އެސްޓީއޯ ރަމަޒާން ބާޒާރު ފަށައިފި

ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)އިން ބާއްވާ ރަމަޒާން ބާޒާރު ފަށައިފިއެވެ.

އާދިއްތަ ދުވަހު އެސްޓީއޯ ޕީޕަލްސް ޗޮއިސްގައި ބޭއްވި ރަސްމިއްޔާތެއްގައި ރަމަޒާން ބާޒާރު ފައްޓަވައިދެއްވީ އެސްޓީއޯގެ މެނޭޖިންގ ޑިރެކްޓަރ ހުސެއިން އަމްރުއެވެ.

ރަމަމަޒާން ބާޒާރާ ގުޅޭގޮތުން މީޑިއާތަކަށް މައުލޫމާތުދެއްވަމުން އެސްޓީއޯ ޕީޕަލްސް ޗޮއިސްގެ ސޭލްސް މެނޭޖަރ އަބްްދުﷲ ސައީދު ވިދާޅުވީ މި ޕްރޮމޯޝަން ޖެނުއަރީ 22 އިން ފެށިގެން އޭޕްރިލް 29 ގެ ނިޔަލަށް ކުރިއަށްދާނެ ކަމަށެވެ. މިއީ އެކުންފުނިން އަހަރުތެރޭގައި ބާއްވާ އެންމެ ވަރުގަދަ ސޭލްސް އިވެންޓު ކަމަށް އޭނާ ވިދާޅުވިއެވެ.

މި ޕްރޮމޯޝަންގެ ތެރެއިން ޚާއްސަ ޑިސްކައުންޓުތަކެއް ލިބިގެންދެއެވެ. މިގޮތުން ހޯމް އެޕަލަޔަންސްއިން ވަރަސް ބޮޑު ޑިސްކައުންޓެއް ލިބިގެންދެއެވެ. އަދި 500ރ. އިން މަތީގެ ވިޔަފާރިކުރާ ފަރާތްތަކަށް ޑިޖިޓަލް ކޫޕަނެއް ލިބޭނެ ކަމަށް ސައީދު ވިދާޅުވިއެވެ.

ޕްރޮމޯޝަން ނިމުމުން ލަކީޑްރޯ ނަގައި، ލަކީޑްރޯއިން ހޮވޭ ފަރާތަކަށް ދެމީހުންގެ އުމްރާ ދަތުރެއް ލިބޭނެ ކަމަށް ސައީދު ވިދާޅުވިއެވެ.

މި ޕްރޮމޯޝަން އެސްޓީއޯ ޕީޕަލްސް ޗޮއިސްގެ އިތުރުން އެސްޓީއޯގެ އިތުރު އައުޓްލެޓްތަކުގައި ކުރިއަށްދާނެއެވެ.