ހިޔާލު ތަފާތުވުމާއި ފިކުރު ތަފާތުވުމުގެ ތެރެއިންވެސް ރައްޔިތުން ގޮވައިގެން އުޅެން އެނގޭނެ ލީޑަރަކީ ރައީސް ސާލިޙު: މެންބަރު ޒަރީރު
މި ސަރުކާރުން ހޯދިފައިވާ ބައެއް ކާމިޔާބީތަކަށްވެސް އަލިއަޅުވާލައްވާފައިވޭ
މަތިވެރި ދާއިރާގެ މެންބަރު ހަސަން ޒަރީރު
ހިޔާލު ތަފާތުވުމާއި ފިކުރު ތަފާތުވުމުގެ ތެރެއިންވެސް ރައްޔިތުން ގޮވައިގެން އުޅެން އެނގޭނެ ލީޑަރަކީ ރައީސް އިބްރާހިމް މުޙައްމަދު ސާލިޙު ކަމަށް މަތިވެރި ދާއިރާގެ މެންބަރު ހަސަން ޒަރީރު ވިދާޅުވެއްޖެއެވެ.
އަންގާރަ ދުވަހު އއ މާޅޮހުގައި ބޭއްވި ކެމްޕޭނު ޖަލްސާގައި ވާހަކަ ދައްކަވަމުން ޒަރީރު ވިދާޅުވީ، ރާއްޖޭގެ ތާރީޚުގައިވެސް ވެރިކަމުގެ ހަތަރު އަހަރުގެ ތެރޭގައި އެންމެ ގިނަ މަޝްރޫއުތައް ރަށްފުށަށް އަމާޒުކޮށް ހިންގާފައިވަނީ އަދި ހިންގަމުން ގެންދަނީވެސް މި ސަރުކާރުން ކަމަށެވެ.
ޒަރީރު ވަނީ މި ސަރުކާރުން ހޯދިފައިވާ ބައެއް ކާމިޔާބީތަކަށްވެސް އަލިއަޅުވާލައްވާފައެވެ.
އެމްޑީޕީ ޕްރައިމަރީގައި ދެ ކެނޑިޑޭޓަކު ވާދަ ކުރައްވާއިރު، ކުރިއަށް ދެވެން އޮތީ ކޮން ގޮތަކުންތޯ ބަލަން އެބަޖެހޭ ކަމަށް އޭނާ ވިދާޅުވިއެވެ. އެކަން ކޮށްދެވޭނީ ރައީސް އިބްރާހިމް މުޙައްމަދު ސާލިޙަށްކަމަށް ޒަރީރު ވިދާޅުވިއެވެ.
ޒަރީރު ވަނީ ރައީސް ސާލިޙަށް ދެވަނަ ދައުރެއް ދޭންވީ ސަބަބުތަކަށްވެސް އަލިއަޅުވާލައްވާފައެވެ. އެގޮތުން ސަބަބުތައް ބައިވަރުކަން ފާހަގަކުރައްވައި ޒަރީރު ވަނީ، ކޮވިޑުގެ ދަތި ޙާލަތުން ރާއްޖެ އަރައިގަތް ގޮތާއި ގުޅޭގޮތުން ވާހަކަ ދައްކަވާފައެވެ.
އޭރު ސަރުކާރުން އަޅަމުންދިޔަ ފިޔަވަޅުތަކުގެ ސަބަބުން ކުދި އަދި މެދުފަންތީގެ ވިޔަފާރިތަކަށްވެސް ކޮޅަށް ޖެހުމަށް ފުރުސަތު ފަހިވެގެން ދިޔަކަމަށް ޒަރީރު ވިދާޅުވިއެވެ.
މި ވެރިކަމުގައި ރަށްރަށަށް ގެންނަމުންދާ ތަރައްޤީއަށްވެސް ޒަރީރުގެ ވާހަކައިގައި ވަނީ އަލިއަޅުވާލައްވާފައެވެ.
އޭގެ އިތުރުން، ހިޔާލު ތަފާތުވުމާއި ފިކުރު ތަފާތުވުމުގެ ތެރެއިންވެސް ރައްޔިތުން ގޮވައިގެން އުޅެން އެނގޭނެ ލީޑަރަކީ ރައީސް ސާލިޙުކަމަށްވެސް އޭނާ ވިދާޅުވިއެވެ. މި އިންތިޚާބުގައި ބޮޑު ތަފަތަކުން ރައީސް ސާލިޙު ކާމިޔާބު ކުރެއްވުމަކީ އެންމެންގެވެސް އުއްމީދުކަމަށް ޒަރީރު ވިދާޅުވިއެވެ.
