެބްސައިޓުން ފެންނަން ހުންނާނެ ކަމަށެވެ.

ޕިކްނިކް އައިލެންޑްގެ ބޭނުމަކީ ރައްޔިތުންނަށް އުފާވެރި ވަގުުތުކޮޅެއް ހޯދައިދިނުންކަމަށް ވާއިރު ކުޑަ ގިރިއަށް ދިއުމަށް ފެރީއަށް ދައްކަންޖެހޭނީ ކޮޅަކަށް 25 ރުފިޔާއެވެ. އަދި އެންޓްރެންސް ފީގެ ގޮތުގައި ދައްކަން ޖެހެނީ 50 ރުފިޔާއެވެ. އަދި 12 އަހަރުން ދަށުގެ ކުދިން ނަގާނީ މި އަގުތަކުގެ ދެބައިކޮށްފައި އެއްބައެވެ. އެ ފީ ވެސް ނަގަނީ ސަރުކާރު ބަންދު ދުވަސްތައް ނޫން އެހެން ދުވަސްތަކުގައި ކުޑަގިރި އަށް ދާ ނަަމައެވެ.

މި ނޫސްވެރިންގެ ބައްދަލުވުމުގައި ވާހަކަދައްކަވަމުން އެސިސްޓެންޓް މެނޭޖަރު ޕީއާރް އަހްމަދު މިމްރާހު ވަނީ ކުޑަގިރި އަށް ދާއިރު ސަމާލުކަން ދޭން ޖެހޭ ކަންކަމަށް އަލިއަޅުވާލައްވާފައެވެ. އެގޮތުން އެ ރަށަށް ތޫނު އެއްޗެހި އަދި ބާބަކިއު ހެދުމަށް ބޭނުންކުރާ އެއްޗެހި ވެސް ގެންދިއުމަކީ މަނާކަމެއްކަމަށް ވިދާޅުވިއެވެ. މީގެ އިތުރުން އެ ރަށަށް ދަތުރު ދާ ފަރާތްތަކަށް ބޭނުންވާ އަސާސީ ޚިދުމަތަކާއި ޕިކްނިކް ދާއިރު ބޭނުންވާ ސާމާނު ވެސް އެ ރަށުން ލިބެން ހުންނާނެކަން އޭނާ ވިދާޅުވިއެވެ.

ޖުމުލަ 8 ހެކްޓަރުގެ ބިން ހިއްކައިގެން ތަރައްޤީކޮށްފައިވާ ކުޑަގިރިއަކީ، 3 ތަރީގެ ފެންވަރަށް ތައްޔާރުކޮށްފައިވާ ތަނެކެވެ. މި ރަށުގައި ޤާއިމްކޮށްފައިވާ 1.5 ހެކްޓަރުގެ ފިނޮޅަކާއި ދަތުރުދާ މީހުން މޫދަށް އެރޭނެ ސަރަހައްދުތަކެއް ވަނީ ތަރައްޤީކޮށްފައެވެ. މި ތަނަށް މާލެއިން 10 މިނެޓުގެ ލޯންޗު ދަތުރެއްކޮށް ދެވެއެވެ. ހޮނިހިރު ދުވަހު ކުޑަގިރިއަށް ދިއުމަށް ފުރުސަތު ހުޅުވާލަނީ 300 މީހުންނަށެވެ. އެ ތަނުގައި އެއްފަހަރާ 500 ނުވަތަ 600 މީހުންނަށް ޚިދުމަތް ދެވޭނެ ކަމަށް އެޗްޑީސީ އިން ވަނީ މީގެ ކުރިން ބުނެފައެވެ.