އެތެރޭގެ ޕްރައިމަރީއެއް ނަމަވެސް، މިކަމުގައި އެތަކެއް ކުލަތަކެއް އެބަޖެހޭ – ރައީސް
ތިމާ ފާޅުކުރާ ޚިޔާލެއްގެ ނުވަތަ އުފުލާ އަޑެއްގެ ނަތީޖާއަކީ، ޖެހިގެން ހުންނަ މީހާގެ ކަންފަތު ތޫރި ފޫއަޅުވާލާ އެއްޗެއްގެ ގޮތުގައި ވެގެން ނުވާނެ
ރައީސް ސާލިހް ކެމްޕޭނަށް ވަޑައިގެން އއ. މާޅޮހުގައި ވާހަކަފުޅުދައްކަވަނީ
މިއީ އެމްޑީޕީގެ އެތެރޭގެ ޕްރައިމަރިއެއް ކަމަށާއި، ނަމަވެސް މި ޕްރައިމަރީގައި އެތަކެއް ކުލަތަކެއް ޖެހެމުންދާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވިދާޅުވެއްޖެއެވެ.
އެމްޑިޕީގެ ރިޔާސީ ޕްރައިމަރީގެ ކެމްޕޭނަށް އއ. މާޅޮހަށް ވަޑައިގެން އެމްޑީޕީގެ މެންބަރުންނާ ބައްދަލުކުރައްވައި ވާހަކަފުޅުދައްކަވަމުން ރައީސް ވިދާޅުވީ، މި ޕްރައިމަރީގައި އައިސް މިތިއްބެވެނީ ނިމުމުގެ މަގުމަތީގައި ކަމަށެވެ. އަދި ބާކީ އޮތީ ކެމްޕޭންކުރަން 4 ދުވަސް ކަމަށާއި، މިހާތަނަށް އައިއިރު (މިއީ އެތެރޭގެ ޕްރައިމަރީއެއް ނަމަވެސް) މީގެ ތެރޭގައި އެހެން ކުލަތައް އެބަޖެހޭ ކަމަށެވެ.
ރައީސް ވިދާޅުވީ، ކުރިއަށް އޮތް ރިޔާސީ އިންތިޚާބުގައި ކިރިޔާވެސް އެބޭފުޅުންނަށް (އިދިކޮޅަށް) ވާދަކޮށްލެއްވެން އޮތީވެސް މީގެ ތެރެއަށް ވަދެވަޑައިގެން، މި ގަޑުބަޑުކުރައްވައިގެން ކަމަށް ފެންނާތީ އެބޭފުޅުން ނުކުމެ ތިބިކަމަށެވެ. ނަމަވެސް އެމަނިކުފާނުގެ ޓީމުން ތިއްބެވީ ވަރަށް ރަނގަޅު ޑިމޮކްރަޓިކް ނަމޫނާއެއް ދައްކަވައިގެން ކަމަށާއި، އެމްޑީޕީއަކީ ޑިމޮކްރަޓިކް ޕާޓީއެއް ކަމަށެވެ.
އަދި ޕާޓީ އެތެރޭގައި ހިންގާ ޕްރައިމަރީތައް ވާދަވެރިވާނެ ކަމަށާއި، މިހާތަނަށްވެސް އެކަންކޮށްފައި އޮތީ އެގޮތަށް ކަމަށް ރައީސް ވިދާޅުވިއެވެ. އަދި ގެންދަވަނީ ނަމޫނާ ދައްކަވަމުން ކަމަށާއި، މި ޕްރައިމަރީވެސް ރާއްޖެއާއި ސިޔާސީ ޕާޓީތަކަށްވެސް ނަމޫނާއަކަށް ވެގެންދާނެކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ، އިދިކޮޅަށް މިކަންކަން ގަބޫލެއް ނުކުރެވޭނެކަމަށެވެ. އެހެންކަމުން މަތިވެރީ ދާއިރާއިން 28 ޖެނުއަރީގައި ލާ ވޯޓުގައި މިކަމާދޭތެރޭގައި ވިސްނަންވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ، ޚިޔާލު ފާޅުކުރުމާއި، ޝުއޫރު ފާޅުކުރުމާއި އެއްވެ އުޅުމަކީ މި ސަރުކާރު ވެރިކަމަށް އައިއިރު ބޮޑު ބިރެއްގެ ގޮތުގައި އޮތްކަމެއް ކަމަށެވެ. އެހެންނަމަވެސް 2018 ވަނަ އަހަރު ސަރުކާރު ވެރިކަމަށް އައުމަށްފަހު އެއްވެސް ހުރަހެއް ނެތި ޚިޔާލު ފާޅުކުރުމުގެ މިނިވަންކަމާއި، ނޫސްވެރިކަމުގެ މިނިވަންކަމާއި އެއްވެ އުޅުމުގެ މިނިވަންކަން ދެއްވިކަމަށެވެ.
ރައީސް ވިދާޅުވީ ޚިޔާލު ފާޅުކޮށް، އަޑުއުފުލައި، ކުރިއަށްގެންދަންވީ ކަމަށެވެ. އެ ވާހަކަތައް އަޑުއައްސަވަން ކެރިވަޑައިގަންނަވާނެ ކަމަށާއި، އެކަންކަން ހުއްޓުވަން ނޫޅުއްވާނެ ކަމަށެވެ. އެހެން މީހުން ހަރަކާތް ހިންގުމަށް ފުރުސަތު ދޭންވާނެކަމަށް ރައީސް ވިދާޅުވިއެވެ.
މަތިވެރި ދާއިރާގައި ހިމެނޭ ރަށްތަކަށް މި ވޭތުވެދިޔަ 4 އަހަރު ތެރޭގައި 202 މިލިއަން ޚަރަދު ކުރެވިއްޖެކަމަށް ރައީސް ވިދާޅުވިއެވެ. ރައްޔިތުން ފަތްފުއްތައް ހުޅުވައި ބެލުމުން، ކުރިއާ މިހާރާ ހުރި ތަފާތު ވަރަށް ސާފުކޮށް ފެންނާނެ ކަމަށާއި، މިއީ އެ ދާއިރާއަށް މި ސަރުކާރުން ވޭތުވެދިޔަ 4 އަހަރު ދުވަހުގެ ތެރޭގައި ކުރެވިފައިހުރި މަސައްކަތްތައް ކަމަށް ރައީސް ވިދާޅުވިއެވެ.
ރައީސް ވިދާޅުވީ، މަތިވެރި ދާއިރާގެ ރައްޔިތުން އެކަން ބަލައިގެންފި ކަމަށާއި، ބޭނުންވަނީވެސް މި މަޝްރޫއުތަކައިގެން ކުރިއަށް ވަޑައިގަންނަވަން ކަމަށެވެ. އަދި އެކަން ކުރެވެން އޮތް ގޮތަކީ ކޮބައިކަންވެސް އެ ދާއިރާގެ ރައްޔިތުން ގަބޫލުކުރާނެ ކަމަށާއި، އެއީ ވެރިކަމަށް އާދެވޭނެ ގޮތަކީ ކޮބައިކަން އެނގިތިބެ، އެއަށް ނޫނެކޭ ނުބުނެ، މި މަސައްކަތައިގެން ކުރިއަށް ދިއުންކަމަށް ރައީސް ވިދާޅުވިއެވެ.
ރައީސް ވިދާޅުވީ، އިރާދަކުރެއްވިއްޔާ ރާއްޖޭގެ އެކި ކަންކޮޅުތަކުން މި ފެންނަ މަންޒަރާއެކު މި ޕްރައިމަރީ ބޮޑު ތަފާތަކުން ކާމިޔާބުކުރައްވާއިރު، މަތިވެރި ދާއިރާގެ ހިއްސާ ބޮޑުކޮށް އޮންނާނެކަމާމެދު އެމަނިކުފާނު ޝައްކު ނުކުރައްވާ ކަމަށެވެ.
