ތުރުކީއަށް އައި ބާރުގަދަ ބިންހެލުމުގައި އެތައް ބަޔަކު މަރުވުމާއި ގުޅިގެން ރައީސް ސާލިޙު ތައުޒިޔާ ވިދާޅުވެއްޖެ
6 ފެބުރުއަރީ 2023 | ހޯމަ 08:39ބިންހެލުމާއި ގުޅިގެން މަރުވި މީހުންގެ އަދަދު 500ން މައްޗަށް ވަނީ ގޮސްފައި
ތުރުކީއާއި ސީރިއާ ސަރަޙައްދަށް ބާރުގަދަ ބިންހެލުމެއް އައުން
ތުރުކީއަށް ބާރުގަދަ ބިންހެލުމެއް އައިސް އެތައް ބަޔަކު މަރުވުމާއި ގުޅިގެން ރައީސް އިބްރާހިމް މުޙައްމަދު ސާލިޙު ތައުޒިޔާ ވިދާޅުވެއްޖެއެވެ.
މެދުތެރޭ ތުރުކީއަށާއި ސީރިއާގެ ހުޅަނގު އުތުރު ސަރަޙައްދަށް ހޯމަ ދުވަހު އައި މި ބިންހެލުމާއި ގުޅިގެން މަރުވި މީހުންގެ އަދަދު 500ން މައްޗަށް ގޮސްފައިވާއިރު، މި އަދަދު އަދިވެސް އިތުރުވާނެކަމަށް ކަމާބެހޭ ފަރާތްތަކުން ވަނީ އަންދާޒާ ކޮށްފައެވެ.
7.9 މެގްނިޓިއުޑްގެ ބާރުގަދަ މި ބިންހެލުމުގެ ސަބަބުން އެތައް އިމާރާތެއް ވެސް ބިމާ ހަމަވެފައިވާއިރު، އެ ޤައުމުގެ ކާރިސާއާބެހޭ އިދާރާއިން ވަނީ ލެވެލް 4 ގެ އިންޒާރު ވެސް ނެރެފައެވެ. އެގޮތުން އެ އިންޒާރަކީ ބައިނަލްއަޤުވާމީ ޤައުމުތަކުގެ އެހީއަށް އެދޭ ޙާލަތުގައި އޮންނައިރު ނެރޭ އިންޒާރެކެވެ.
އެކަމާ ގުޅިގެން ހޯމަ ދުވަހު ރައީސް ސާލިޙު ކުރެއްވި ޓްވީޓެއްގައި ވިދާޅުވީ، މި ޚަބަރު އެއްސެވީ ފުން ހިތާމައާއެކު ކަމަށާއި، ދިވެހި ރައްޔިތުން ތިބީ އެ ޤައުމާއެކު ކަމަށެވެ.
ރައީސް ވަނީ މަރުވި މީހުންގެ އާއިލާތަކަށް ތައުޒިޔާ ވިދާޅުވެ، ތުރުކީއަށް ދިމާވެފައި މިވާ ކާރިސާގެ މި ދަނޑިވަޅުގައި ދިވެހިން އެ ހިތާމައިގައި ބައިވެރިވާކަމަށް ވިދާޅުވެފައެވެ. އަދި އެ ޤައުމުގެ ރައީސް ރަޖަބް ތައްތިބް އުރުދުޣާންއަށް ހިތްވަރުގެ މެސެޖެއް ދެއްވާފައެވެ.
ތުރުކީގެ ރައީސް ރަޖަބް ތައްޔިބު އުރުދުޣާން ވަނީ މި ބިންހެލުމުގައި އެންމެ ބޮޑަށް ގެއްލުން ލިބުނު ޕްރޮވިންސްތަކުގެ ގަވަރުނަރުންނާ ފޯނުން ގުޅުއްވައި ޙާލަތު އޮޅުންފިލުއްވާފައެވެ.
