ބެންފީކާ އަށް ކުޅެމުން އައި އާޖެންޓީނާގެ ޒުވާން ކުޅުންތެރިޔާ އެންޒޯ ފެނާންނޭޒް، އެންމެ ފަހު ވަގުތު ޗެލްސީ އަށް ބަދަލުވެއްޖެ އެވެ.

މިދިޔަ އަހަރު ޤަތަރުގައި ނިމުނު ފީފާ ވޯލްޑް ކަޕްގައި މޮޅު ކުޅުމެއް ދައްކައި، މުބާރާތުގެ އެންމެ މޮޅު ޒުވާން ކުޅުންތެރިޔާގެ މަގާމު ހޯދި އެންޒޯ ހޯދުމަށް ޗެލްސީން ފުރަތަމަ މަސައްކަތް ފެށި ނަމަވެސް، ބެންފީކާ އިން އެކަމާ އެއްބަސްނުވީ އެވެ. ބެންފީކާގެ ކޯޗު ވެސް އެ ޓީމުން އެންޒޯ ދޫކޮށްލަން ބޭނުންނުވާކަން ހާމަކޮށްފަ އެވެ. ނަމަވެސް ޓްރާންސްފާގެ އެންމެ ފަހު ވަގުތު ޗެލްސީން ވަނީ އެންޒޯ ހޯދައިފަ އެވެ. އެންޒޯ ހޯދުމަށް ޗެލްސީން ބެންފީކާ އަށް 130 މިލިއަން ޑޮލަރު ދައްކާނެ ކަމަށް ބޭރުގެ މީޑިއާ ރިޕޯޓުތައް ބުނެ އެވެ.

ބެންފީކާ ދޫކޮށް އެންޒޯ ޗެލްސީ އަށް ބަދަލުވީ ދިގު މުއްދަތަކަށެވެ. އެ ކުލަބާއެކު އޭނާ ހަދާފައި ވަނީ ހަތް އަހަރު ދުވަހުގެ އެއްބަސްވުމެއް ކަމަށް ވެސް ރިޕޯޓުތައް ބުނެ އެވެ. ޗެލްސީއާއެކު އެންޒޯ ހަދާފައިވާ އެއްބަސްވުމުގެ މުއްދަތު ހަމަވާނީ 2031 ވަނަ އަހަރާ ހަމައަށެވެ. މިއީ ޖެނުއަރީ ޓްރާންސްފާ މާކެޓުގައި ޗެލްސީ އެ ކުލަބަށް ގެނައި އަށް ވަނަ ކުޅުންތެރިޔާ އެވެ. ޗެލްސީގެ އައު އޯނަރު ޓޮޑް ބޯލީ އަންނަނީ ކުލަބަށް ކުޅުންތެރިން ހޯދުމުގައި ގިނަ ހޭދަތަކެއް ކުރަމުންނެވެ. އެގޮތުން އޭނާ ހަވާލުވި ފަހުން ޗެލްސީން ވަނީ ކުޅުންތެރިން ހޯދުމަށް 600 މިލިއަން ޑޮލަރަށްވުރެ ބޮޑު އަދަދެއް ހޭދަކޮށްފައި ކަމަށް ވެސް ރިޕޯޓުތައް ބުނެ އެވެ.

އެންޒޯ ވަނީ އޭނާ ބެންފީކާ އަށް ކުޅެދިން 29 މެޗުގައި ހަތަރު ލަނޑު ޖަހައިފަ އެވެ.