ހޭންޑްބޯލް މޯލްޑިވްސްގެ ރައީސަކަށް މުޖޭ
ނެގީ ފެންނަ ނުފެންނަ ވޯޓެއް
ހޭންޑްބޯލް މޯލްޑިވްސްގެ އާ ހިންގާ ކޮމިޓީ
ހޭންޑްބޯލް މޯލްޑިވްސްގެ އާ ރައީސަކަށް އަހުމަދު މުޖުތަބާ (މުޖޭ) އިންތިޚާބުކޮށްފިއެވެ.
އެމަގާމަށް އޭނާ އިންތިޚާބުކުރީ އިތުރު މީހަކު ކުރިމަތި ނުލުމުން ނެގި ފެންނަ ނުފެން ވޯޓްގައި، ކްލަބްތަކުގެ ފުރިހަމަ ތާއީދާއެކުއެވެ. މުޖޭއަކީ ކުރިން ހޭންޑްބޯލް މޯލްޑިވްސްގެ ޖެނެރަލް ސެކްރެޓަރީކަން ކޮށްފައިވާ، އެކުޅިވަރުގެ ބޮޑު ޚިދުމަތްތެރިއެކެވެ. އެސޯސިއޭޝަން އުފެދުނީއްސުރެ އެކުޅިވަރު ކުރިއެރުވުމަށް އިސްކޮށް އޭނާ ގެންދަނީ މަސައްކަތްކުރައްވަމުންނެވެ. ކުރިއަށް އޮތް ހަތަރު އަހަރަށް އިންތިޚާބުކުރި އެކްސްކޯގެ ހުރިހާ މެންބަރުންވެސް ހޮވީ ކްލަބްތަކުގެ ފުރިހަމަ ތާއީދާއެކުއެވެ.
ދެ ނައިބު ރައީސުންގެ ގޮތުގައި އިންތިޚާބުކުރީ އަލީ އިޔާޒްއާއި އަބްދުﷲ ސަލީމެވެ. ޚަޒާންދާރަކީ މުހައްމަދު މުހުދިން ޚާލިދުއެވެ. އެކްސްކޯއަށް ކްލަބްތަކުން ރުހުން ދިން ފަސް މެންބަރުންނަކީ މުހައްމަދު ޒަރީރު, ވިސާމް ހަސަން, އަހުމަދު ހައިސަމް, އާއިޝަތު ރީމާ އަދި އަހުމަދު އިބްރާހީމެވެ.
