ވޯޓްލާ ލިސްޓުގައިވާ މީހުންގެ އަދަދަށްވުރެ އިތުރަށް މީހުން ވޯޓްލީކަމަށް ކުރެވޭ ތުހުމަތަށް އެމްޑީޕީގެ ޗެއާރޕަރސަންގެ ނައިބު އަދި ޝަކުވާ ބަލާ ކޮމިޓީގެ މުގައްރިރު އިބްރާހީމް ވަހީދު (އިބުރޭ) ރައްދު ދެއްވައިފިއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި އިބްރާހީމް ވަހީދު ވިދާޅުވީ، އެއްވެސް މީހަކު އިތުރަށް ވޯޓް ނުލާކަމަށެވެ. އަދި ޕާޓީގެ ތެރޭގައި، ވޯޓްލާ މީހުން ރީ-ރަޖިސްޓްރީ ކުރުމުގެ އުސޫލު ޕާޓީގައި ނޯންނަ ކަމަށެވެ.
އެތެރޭގެ އިންތިޚާބުގައި ވޯޓުލާ މީހާ ރީ-ރަޖިސްޓްރީކުރުން (ނުވަތަ ވޯޓުލާ ދުވަހު އެ މީހަކު ހުންނަ ރަށެއްގައި ވޯޓުލުމަށް ރަޖިސްޓްރީ ކުރުން) ނޯންނަ ކަމަށެވެ. އޭގެތެރެއިން މާލޭގައި ތިބޭ މީހުންނާއި ރަށުގައި ތިބޭ މީހުން ވަކިކުރަން ނޭނގޭކަމަށް އިބްރާހީމް ވަހީދު ވިދާޅުވިއެވެ.
މީގެކުރީގެ އިންތިޚާބުތަކުގައި މާލެއާއި ރަށުގައި އެންމެންނަށް ވޯޓް ލެވޭވަރަށް ކަރުދާސް ބަހައްޓާ ކަމަށެވެ. އެހެންނަމަވެސް އެއީ އެންމެ ރަނގަޅު ގޮތް ނޫންކަން ވިސްނުނުކަމަށާއި ވޯޓް ކަރުދާހަކީ މެމްބަރުންނަށްވުރެ އިތުރަށް ޕްރިންޓް ކުރެވޭނެ އެއްޗެއް ނޫންކަމަށް އިބްރާހީމް ވަހީދު ވިދާޅުވިއެވެ. އެހެންކަމުން ވޯޓް ކަރުދާސް ޕްރިންޓް ކުރީ މިފަހަރު 57،255 މެމްބަރުންނަށް ހަމަވާވަރަށް ކަން އޭނާ ފާހަގަކުރެއްވިއެވެ.
އަޅުގަނޑުމެން ބެލީ އެންމެފަހުން ޕާޓީން ބޭއްވި ޗެއާރޕަރސަން އިންތިޚާބުގަ، މިވަގުތު ތިބި މެމްބަރުންގެ ތެރެއިން ރަށްރަށަށް ވޯޓްލީ ކޮންބައެއްތޯ، މާލެއަށް ވޯޓްލީ ކޮން ބައެއްތޯ. ދެން ބެލީ އެންމެފަހުން 2021 ވަނަ އަހަރުގެ ލޯކަލް ކައުންސިލް އިންތިޚާބު (އެ ކައުންސިލް އިންތިޚާބުގަ ހުރިހާ ސިޔާސީ ޕާޓީތަކަށް އީސީން އެންމެފަހުން އާންމުކުރާ ވޯޓަރސް ރަޖިސްޓްރީ ފޮށީގެ ނަންބަރާއެކު އެކްސެލް ޝީޓެއްދީފަ އޮވޭ) އެ ޝީޓުން ވަރަށް ފަސޭހައިން ބެލޭ އަޅުގަނޑުމެންގެ މެމްބަރުންގެ ތެރޭން މާލެއަށް ވޯޓްލުމަށް ރަޖިސްޓްރީ ވި މީހުން. އޭތި ބަލައިގެން އަންދާޒާކުރީ މާލެއަށް ވޯޓްލާ އަދަދު. ދެން އެހެން ތަންތަނަށް ކުރިން ވޯޓްލީ މީހުން ބަލާފަ އެމީހުންގެ ވޯޓް ކަރުދާސްވެސް ފޮނުވީ އެމީހުން ކުރިން ވޯޓްލީ ރަށަށް.އިބްރާހީމް ވަހީދު
މާލޭގައި ބެހެއްޓި ވޯޓް ފޮއްޓަކަށް 117 މީހުންނަށް ވޯޓްލުމުގެ ހައްގު ލިބިފައިވާއިރު، 200ށްވުރެ ގިނަ މީހުން ވޯޓްލައިގެން އުޅޭ މައްސަލައެއް ފެންމަތިވިކަން ފާހަގަކުރައްވައި އިބްރާހިމް ވަހީދު ވިދާޅުވީ، އެ ފޮށީގައި 847 މީހުންގެ ނަން އޮތް މެންބަރުންގެ ލިސްޓެއް އެބައޮތް ކަމަށާއި، އެއީ ރަށުގައި ތިބި މީހުންވެސް ހިމަނައިގެން ކަމަށެވެ. މިއީ މައްސަލައެއް ކަމަށާއި އަދި ކަންބޮޑުވާން ޖެހޭ ކަމެއް ކަމަށް އޭނާ ވިދާޅުވިއެވެ.
އެމީހުންގެ ތެރެއިން މާލެއަށް ވޯޓްލާނީ 117 މީހުންކަމަށް އެއީ ކުރި އަންދާޒާއެއް ކަމަށާއި، އެފޮއްޓަށް ފަހުން ފޮނުވި ވޯޓް ކަރުދާސްތަކަކީ ދެ ކެންޑިޑޭޓުންގެ މަންދޫބުންގެ ހާޒިރުގައި ފޮނުވި ކަރުދާސް ކަމަށްވެސް ވިދާޅުވިއެވެ. އަދި އެއީ ރަށްރަށުގެ ވޯޓް ކަރުދާހުން ކަރުދާސް އުނިކުރުމަށްފަހު މާލެއަށް ފޮނުވި ކަރުދާސްތަކެއް ކަމަށް ވިދާޅުވިއެވެ.
ރަށްރަށުން ވޯޓްލާނެ ކަމަށް އަންދާޒާކުރި މީހުންނަށްވުރެ މާލެއަށް ވޯޓްލީ މީހުންގެ އަދަދު އިތުރުވީ. ގިނަވީމަ އޭގެ މާނައަކީ ރަށަށް ވޯޓްލީ މީހުން މަދުވާނެ. ރީ-ރަޖިސްޓްރޭޝަންގެ ޕްރޮސެސް ނެތިއްޔާ މި މައްސަލަ ހަމަ ދިވާމާނެ. އެއަށް ހައްލު ގެންނަންޖެހޭ ކަމަށް ގަބޫލުކުރަން.އިބްރާހީމް ވަހީދު
އެއްވެސް ހާލެއްގައި ޑަބަލްވޯޓިންގ ލައިގެން ނޫޅޭކަމަށާއި، ޕާޓީގެ ވެބްސައިޓުންވެސް މިހާރު ވަކިވަކިން އެ މައުލޫމާތު ފެންނާނެ ކަމަށް ވިދާޅުވިއެވެ.
