ތުރުކީއަށް އައި ބާރު ގަދަ ބިން ހެލުމުގައި އެންމެ ބޮޑަށް އަސަރުކޮށްފައިވާ ދެކުނުއިރުމަތީގެ 10 ޕްރޮވިންސްގައި ތިން މަސް ދުވަހުގެ ސްޓޭޓް އޮފް އިމަރޖެންސީ އެގައުމުގެ ރައީސް ރަޖަބް ތޮއްޔިބް އުރުދުޣާން އިއުލާންކުރައްވައިފިއެވެ.

އުރުދުޣާން ވިދާޅުވީ ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށްޓަކައި އިމަރޖެންސީ ގިނަ ފިޔަވަޅުތަކެއް އަޅުއްވާނެކަމަށެވެ. އެގޮތުން އިންސާނީ އެހީތެރިކަމަށް މަސައްކަތްކުރާ މީހުންނަށް ބިން ހެލުމުގެ އަސަރު ކޮށްފައިވާ ސަރަހައްދުތަކަށް ދިޔުމުގަޔާއި ފައިސާގެ ގޮތުން އެހީތެރިކަން ފޯރުކޮށްދިނުމަށް ފިޔަވަޅުތައް އަޅުއްވާނެކަމަށް އުރުދުޣާން ވިދާޅުވިއެވެ. ޓީވީ މެދުވެރިކުރައްވާ ތުރުކީގެ ރައްޔިތުންނާ މުޚާތަބުކުރައްވަމުން އުރުދުޣާން ވިދާޅުވީ ހާލުގައި ޖެހިފައިވާ މީހުންނަށް އެހީތެރިވުމުގެ މަސައްކަތް އަވަސްކުރުމުގެ ގޮތުން ސްޓޭޓް އޮފް އިމަރޖެންސީ އިއުލާންކުރައްވާކަމުގައެވެ.

ސްޓޭޓް އޮފް އިމަރޖެންސީ އާ ގުޅިގެން ގާނޫނު ހަދާ މަޖިލީހުންނާއި ރައީސް އޮފީހުން ފުރިހަމަކުރަންޖެހޭ ކަންކަން ވީއެންމެ އަވަހަށް ކޮށްނިންމަވާނެކަމަށްވެސް އުރުދުޣާން ވިދާޅުވިއެވެ.

މި ގަރުނުގައިވެސް ތުރުކީއަށް ކުރިމަތިވި އެންމެ ގެއްލުން ބޮޑު ބިންހެލުމުގައި ހާލުގައި ޖެހިފައިވާ އެތައް ހާސް ބަޔަކަށް އެހީވުމުގައި ތުރުކީ ސަރުކާރުން މާބޮޑަށްވެސް ލަސްވެފައިވާކަމަށް ބުނެ ސޯޝަލް މީޑިޔާގައި އެތައް ހާސް ބަޔަކު އަންނަނީ ތުރުކީ ސަރުކާރަށް ފާޑުކިޔުންތައް އަމާޒުކުރަމުންނެވެ. އެކަމުގެ ސަބަބުން ތުރުކީ ސަރުކާރަށް ކުރިމަތިވަމުންދާ ޕްރެޝަރ އަންނަނީ އިތުރުވަމުންނެވެ.

އުރުދުޣާން ވިދާޅުވީ ބިން ހެލުމުގެ އަސަރުކޮށްފައިވާ ސަރަހައްދުތަކަށް އެހީތެރިކަން ފޯރުކޮށްދިނުމަށް އިތުރު 50،000 މަސައްކަތް ތެރިން ފޮނުވާނެކަމަށެވެ. އަދި ހާލުގައި ޖެހިފައިވާ ފަރާތްތަކަށް އެހީތެރިވުމަށް 5.3 ބިލިއަން އެމެރިކާ ޑޮލަރު ހަމަޖައްސާފައިވާކަމަށް ވިދާޅުވިއެވެ.

އުރުދުޣާންގެ 20 އަހަރުވީ ވެރިކަމުގައި ކުރިމަތިވި ގުދުރަތީ އެންމެ ބޮޑު ކާރިސާ ކުރިމަތިވެފައިމިވަނީ އެގައުމުގެ ރިޔާސީ އަދި ގާނޫނު ހަދާ މަޖިލީހުގެ އިންތިޚާބު މެއި 14 ގައި ބޭއްވުމަށް ހަމަޖެހިފައިވަނިކޮށެވެ.

ހޯމަ ދުވަހު ތުރުކީއަށް އައި 7.8 މެގްނެޓިޔުޑްގެ ބިން ހެލުމުގައި މިހާތަނަށް ތުރުކީން 3549 މީހުން މަރުވެފައިވާއިރު މިބިން ހެލުމުގެ އަސަރު ދެން ކޮށްފައިވާ ސީރިއާއިން 1602 މީހުން މިހާތަނަށް ވަނީ މަރުވެފައެވެ.