އަނިޔާގެ ސަބަބުން އެމްބާޕޭ ކުޅުމާ ދުރަށް، ޕީއެސްޖީ އަށް ބޮޑު ނުތަނަވަސްކަމެއް

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ޒުވާން ކީލިއަން އެމްބާޕޭ އަނިޔާގެ ސަބަބުން ކުޅުމާ ދުރަށް ދާން ޖެހިއްޖެ އެވެ.

އެމްބާޕޭ އަށް އަނިޔާވެފައި ވަނީ ފްރާންސް ލީގުގައި ޕީއެސްޖީން އެންމެ ފަހުން މޮންޓްޕެލިއޭއާ ދެކޮޅަށް ކުޅުނު މެޗުގަ އެވެ. އެ މެޗުގައި އެމްބާޕޭ އަށް ލިބުނު އަނިޔާގެ ސަބަބުން އޭނާ ވަނީ ބަދަލު ވެސް ކޮށްފަ އެވެ. އަނިޔާ އަށް ފަހު ޕީއެސްޖީން ކުރިއަށްގެންދިޔަ މެޑިކަލް ޓެސްޓުތަކަށްފަހު ބުނީ އެމްބާޕޭ ކުޅުމާ ދުރުގައި ތިން ހަފްތާ ވަންދެން ހުންނަން ޖެހޭނެ ކަމަށެވެ. އެމްބާޕޭ އަށް ލިބުނީ ފައިގެ ކުޑަކަޅުވާ މަސްގަނޑުގެ އަނިޔާއެއް ކަމަށް މެޑިކަލް ރިޕޯޓުތަކާ ހަވާލާދީ ބޭރުގެ މީޑިއާތަކުގައި ވަނީ ބުނެފަ އެވެ. އަނިޔާގެ ސަބަބުން މަސްގަނޑުގެ ޓިޝޫތަކަށް ގެއްލުން ލިބިފައިވާ ކަމަށް ވެސް ރިޕޯޓުތައް ބުނެ އެވެ.

ތިން ހަފްތާ އަށް އެމްބާޕޭ ކުޅުމާ ދުރަށް ދާން ޖެހުމަކީ ޕީއެސްޖީ އަށް ލިބޭނެ ވަރަށް ބޮޑު ކަންބޮޑުވުމެކެވެ. ޚާއްސަކޮށް އޭނާ ރަނގަޅު ފޯމެއްގައި ހުއްޓާ އަނިޔާވުމުންނެވެ. މީގެ އިތުރުން ޕީއެސްޖީ އަށް ކުރިއަށް އޮތީ މުހިންމު މެޗުތަކަކެވެ. އަނިޔާގެ ސަބަބުން އެމްބާޕޭ އަށް ޔުއެފާ ޗެމްޕިއަންސް ލީގުގެ ގަދަ 16 ގައި ޕީއެސްޖީން ޖަރުމަނުގެ ބަޔާން މިއުނިކާ ދެކޮޅަށް ކުޅޭ މެޗު ވެސް ގެއްލޭނެ އެވެ. ގަދަ 16 ގެ ފުރަތަމަ ލެގުގައި ޕީއެސްޖީން ބަޔާނާ ދެކޮޅަށް ނުކުންނާނީ މި މަހުގެ 15 ވަނަ ދުވަހު އެ ޓީމުގެ އަމިއްލަ ދަނޑުގަ އެވެ. މީގެ އިތުރުން އެމްބާޕޭ އަށް ގެއްލޭނެ ކަމަށް ބެލެވޭ މެޗުތަކުގެ ތެރޭގައި ފްރެންޗް ކަޕްގައި ޕީއެސްޖީން ވާދަވެރި މާސޭއާ ދެކޮޅަށް ކުޅޭ މެޗު ވެސް ހިމެނެ އެވެ. އަދި ފްރާންސް ލީގުގައި މޮނާކޯ، ލީލް، މާސޭއާ ދެކޮޅަށް ކުޅޭ މެޗު ވެސް އެމްބާޕޭ އަށް ގެއްލޭނެ ކަމަށް ބެލެވެ އެވެ.

އަނިޔާވެ ކުޅުމާ ދުރަށް ދާން ޖެހުނުއިރު އެމްބާޕޭ އައީ މި ސީޒަންގައި މޮޅު ކުޅުމެއް ވެސް ދައްކަމުންނެވެ. ސީޒަންގެ މިހާތަނަށް ޕީއެސްޖީ އަށް ކުޅެދިން 26 މެޗުގައި އޭނާ ވަނީ 25 ލަނޑު ވެސް ޖަހައިފަ އެވެ. މީގެ އިތުރުން ފްރާންސް ލީގުގެ އެންމެ ގިނަ ލަނޑު ޖެހި ކުޅުންތެރިންގެ ލިސްޓުގެ ދެ ވަނައިގައި އޮތީ ވެސް އެމްބާޕޭ އެވެ.