ތޮއްޑޫއިން އިތުރު 100 ގޯތި މިއަހަރު ދޫކުރާނެ: ރައީސް
އާބާދީއަށް ނުބަލައި ދިވެހި ރައްޔިތުން ދިރިއުޅޭ ހުރިހާ ރަށެއް ވެސް ތަރައްގީ ކުރާނެ
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ތޮއްޑޫގައި
މިއަހަރު ތެރޭގައި އއ. ތޮއްޑޫއިން އިތުރު 100 ގޯތި ދޫކުރަން އިއުލާން ކުރާނެ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ އެމްޑީޕީގެ ރިޔާސީ ޕްރައިމަރީ ކެމްޕޭނުގައި ތޮއްޑޫއަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައެވެ. އެގޮތުން، މި ސަރުކާރުން އާބާދީއަށް ނުބަލައި ދިވެހި ރައްޔިތުން ދިރިއުޅޭ ހުރިހާ ރަށެއް ވެސް ތަރައްގީ ކުރުމަށް މަސައްކަތް ކުރާނެ ކަމުގެ ޔަގީންކަން ރައީސް ދެއްވިއެވެ.
ރައީސް ވިދާޅުވީ ރަށްރަށުގައި ބަނދަރު ހެދުމާއި ފެނާއި ނަރުދަމާގެ މަސައްކަތަކީ ބައެއް ފަރާތްތަކުން ގަބޫލު ކުރާ ގޮތުގައި ބޭކާރު ހަރަދުތައް ކަމަށެވެ. ނަމަވެސް އެއީ ގާނޫނުން ސަރުކާރަށް ލާޒިމް ކުރާ ކަންކަން ކަމަށާއި އެފަދަ މަޝްރޫއުތައް ހިންގުމުން ރައްޔިތުންނަށް ވެސް ހިތްހަމަޖެހުން ލިބި އެހެން ކަންކަމާ ވިސްނާ ފިކުރު ކުރުމަށް ފުރުސތު ލިބިގެންދާނެ ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވި ގޮތުގައި މި ދައުރު ނިމޭއިރު އެމަނިކުފާނުގެ ވައުދުފުޅާ އެއްގޮތަށް ފެނާއި ނަރުދަމާގެ ޚިދުމަތް ނުލިބޭ އެއްވެސް ރަށެއް ނޯންނާނެއެވެ. މި މަޝްރޫއުތަކުގެ ސަބަބުން ވަކި ވަކި ފަރުދުންނަށް ވެސް ފައިދާވާނެ ކަން ރައީސް ފާހަގަކުރެއްވިއެވެ.
ތޮއްޑޫގައި ދިމާވެފައިވާ ބޯހިޔާވަހިކަމުގެ މައްސަލައާ ގުޅޭގޮތުން ވާހަކަދައްކަވަމުން ރައީސް ވިދާޅުވީ އެ ރަށުން މިހާރު ވެސް 100 ގޯތި ދޫކުރަން އިއުލާން ކޮށްފައިވާއިރު އެއަށްވުރެ ގިނަ ފަރާތްތަކުން އެ ގޯތިތަކަށް ކުރިމަތިލާފައިވާ ކަމަށެވެ. އެހެންކަމުން މިހާރު ދޫކުރަން ނިންމާފައިވާ 100 ގޯތި ދޫކުރުމަށްފަހު މިއަހަރު ތެރޭގައި އިތުރު 100 ގޯތި ދޫކުރާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނުގެ ސަރުކާރުން ރަށްރަށުގައި ކަންކަން ކުރަމުން އަންނަނީ ރަށްތަކުގެ ރައްޔިތުންނާއި ކައުންސިލްތަކުގެ އަޑު އަޑުއަހައިގެން ކަމަށެވެ. އަދި ތޮއްޑޫ ދާއިރާގެ މެމްބަރު އެމަނިކުފާނާއެކު ނެތް ނަމަވެސް އެ ދާއިރާ ބާކީ ނުކުރައްވާނެ ކަމަށާއި ހުރިހާ ރަށަކަށް ވެސް ހަމަހަމަކަމާއެކު ތަރައްގީ ގެންނަވާނެ ކަމުގެ ޔަގީންކަން އެމަނިކުފާނު ދެއްވިއެވެ.
ރައީސް ވިދާޅުވި ގޮތުގައި މި ސަރުކާރުން މަޝްރޫއުތައް ހިންގަނީ ރޭވުންތެރިކަމާއެކުގައެވެ. އެގޮތުން، މިހާތަނަށް ނިމިފައި ހުރި މަޝްރޫއުތަކުގެ ރިބަން ކަނޑަން ޖެހިއްޖެ ނަމަ ދައުރުގެ ބާކީ އޮތް ކޮންމެ ދުވަހެއް ހޭދަ ކުރައްވަން ޖެހޭނީ އެކަމުގައި ކަމަށް ރައީސް ވިދާޅުވިއެވެ.
