ޓެކްނޮލޮޖީގެ ދާއިރާއިން މި 4 އަހަރުގެ ތެރޭގައި ވަރަށް ބޮޑު ކާމިޔާބީތަކެއް ވަނީ ހާސިލްކޮށްފައި: ޝާތިރު
މި ހަތަރު އަހަރު ތެރޭގައި ހާސިލްކުރި ކާމިޔާބީތަކުގެ ތެރޭގައި، ރައްޔިތުންނާ ވަރަށް ބޮޑަށް ގުޅިފައިވާ ޚިދުމަތްތައް ހުރިކަމަށް އޭނާ ވިދާޅުވި
ޝާތިރު
ޓެކްނޮލޮޖީ ދާއިރާއިން މި ހަތަރު އަހަރުގެ ތެރޭގައި ވަރަށް ބޮޑު ކާމިޔާބީތަކެއް ހާސިލްކޮށްފައިވާ ކަމަށް މިނިސްޓަރ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލޮޖީގެ ޑެޕިއުޓީ މިނިސްޓަރ މުހައްމަދު ޝާތިރު ވިދާޅުވެއްޖެއެވެ.
ޝާތިރު މިފަދައިން ވިދާޅުވީ، ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަފުޅުދައްކަވަމުންނެވެ. މި ހަތަރު އަހަރުގެ ތެރޭގައި ހާސިލްކުރި ކާމިޔާބީތަކުގެ ތެރޭގައި ރައްޔިތުންނާ ވަރަށް ބޮޑަށް ގުޅިފައިވާ ޚިދުމަތްތައް ހުރިކަމަށް އޭނާ ވިދާޅުވިއެވެ. އެގޮތުން ޝާތިރު ވިދާޅުވީ، ސަރުކާރުން ފެށި އީގަވަރމެންޓްގެ މަސައްކަތަކީ މުހިންމު މަސައްކަތެއް ކަމަށެވެ. މީގެތެރޭގައި އޮފީސްތައް ހިންގުމަށް އެހީތެރިވާނެ ގިނަ ބަދަލުތައް ހިމެނޭކަމަށާއި، އެފަދަ ވާހަަކަތަކަކީ ގިނަ ފަހަރު ނުދެކެވި ހުންނަ ވާހަކަތައް ކަމަށްވެސް އޭނާ ވިދާޅުވިއެވެ.
އޭނާ ވިދާޅުވީ، ކޮވިޑްގެ ދަތިކަމާއެކުވެސް އީގަވަރމެންޓްގެ ވަސީލަތްތައް ކުރިއަރުވަން ވަރަށް ބޮޑަށް މަސައްކަތްކުރި ކަމަށެވެ. އެގޮތުން، ކޮންމެ ގަޑިއެއްގައިވެސް ސަރުކާރުގެ އިދާރާތަކަށް ސިޓީއާއި ލިޔުންތައް ފޮނުވޭނެކަމަށާއި، އެއީ ރައްޔިތުންނަށް ލިބުނު ވަރަށް ބޮޑު ފަސޭހައެއް ކަމަށެވެ. އަދި މިހަރު އެންމެ ބޮޑަށް ކުރަމުންދާ މަސައްކަތަކީ ޑިޖިޓަލް އައިޑެންޓިޓީގެ މަސައްކަތްކަން އޭނާ ވަނީ ފާހަގަކުރައްވާފައެވެ. އެގޮތުން ޑިޖިޓަލް ކާޑު ތައާރަފުވުމުން، ލައިސަންސެއް ނަގައިފިނަމަ ލައިންސަންސް ވެސް ކާޑުގެ ތެރެއަށް އިތުރުކުރެވޭނެކަމަށް އޭނާ ވިދާޅުވިއެވެ.
