ވަކި މަގްސަދެއް ހާސިލްކުރަން ގުރުބާންވީ މީހުންނާއި ދިމާލަށް ބޭނުން އެއްޗެއް ކިއުމަކީ ޕާޓީއަށް ފައިދާހުރި ގޮތެއް ނޫން - ރައީސް
ޕާޓީ އުފައްދަން ދެވަނައަށް ސޮއިކުރި މީހަކީ އަޅުގަނޑު
ކެމްޕޭނަށް ވިލިނގިއްޔަށް ވަޑައިގެން ރައީސް އެމްޑީޕީގެ މެންބަރުންނާއި ބައްދަލުކުރައްވާ ވާހަކަފުޅުދައްކަވަނީ
ވަކި މީހެއްގެ ވަކި މަގްސަދެއް ހާސިލްކުރުމަށްޓަކައި އެމްޑީޕީއަށްޓަކައި ގުރުބާންވީ މީހުންނާއި ދިމާލަށް ބޭނުންހާ އެއްޗެއް ބޭނުންގޮތަށް ކިއުމަކީ ޕާޓީއަށް ފައިދާހުރި ގޮތެއް ނޫން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.
އެމްޑީޕީގެ ރިޔާސީ ޕްރައިމަރީ ކެމްޕޭންގައި ގއ. ވިލިނގިލީގައި ވާހަކަ ދައްކަވަމުން ރައީސް ޞާލިހް ވިދާޅުވީ އެމްޑީޕީ އުފެދިގެން އައިގޮތް މިތާ ތިއްބެވި ބައެއް ބޭފުޅުންނަށް އެނގިވަޑައިގަންނަވާނެ ކަމަށެވެ.
މަދު ބަޔަކާއެކީ، ފުރަތަމަ ސޮއިކުރި 42 މީހުންގެ ތެރޭގައި، ބަޔަކަށް އޮޅުވާލައިގެން އެ މަސައްކަތް ކުރިނަމަވެސް އޭގަ ދެވަނައަށް ސޮއިކުރި މީހަކީ އެމަނިކުފާނު ކަމަށެވެ.
ރައީސް ވިދާޅުވީ ވާދަކޮށް ކާމިޔާބު ކުރުމަށްޓަކައި މަސައްކަތް ކުރަން ޖެހޭނެ ކަމަށެވެ. އެހެންނަމަވެސް ޕާޓިއަށްޓަކައި މަސައްކަތް ކުރެއްވި ބޭފުޅުންގެ އަގު ވަޒަންނުކޮށް ހިތުހުރި އެއްޗެއް ގޮވުމަކީ އެބޭފުޅުންނަށް ވެސް އަދި ޕާޓީއަށް ވެސް އޮތް ރަނގަޅެއް ނޫން ކަމަށެވެ.
ރައީސް ވަނީ އެކަންކަމަށް ވިސްނުމަށް އެމްޑީޕީގެ މެންބަރުންގެ ކިބައިން އެދިވަޑައިގަންނަވާފައެވެ. އަދި އެމަނިކުފާނު ކުރިއަށް ވަޑައިގަންނަވާނީ ހުރިހާ ބޭފުޅުންނާއެކީގައި ކަމަށް ރައީސް ވިދާޅުވިއެވެ.
