ޝެއިޚް އިމްރާން ބޮޑެތި ކުށްވެރިންނާ އެއްގޮޅިއެއްގައި ބަހައްޓަވާތީ މަހްލޫފް ކަންބޮޑުވުން ފާޅުކުރައްވައިފި

އަދާލަތު ޕާޓީގެ ރައީސް ޝެއިހް އިމްރާން އަބްދުﷲ ބަހައްޓާފައިިހުރީ "ޔޫ ޓޫ"ގައި ކަމަށާއި އެ ޔުނިޓަކީ މީހުން މެރުންފަދަ ބޮޑެތި ޖަރީމާތައް ހިންގާފައިވާ ގައިދީން ބައިތިއްބާފައި ތިބޭ ޔުނިޓްކަމަށް ވާއިރު ޝެއިހް އިމްރާން އެ ޔުނިޓްގައި ބެހެއްޓުމަކީ ކަންބޮޑުވެވަޑައިގަންނަވާ ކަމެއްކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް ވިދާޅުވެއްޖެ އެވެ.

މޯލްޑިވްސް ކަރެކްޝަނަލް ސާރވިސްގެ ދަށުން ހިނގަމުން އަންނަ މާލޭ ޖަލުގެ ކުރިމަތީގައި ހޮނިހިރު ދުވަހު ނޫސްވެރިންނަށް މައުލޫމާތު ދެއްވަމުން މަހްލޫފް ވިދާޅުވީ އެއީ ޝެއިހް އިމްރާނަށް އަނިޔާކުރުމުގެ ގޮތުން ކަރެކްޝަނުން ހިންގާފައިވާ އަމަލެއް ކަމަށެވެ. ކުރިން ސްޕެޝަލް ޕްރޮޓެކްޝަން ޔުނިޓްގައި ޝެއިހް އިމްރާން ބެހެއްޓި ނަމަވެސް މި ވަގުތު ބޮޑެތި ކުށްވެރިން ތިބޭ ގޮޅީގައި ޝެއިހް އިމްރާން ބަންދުކޮށްފައި ބަހައްޓާފައިވަނީ ގުޅިފައިވާ ސިޔާސީ ފަރާތްތަކުން ކުރަމުންދާ މަސައްކަތަށް ހުރަސްއެޅުމުގެ ނިޔަތުގައި ކަމަށް ވިޔަސް ގުޅިފައިވާ ސިޔާސީ ފަރާތްތަކުން ހިންގާ ހަރަކާތްތައް ފަހަތަށްނުޖެހި ކުރިއަށްދާނެ ކަމަށެވެ. ޝެއިހް އިމްރާން ސްޕެޝަލް ޕްރޮޓެކްޝަން ޔުނިޓަށް ބަދަލު ކުރުމަށް މަހްލޫފް ގޮވާލެއްވި އެވެ.

މަހްލޫފް ވަނީ ގައިދީންނާމެދު ކަރެކްޝަނުން އަމަލު ކުރަމުންދާ ގޮތާމެދުވެސް ކަންބޮޑުވުން ފާޅުކުރައްވާފަ އެވެ. މަހްލޫފް ވިދާޅުވީ ޖަލުގައި ތިބޭ ގައިދީންނަށް ޖަލުގައި ބަންދުކުރުން ފިޔަވާ އިތުރު އަނިޔާތައް ދިނުމަކީ ވަރަށް އާއްމުކަމެއް ކަމަށެވެ. އަދި ގައިދީންނަށް ދޭ ކެއުމާއި ބޭސްފަރުވާގެ ކަންކަމުގައި ކެރެކްޝަނުން އިހުމާލު ވަމުންދާ ކަމަށްވެސް މަހްލޫފް ވިދާޅުވި އެވެ.

މަހްލޫފް ވިދާޅުވީ ޖަލު ބަލަހައްޓާ ބައެއް އިސްވެރިންނާއި ކޮމިޝަނަރ އޮފް ޕްރިޒަންގެ އިހުމާލުން ގައިދީންގެ ގިނަ ހައްގުތަކެއް ގެއްލޭ ކަމަށާއި އެކަންކަން ރަނގަޅު ކުރުމަށް ގޮވާލާ ކަމަށާއި އަބަދަކު މަގާމުގައި ދެމި ނުހުންނެވޭނެ ކަމަށާއި ކޮންމެވެސް ދުވަހަކުން އެމައްސަލަތައް ބެލޭނެ ކަމަށް މަހްލޫފް ވިދާޅުވި އެވެ.

މަހްލޫފް ވަނީ ދާދި ފަހުން 10 މަހާއި 24 ދުވަހުގެ ޖަލު ހުކުމެއް ތަންފީޒުކޮށް ނިންމަވާފަ އެވެ. މަހްލޫފް ވަނީ ޖަލުގައި މަހްލޫފަށް ދިމާވި ގިނަ ކަންކަން ނޫސްވެރިންނަށް ހިއްސާކޮށްދެއްވާފަ އެވެ. އެގޮތުން މަހްލޫފް ހުކުރު ނަމާދަށް ދިއުމަށް އެދުމުން ކަރެކްޝަންސްގެ އޮފިސަރުން އެކަށް ހަމަޖައްސާދީފައި ނުވާކަމަށް މަހްލޫފް ވިދާޅުވި އެވެ. އެހެންކަމުން މަހްލޫފް ޖަލުގައި ހޭދަކުރެއްވި ދުވަސްތަކުގައި ހުކުރު ނަމާދަށް ވަޑައިގެންނެވިފައިނުވާކަމަށް މަހްލޫފް ވިދާޅުވި އެވެ.

މީގެއިތުރުން، މަހްލޫފް ވިދާޅުވީ ޖަލަށް މަސްތުވާތަކެތި އެތެރެކުރާ މީހުންގެ އަމަލުތަކުން ހުރިހާ ގައިދީންނަށް ބައެއް ހައްގުތައް ހިފަހެއްޓުމަކީ ގަބޫލް ކުރެވޭ ކަމެއް ނޫން ކަމަށެވެ.