އީއައިއޭ ފުރިހަމަ ނުކޮށް ރެޑިސަން ބްލޫ މޯލްޑިވްސްގެ ބަނދަރުގެ މަސައްކަތް ފެށުމުން ޖޫރިމަނާކޮށްފިއެވެ.

އެންވަޔަރމަންޓަލް ޕްރޮޓެކްޝަން އެޖެންސީ (އީޕީއޭ)އިން ބުނީ, ހުރުއެޅި އިންވެސްޓްމަންޓް ޕްރައިވެޓް ލިމިޓެޑުން، އދ. ހުރުއެޅި (ރެޑިސަން ބްލޫ މޯލްޑިވްސް)ގެ ގޮނޑުދޮށް ހިމާޔަތްކުރުމުގެ މަޝްރޫއުގެ ބައެއް މަސައްކަތްތައް އީއައިއޭ މަރުހަލާ ފުރިހަމަނުކޮށް ކުރިއަށް ގެންގޮސްފައިވާކަން ފާހަގަވުމާ ގުޅިގެން އެ އެޖެންސީން އެ މައްސަލަ ބަލާފައިވާކަމަށެވެ.

އެ މައްސަލާގައި ކަންހިނގާފައިވާ ގޮތުގެ ރިޕޯޓެއް އެ އެޖެންސީއަށް ހިއްސާކޮށްދިނުމަށް އެދިފައިވުމާގުޅިގެން، 28 ނޮވެމްބަރު 2022ގައި އެފަރާތުން ފޮނުވާފައިވާ އިންސިޑެންޓް ރިޕޯޓުގައި، ހުރުއެޅި ބަނދަރު ތަރައްގީކުރުމުގެ ތެރޭގައި 1055 އަކަމީޓަރުގެ ސަރަހައްދެއް ކޮނެ، 1582 ކޮޑިމީޓަރުގެ ވެލި ނަގައި، 60 މީޓަރުގެ ބަނދަރެއް ގާއިމްކޮށްފައިވާކަމަށެވެ.

އަދި މި މަސައްކަތުގައި ނެގުނު ވެލިތައް، އަލަށް ގާއިމްކުރެވުނު ބަނދަރާ އިންވެގެން ބަނދަރުގެ ކީ ވޯލްގެ ފަހަތަށް އަޅާފައިވާކަމަށް ބަޔާންކޮށް، ހުރުއެޅި ބަނދަރުގެ މަސައްކަތްތައް 15 ޖުލައި 2022ގައި ފަށައި، 30 ސެޕްޓެމްބަރު 2022ގައި ނިންމާފައިވާކަމަށް އިއުތިރާފްވެފައިވާ ކަމަށް ބުނެފައިވެއެވެ.

އީޕީއޭއިން ބުނެފައިވަނީ ހުރުއެޅި ގޮނޑުދޮށް ހިމާޔަތްކުރުމުގެ މަޝްރޫއުގެ ދަށުން ހުރުއެޅި ބަނދަރުގެ މަސައްކަތް އީއައިއޭ މަރުހަލާ ފުރިހަމަނުކޮށް ކުރިއަށް ގެންދިއުމާ ގުޅިގެން ދިވެހިރާއްޖޭގެ ތިމާވެށި ހިމާޔަތްކޮށް ރައްކާތެރިކޮށް ދެމެހެއްޓުމުގެ ގާނޫނުގެ ދަށުން ހެދިފައިވާ ތިމާވެއްޓަށް އަސަރުފޯރާ މިންވަރު ބަޔާންކުރާ ރިޕޯޓް ހެދުމާބެހޭ ގަވައިދު 2012ގެ ދަށުން 20،000 ރުފިޔާއިން ޖޫރިމަނާކޮށްފައިވާ ކަމަށެވެ.

އަދި ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދުގެ ދަށުން، 28،469،525 ރުފިޔާއިން ހުރުއެޅި އިންވެސްޓްމަންޓް ޕްރައިވެޓް ލިމިޓެޑް ޖޫރިމަނާކޮށްފައިވާ ކަމަށް އީޕީއޭއިން ބުނެއެވެ.

އީޕީއޭއިން ވަނީ ޖޫރިމަނާގެ ޖުމްލަ ފައިސާގެ އަދަދު، ސަރުކާރު ބަންދު ދުވަސްތައް ހިމަނައިގެން 30 ދުވަހުގެ ތެރޭގައި ދެއްކުމަށް މި މަހުގެ 19 ވަނަ ދުވަހު ހުރުއެޅި އިންސްވެޓްމަންޓް ޕްރައިވެޓް ލިމިޓެޑަށް އަންގާފައެވެ.