މަދަނީ އިޖުރާއަތުގެ ޤާނޫނުގެ ދަށުން މުއްދަތު ގުނާނެ ގޮތާ ގުޅޭގޮތުން ސުޕްރީމް ކޯޓުގެ އިރުޝާދެއް
މި ޕްރެކްޓިސް ޑައިރެކްޝަން ނެރުއްވާފައިވަނީ އާދިއްތަ ދުވަހު
ސުޕްރީމް ކޯޓް
މަދަނީ އިޖުރާއަތުގެ ޤާނޫނުގެ ދަށުން މުއްދަތު ގުނާނެ ގޮތާ ގުޅޭގޮތުން ސުޕްރީމް ކޯޓުން ޕްރެކްޓިސް ޑައިރެކްޝަނެއް ނެރެފިއެވެ.
ދިވެހިރާއްޖޭގެ އުއްތަމަފަނޑިޔާރު އަހުމަދު މުއުތަސިމް އަދުނާނު ސޮއި ކުރައްވައި މި ޕްރެކްޓިސް ޑައިރެކްޝަން ނެރުއްވާފައިވަނީ އާދިއްތަ ދުވަހުއެވެ.
މި ޕްރެކްޓިސް ޑައިރެކްޝަންގައި ބަޔާންކޮށްފައިވަނީ ޤާނޫނު ނަންބަރު 32/2021 (މަދަނީ އިޖުރާއަތުގެ ޤާނޫނު) ގެ ދަށުން މުއްދަތު ގުނުމުގައި ޝަރުއީ ކޯޓުތަކުން އެއް އުސޫލަކުން އަމަލު ކުރުމުގެ ގޮތުން އެ ޤާނޫނުގެ 424 ވަނަ މާއްދާގެ ދަށުން މުއްދަތު ގުނާނެ ގޮތެވެ.
މަދަނީ އިޖުރާއަތުގެ ޤާނޫނުގެ 424 ވަނަ މާއްދާގައި ބުނެފައިވަނީ މުއްދަތެއް ކަނޑައެޅުމުގައި، ވަކި ދުވަސްތަކެއްގެ ތެރޭގައި ވަކި ކަމެއް ކުރުމަށް ބުނެފައިވާނަމަ، އެ މުއްދަތު ގުނުމުގައި، އެ މުއްދަތު ފެށޭ ދުވަހާއި ނިމޭ ދުވަހެއް ނުހިމެނޭނެ ކަމަށެވެ.
އަދި ހަތް ދުވަހަށްވުރެ ކުރު މުއްދަތެއް ގުނުމުގައި، އެ ހަތް ދުވަހުގެ މުއްދަތުގެ ތެރޭގައި ރަސްމީ ބަންދު ދުވަހެއް ހިމެނޭނަމަ، އެ ބަންދު ދުވަހެއް އެ މުއްދަތު ގުނުމުގައެއް ނުހިމެނޭނެކަމަށްވެސް ވަނީ ބަޔާންކޮށްފައެވެ.
އޭގެ އިތުރުން، ޙުކުމެއް ނުވަތަ ކޯޓު އަމުރެއް ނުވަތަ ކޯޓަކުން ނެރެފައިވާ އެނޫންވެސް އެންގުމެއްގައި މަހަކަށް ޙަވާލާދީފައިވާނަމަ، އެ ޙަވާލާދެނީ، މީލާދީ މަހަކަށްކަމަށްވެސް މި ޤާނޫނުގައި ބުނެއެވެ.
ސުޕްރީމް ކޯޓުގެ އިރުޝާދުގައި ވަނީ ޤާނޫނުގައި ބުނެފައިވާ ގޮތުގެ މަތިން މުއްދަތު ގުނާނެ ގޮތް ތަފްސީލު ކޮށްދެއްވާފައެވެ.
އެގޮތުން ބަލާއިރު، 7 ދުވަހަށް ވުރެ ދިގު މުއްދަތު ގުނާނީ އެ މުއްދަތު ފެށޭ ދުވަހާއި، ނިމޭ ދުވަސް ނުހިމަނައި، އެ މުއްދަތުގެ ތެރޭގައި ހިމެނޭ ރަސްމީ ބަންދު ދުވަސްތައް ހިމަނައިގެންނެވެ.
އަދި 7 ދުވަހަށްވުރެ ކުރު މުއްދަތު ގުނާނީ އެ މުއްދަތު ފެށޭ ދުވަހާއި، ނިމޭ ދުވަހާއި، އެ މުއްދަތުގެ ތެރޭގައި ހިމެނޭ ރަސްމީ ބަންދު ދުވަސްތައް ނުހިމަނައެވެ.
އެގޮތަށް މުއްދަތު ގުނާއިރު، ވަކި ކަމެއް ކުރުމަށް ކަނޑައަޅާފައިވާ މުއްދަތު ނިމޭ ދުވަސް ދިމާވަނީ ރަސްމީ ބަންދު ދުވަހަކާ ކަމުގައިވާނަމަ، ދެން އެންމެ އަވަހަށް ކޯޓުގެ މަސައްކަތް ފެށޭ ރަސްމީ ދުވަހެއްގައި އެކަން ކުރުމުން، އެކަމެއް މުއްދަތުގެ ތެރޭގައި ކުރެވުނީކަމަށް ބެލެވޭނެކަމަށް މި އިރުޝާދުގައިވެއެވެ.
އޭގެ އިތުރުން، ވަކި ކަމެއް ވަކި މުއްދަތެއްގެ ތެރޭގައި ނިންމަން ޖެހޭނެކަމަށް ބަޔާންކޮށް ކޯޓުން އަންގާ އެންގުންތަކުގައި އެކަމެއް ފުރިހަމަކޮށް ކޯޓަށް ހުށައަޅަންޖެހޭ ތާރީޚާއި ގަޑި ހިމަނަންވާނެކަމަށްވެސް މި އިރުޝާދުގައިވެއެވެ.
ޖިނާއީ އިޖުރާއަތުގެ ޤާނޫނުގެ ދަށުން ކޯޓު އަމުރެއް އިސްތިއުނާފު ކުރުމަށް ދައުލަތަށް ލިބިގެންވާ 48 ގަޑިއިރު ގުނާނެ ގޮތާއި ގުޅޭގޮތުން އަރާފައިވާ "އޮޅުން ބޮޅުން" ވެސް ސުޕްރީމް ކޯޓުން މީގެ ކުރިން ވަނީ ޙައްލު ކޮށްދީފައެވެ. އެގޮތުން ޖިނާއީ އިޖުރާއަތުގެ ޤާނޫނުގެ 198 ވަނަ މާއްދާގެ (ރ) ގައި ބަޔާން ކޮށްފައިވަނީ ކޯޓު އަމުރެއް އިސްތިއުނާފު ކުރުމަށް ދައުލަތަށް ލިބިގެންވަނީ 48 ގަޑިއިރު ކަމަށެވެ. އެއީ ދަށު ކޯޓުގެ އަމުރު ނެރޭތާ ހުއްޓުމެއް ނެތި 48 ގަޑިއިރު ހަމަވާ ވަގުތަށެވެ.
އެހެންނަމަވެސް، ޝަރީއަތް ކުރުމާބެހޭ ޖިނާއީ އިޖުރާއަތުގެ ގަވާއިދުގެ 169 ވަނަ މާއްދާ (މުއްދަތު ގުނާނެ ގޮތާއި ގުޅޭ މާއްދާ) ގެ (ހ) ގައި ބަޔާން ކޮށްފައިވަނީ އިސްތިއުނާފު ކުރުމުގެ މުއްދަތު ގުނާނީ، ފުރަތަމަ މަރުޙަލާގެ ކޯޓުން މައްސަލަ ނިންމި ދުވަހާއި، އިސްތިއުނާފު ކުރުމުގެ މުއްދަތު ހަމަވާ ދުވަހަކާއި، އެ ދެމެދަށް އަންނަ ރަސްމީ ބަންދު ދުވަސްތައް ނުހިމަނާ ކަމަށެވެ.
ޤާނޫނަކާއި ޤަވާއިދެއްގެ ފުށުއެރުން މި ޙާލަތުގައި އަންނައިރު، އެކަމުގެ ސަބަބުން އުފެދިފައިވާ އޮޅުންބޮޅުން ޙައްލު ކުރުމަށްޓަކައި ސުޕްރީމް ކޯޓުން ވަނީ އެ ޤަވާއިދު ބާތިލުކަމަށް ނިންމަވާފައެވެ.
