ރައީސްގެ މޫނުފުޅަށް ކުޅުޖަހަން ބުނި މައްސަލަ ބަލަނީ
6 ފެބުރުއަރީ 2023 | ހޯމަ 02:19މުސްތަފާ ވަނީ ރައީސްގެ މޫނުފުޅަށް ކުޅު ޖެހި މީހަކަށް ބައިލައްކަ ރުފިޔާ ހުށަހަޅުއްވާފައި
ތިމަރަފުށި ދާއިރާގެ ކުރީގެ މެންބަރު މުޙައްމަދު މުސްތަފާ
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މޫނުފުޅަށް ކުޅު ޖަހާ މީހަކަށް ފައިސާގެ އިނާމު ދެއްވާނެ ކަމަށް ވިދާޅުވެ ރައްޔިތުންގެ މަޖިލީހުގެ ތިމަރަފުށީ ދާއިރާގެ ކުރީގެ މެންބަރު މުޙައްމަދު މުސްތަފާ ކުރެއްވި ޓްވީޓުގެ މައްސަލަ ފުލުހުން ބަލަން ފަށައިފިއެވެ.
ފުލުހުން ބުނެފައިވާ ގޮތުގައި "ތިމަރަފުށި" ނަމުގައި ބޭނުން ކުރަމުން އަންނަ ޓްވިޓަރ އެކައުންޓަކުން ކުރި ޓްވީޓެއްގެ މައްސަލަ ފުލުހުންގެ ސަމާލުކަމަށް ވަނީ އައިސްފައެވެ. އަދި އެ ޓްވީޓާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް ވެސް ފުލުހުން ވަނީ ބުނެފައެވެ.
ފުލުހުން ފާހަގަކޮށްފައިވާ އެކައުންޓު ނިސްބަތްވަނީ މުޙައްމަދު މުސްތަފާއަށެވެ. އޭނާ ކުރެއްވި ޓްވީޓުގައި ވަނީ ރައީސް ޞާލިހުގެ މޫނުފުޅަށް ކުޅު ޖެހި މީހަކަށް ބައި ލައްކަ ރުފިޔާގެ އިނާމެ ދެއްވާނެ ކަމަށް ވިދާޅުވެފައެވެ.
ފުލުހުން މި މައްސަލަ ބަލަމުން އަންނަ ކަމަށް ބުނެފައިވާއިރު، މުސްތަފާ ފަހުން ކުރެއްވި ޓްވީޓެއްގައި ވަނީ އަންގާރަ ދުވަހުގެ ރޭ 9:40 އަށް ފުލުހަށް ހާޒިރުވެވަޑައިގަންނަވަން އަންގަވާފައިވާ ކަމަށް ވިދާޅުވެފައެވެ.
މުސްތަފާ ގެންދަވަނީ މި ފަހުން ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ. އޭނާ ވެރިކަން ކުރާ މައި ޕާޓީ، އެމްޑީޕީގައި ހުންނެވި ނަމަވެސް ފާޅުގައި ރައީސް މަގާމުން ދުރުކުރުމަށް އޭނާ ދަނީ ގޮވާލައްވަމުންނެވެ.
މުސްތަފާގެ މި ޓްވީޓާ ގުޅިގެން ގިނަ ބަޔަކު ދަނީ އޭނާއަށް ފާޑުކިޔަމުންނެވެ. އެގޮތުން އެމްޑީޕީގެ ތަރުޖަމާނު އަނަސް އަބްދުލްސައްތާރު ކުރެއްވި ޓްވީޓެއްގައި ވިދާޅުވީ މުސްތަފާގެ އަމަލަކީ ވަރަށް ނާތަހުޒީބު އަދި ދަށު ދަރަޖައިގެ އަމަލެއް ކަމަށެވެ. އަދި ޚިޔާލުތަފާތުވުމުގެ ތެރެއިން މިފަދަ ދަރަޖައިގެ އަމަލުތައް ކުރުމަށް ގޮވާލައި، ހިތްވަރުދިނުމުގެ ގޮތުން ފައިސާގެ ބޮޑެތި އިނާމު ހުށަހެޅުން ކުށްވެރިކުރާ ކަމަށް ވެސް އަނަސް ވަނީ ވިދާޅުވެފައެވެ.
