ވިލިނގިލިން ފެނުނީ، ތަފާތުކަމެއް ނެތި ތަރައްގީގެ މަޝްރޫއުތައް ގެނައުމުގެ ނަތީޖާ - ރައީސް
ޑިމޮކްރަސީއެއްގެ އެންމެ މުހިންމު އަސާސަކީ މައިނޯރިޓީގެ ހައްގުތައް ހިމާޔަތްކުރުން
ކެމްޕޭނަށް ވިލިނގިއްޔަށް ވަޑައިގެން ރައީސް އެމްޑީޕީގެ މެންބަރުންނާ ބައްދަލުކުރައްވައި ވާހަކަފުޅުދައްކަވަނީ
ގއ. ވިލިނގިލިގެން ފެނިގެން ދަނީ, ކޮން ޕާޓީއެއްގެ ބައެއްތޯ ނުބަލައި ރައްޔިތުންނަށް ހިދުމަތްކުރުމުގައި ތަފާތުކަމެއް ނެތި، ތަރައްގީގެ މަޝްރޫއުތައް ގެނައުމުގެ ނަތީޖާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވިދާޅުވެއްޖެއެވެ.
އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ގއ. ވިލިނގިއްޔަށް ވަޑައިގެން އެމްޑީޕީގެ މެންބަރުންނާއި ވާހަކަފުޅުދައްކަވަމުން ރައީސް ވިދާޅުވީ، މި ސަރުކާރުގެ ސިޔާސަތު ތަފާތުވުމާއެކު، ރާއްޖޭގެ ތަރައްގީއަށް ކުރާ މަސައްކަތުގައި ވަކި ވިސްނުމަކަށް ނުބަލައި، އެ ދާއިރާގައި ތިބީ ކޮން ޕާޓީއެއްގެ ބައެއްތޯ ނުބަލައި، ރައްޔިތުންނަށް ހިދުމަތްކުރުމުގައި ތަފާތުކަމެއް ނެތި ތަރައްގީގެ މަޝްރޫއުތައް ގެނައުމުގެ ނަތީޖާ ވިލިނގިލިން ފެންނަމުންދާ ކަމަށެވެ.
ރައީސް ވިދާޅުވީ، ވިލިނގިލި އޮތީ ސަރުކާރާއެކު ތަރައްގީއާއެކު ކުރިއަށް ދިއުމަށް ކަމަށެވެ. ވިލިނގިލީގެ ބޮޑު މެޖޯރިޓީ އޮތީ އެމްޑީޕީއާއެކު ކަމަށާއި، މިއިން ދައްކައިދެނީ އެމްޑީޕީގެ މި ސަރުކާރުން ރާއްޖޭގެ ތަރައްގީއަށްޓަކައި ކުރާ މަސައްކަތް ރަށްރަށުގެ ރައްޔިތުން ބަލައިގަންނަމުންދާތަން ކަމަށެވެ.
ރައީސް ވިދާޅުވީ މި ޕްރައިމަރީއަކީ ތަރައްގީގެ މަޝްރޫއުތައް ކުރިއަށް ގެންދިއުމަށްޓަކައި ވަރަށް މުހިންމު އިންތިހާބެއް ކަމަށެވެ. މި އިންތިހާބުގެ ނަތީޖާ ނިމުމުން އަދި އެ މަސައްކަތް ނިމުނީ ނޫންކަމަށާއި، މިއީ ފެށުމެއް ކަމަށެވެ. މިއާއެކު، ރާއްޖޭގެ ވެރިކަމަށް މީހަކު ގެނައުމަށް ބާއްވާ އިންތިހާބެއް އެބައޮތް ކަމަށާއި، ޕްރައިމަރީން މީހަކު ހޮވުނުނަމަވެސް މަގުސަދަކަށް ވާންވާނީ ރާއްޖޭގެ ވެރިކަން ހޯދުން ކަމަށް ރައީސް ވިދާޅުވިއެވެ.
ރައީސް ވިދާޅުވީ ތަފާތު ފިކުރުތައް އެކުލެވޭ ސަރުކާރެއް ގޮވައިގެން ރައްޔިތުންނަށް ހިދުމަތް ކުުރުމުގައި 4 އަހަރު ހޭދަކުރެއްވިއްޖެ ކަމަށެވެ. ބައެއްފަހަރު ދަތި އުނދަގޫ ކަންތައްތަކެއް ހުންނަކަމަށާއި، އެހެންނަމަވެސް ޑިމޮކްރަސީއެއްގެ އެންމެ މުހިންމު އަސާސަކީ މައިނޯރިޓީގެ ހައްގުތައް ހިމާޔަތްކުރުން ކަމުގައިވާތީ އެމަނިކުފާނުގެ ވަޑައިގަންނަވަނީ އެގޮތަށް، އެ ވިސްނުންފުޅުގައި ކަމަށެވެ.
ރައީސް ވިދާޅުވީ ޑިމޮކްރަސީއެއްގައި އެއްވެސް ރައްޔިތަކު ބާކީއެއް ނުކުރެވޭނެ ކަމަށެވެ. އެންމެ އިސްކަމެއް ދޭންޖެހޭ ކަމަކީ މައިނޯރިޓީގެ ހައްގުތައް ހިމާޔަތްކުރުން ކަމަށާއި، ބާކީކޮށްފައި ނުދެވޭނެ ކަމަށެވެ. އެހެންކަމުން އެމްޑީޕީގެ މެންބަރުން ނިންމާ ނިންމުން ވަރަށް ވިސްނުންތެރިކަމާއެކު ނިންމަންވާނެކަމަށް ރައީސް ވިދާޅުވިއެވެ.
