ހަޅުތާލުކުރަމުން ދިޔަ ފަސް މެންބަރެއްގެ ނަން އިއްވެވުމަށްފަހު މަޖިލީހުން ނެެރެފި
ގަވާއިދާއި އެއްގޮތަށް އަމަލުކުރުމަށް ނަސޭހަތްތެރިވުމުން މެމްބަރުން އެކަމަށް އިޖާބަ އެއް ނުދެއްވާ
ހަޅުތާލުކުރަމުން ދިޔަ ފަސް މެންބަރެއްގެ ނަން އިއްވެވުމަށްފަހު މަޖިލީހުން ނެެރުން
ރައްޔިތުން މަޖިލިސް މި އަހަރަށް ހުޅުވުމަށާއި ރިޔާސީ ބަޔާން އިއްވެވުމަށްޓަކައި ބޭއްވި ޖަލްސާގައި އަޑުގަދަ ކުރެއްވި ފަސް މެންބަރެއްގެ ނަން އިއްވާ މަޖިލީހުން ބޭރުކޮށްފިއެވެ.
ހޯމަ ދުވަހު މަޖިލީހުގެ ރިޔާސީ ބަޔާން އިއްވެވުމަށް ތައްޔާރުވެފައި ވަނިކޮށް ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު ޝިޔާމް ވަނީ ކޮޅަށް ތެދުވެވަޑައިގެން ރައީސް އިބްރާހީމް މުހައްމަދު ޞާލިހުގެ އިސްތިއުފާ އަށް ގޮވާލައްވާ ހަޅުތާލުކުރައްވާފައެވެ. އެއާއެކު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ ޝިޔާމްގެ ނަން އިއްވަވާފައެވެ. އަދި މަޖިލީހުގެ ގަވާއިދާއި އެއްގޮތަށް އަމަލުކުރުމަށް ނަސޭހަތްތެރިވެވަޑައިގަތުމުން އެކަމަށް އިޖާބަ ނުދެއްވުމުން ރައީސް ނަޝީދު ވަނީ ޝިޔާމް މަޖިލީހުގެ ތަޅުން ދޫކުރައްވާ ވަޑައިގެންނެވުމަށް ވިދާޅުވެފައެެވެ. ހަމައެހްނެމެ ގަދަކަމުން މެންބަރުން ނެރެން ބޭނުންވެވަޑައިނުގަންނަވާނެ ކަމަށް ވެސް ރައީސް ނަޝީދު ވިދާޅުވިއެވެ.
އޭގެ ފަހުން ބައެއް އެެހެން މެންބަރުން ވެސް ވަނީ މަޖިލީހުގައި ކޮޅަށްތެދުވެވަޑައިގެން އިހުތިޖާޖްކުރައްވާފައެވެ. ރައީސް ނަޝީދު ވަނީ ހަޅުތާލުކުރަމުން ދިޔަ ފަސް މެންބަރެއްގެ ނަން އިއްވެވުމަށްފަހު އެ މެންބަރުން މަޖިލީހުން ނުކުންނެވުމަށް އަންގަވާފައެވެ. އަދި މަޖިލިސް މެދުކަނޑާލެއްވުމަށް ފަހު އަލުން ރިޔާސީ ބަޔާން އިއްވަވަން ފެއްޓެވުމުގެ ކުރިން އެ މެންބަރުން ވަނީ މަޖިލީހުން ނެރެފައެވެ. ނަން އިއްވާ މަޖިލީހުން ނެރުނު މެންބަރުންގެ ތެރޭގައި ހިމެނިވަޑައިގަންނަވަނީ ނައިފަރު ދާއިރާގެ މެންބަރު އަހްމަދު ސިޔާމު އާއި މާވަށު ދާއިރާގެ މެންބަރު މުހައްމަދު ސައީދު އާއި ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް އާއި ފެލިދޫ ދާއިރާގެ މެންބަރު އިބްރާހީމް ފަޒުލް ރަޝީދު އަދި މަހިބަދޫ ދާއިރާގެ މެންބަރު އަހުމަދު ތާރިގްއެވެ.
