މަޖިލިސް ކައިރީގައި ކުރިއަށްދިޔަ މުޒާހަރާގައި ނޫސްވެރިންތަކަކަށް އަނިޔާވި މައްސަލަ ބަލަނީ
މުޒާހަރާގެ ބައިވެރިން ވެސް ނޫސްވެރިންތަކަކަށް ފުރައްސާރަކޮށްފައިވާ ކަމަށް މީޑިއާތަކުން ރިޕޯޓު ކުރޭ
އިދިކޮޅުން ކުރިއަށްގެންދިޔަ މުޒާހަރާ
ރައްޔިތުންގެ މަޖިލިސް ކައިރީގައި އިދިކޮޅު ޕީޕީއެމް/ޕީއެންސީ ކޯލިޝަނުން ކުރިއަށްގެންދިޔަ މުޒާހަރާގައި ނޫސްވެރިންތަކަކަށް އަނިޔާވި މައްސަލަ ބަލަމުންދާ ކަމަށް ފުލުހުން ބުނެފިއެވެ.
ފުލުހުން ބުނީ ހޯމަ ދުވަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ރިޔާސި ބަޔާން އިއްވެވި ޖަލްސާ ކުރިއަށްދަނިކޮށް އިދިކޮޅުން ކުރިއަށް ގެންދިޔަ މުޒާހަރާގައި ދެ ނޫސްވެރިއަކަށް އަނިޔާވުމަކީ ދިވެހި ފުލުހުންގެ ޚިދުމަތުން ނުހަނު ކަންބޮޑުވާ ކަމެއްކަމަށެވެ. އަދި މިކަމާ ގުޅިގެން މިހާތަނަށް ބެލިބެލުމުން، ފުލުހުންގެ ފަރާތުން އެ ނޫސްވެރިންނަށް އަމާޒުކޮށް އަނިޔާ ދިނުމުގެ ނިޔަތުގައި އެއްވެސް ކަމެއް ކޮށްފައިވާ ކަމަށް ނުބެލެވޭކަމަށް ވެސް ފުލުހުންގެ އިދާރާއިން ބުނެއެވެ.
ފުލުހުން މުޒާހަރާ ރޫޅާލުމުގެ އިންޒާރުދީ، ރޫޅާލުމަށް ޝީލްޑުތަކާއެކު ކުރިއަށް ޖެހެމުން ދިޔައިރު އެއްވުމުގެ ބައިވެރިން ނޫސްވެރިންގެ ގައިގައި އަޅައި ކޮއްޕުމާއި ނޫސްވެރިން ޝީލްޑުތަކުގައި އަޅައި ކޮއްޕުން ފަދަ ކަންކަމުގެ ތެރެއިން އެ ނޫސްވެރިން ވެއްޓިފައިވާކަން ފުލުހުން ފާހަގަކުރެއެވެ.
މި ހާދިސާގައި ކަން ހިނގާފައިވާގޮތުގެ ފުރިހަމަ ރިވިއުއެއް ޕްރޮފެޝަނަލް ސްޓަންޑަރޑްސް ކޮމާންޑުން ކުރަމުންދާކަމަށް ފުލުހުން ބުނެއެވެ.
މުޒާހަރާ ރޫޅާލުމުގެ ތެރެއިން ނޫސްވެރިންތަކަކަށް އަނިޔާވެފައިވާއިރު މުޒާހަރާގެ ބައިވެރިން ވެސް ނޫސްވެރިންތަކަކަށް ފުރައްސާރަކޮށްފައިވާ ކަމަށް މީޑިއާތަކުން ރިޕޯޓު ކުރެއެވެ.
