ކުޑަކުއްޖަކު ރޭޕްކޮށް އެކުއްޖާގެ ބަރަހަނާ މަންޒަރު ނެގި މީހަކު 40 އަހަރަށް ޖަލަށް
މައްސަލައިގެ ދައުވާ ކޯޓަށް ހުށަހަޅާފައިވަނީ 05 ފެބްރުވަރީ 2018 ގައި
ރޭޕްގެ މައްސަލަތައް
ލ. އަތޮޅުގެ ރަށެއްގައި ހިނގާދިޔަ ޙާދިސާއަކާއި ގުޅިގެން މުޙައްމަދު ޝަޒްލީފް ކިޔާ މީހެއްގެ މައްޗަށް ކްރިމިނަލް ކޯޓަށް ހުށަހެޅި ރޭޕްކުރުމުގެ ކުށުގެ ދަޢުވާއާއި، ކުޑަކުއްޖަކު މެދުވެރިކޮށް އޮރިޔާންކާޑު އުފެއްދުމުގެ ކުށުގެ ދަޢުވާ ސާބިތުވާކަމަށް 18 ޖަނަވަރީ 2022 ދުވަހު ކްރިމިނަލް ކޯޓުން ކަނޑައަޅުއްވައިފިއެވެ.
މި ޙާދިސާ ހިނގީ 06 ޖަނަވަރީ 2018 ދުވަހުގެރޭ މެންދަމުގެ ވަގުތެއްގައެވެ. ޙާދިސާ ހިނގާފައިވަނީ ރަށެއްގެ ވަލު ތެރޭގައެވެ.
ދަޢުވާގެ ކުރު ޚުލާޞާއެއް ޕީޖީ އޮފީހުން ހިއްސާ ކޮށްފައިވާއިރު، ޕީޖީ އޮފީހުން ބުނީ، އަނިޔާލިބުނު ޢުމުރުން 17 އަހަރުގެ ކުއްޖާ ޙާދިސާ ހިނގި ތަނަށް ގެންގޮސް ގަދަކަމުން ޖިންސީ ގުޅުން ހިންގައި، ކުއްޖާގެ ބަރަހަނާ މަންޒަރު ފެންނަ ފޮޓޯއާއި ވީޑިއޯ ނަގާފައިވާ ކަމަށެވެ.
މި މައްސަލައިގެ ދައުވާ ކޯޓަށް ހުށައަޅާފައިވަނީ 05 ފެބްރުވަރީ 2018 ގައެވެ.
އޭނާގެ މައްޗަށް ކުރާ ރޭޕްގެ ކުށް ސާބިތުވެފައިވާތީ ޖިންސީ ކުށުގެ ޤާނޫނު ގެ 14 ވަނަ މާއްދާގެ (ނ) ގެ ދަށުން، 20 އަހަރަށް ޖަލަށްލުމަށް ވަނީ ޙުކުމް ކޮށްފައެވެ.
އޭގެ އިތުރުން، ކުޑަކުއްޖަކު މެދުވެރިކޮށް އޮރިޔާންކާޑު އުފެއްދުމުގެ ކުށް ސާބިތުވެފައިވާތީ، ކުޑަކުދިންނަށް ޖީންސީ ގޯނާ ކުރާ މީހުންނާމެދު ޚާއްސަ އުޞޫލުތަކަކުން ޢަމަލުކުރުމުގެ ޤާނޫނުގެ 18 ވަނަ މާއްދާގެ (ށ) ގެ ދަށުން، 20 އަހަރަށް ޖަލަށްލުމަށް ވަނީ ޙުކުމް ކޮށްފައެވެ.
އެކު ޖުމްލަ 40 (ސާޅީސް) އަހަރަށް ޖަލަށްލުމަށް، އަދި އެ މުއްދަތުން ޝަރީޢަތް ނިމެންދެން ބަންދުގައި ހުރި މުއްދަތު ކަމުގައިވާ 2 އަހަރާއި 1 މަހާއި 14 ދުވަސް އުނިކުރުމަށް އަދަބު ކަނޑައަޅައި ވަނީ މި މައްސަލައިގައި ޙުކުމް ކުރައްވާފައެވެ.
