ލިވަޕޫލަށް ބަދަލުތަނެއް އަތުވެދާނެ ކަމަށާއި، ނަމަވެސް ކޯޗުކަމުގެ މަޤާމު އިސްތިއުފާ ނުދޭނެ ކަމަށް ޔާގަން ކްލޮޕް ބުނެފި އެވެ.

ކްލޮޕް މިހެން ބުނީ އިނގިރޭސި އެފްއޭ ކަޕްގައި ވުލްވްސްއާ ދެކޮޅަށް ކުޅޭ މެޗުގެ ކުރިންނެވެ. ލިވަޕޫލްގެ ދަނޑުގައި ކުޅުނު މެޗު އެއްވަރުވުމުން، ވުލްވްސްގެ ދަނޑުގައި ރިޕްލޭ މެޗެއް ކުޅެން ޖެހޭނެ އެވެ. އެ މެޗު އޮތީ އަންގާރަ ދުވަހުގެ ރޭ އެވެ. އެ މެޗުގެ ކުރިން ވާހަކަ ދައްކަމުން ކްލޮޕް ބުނީ، އޭނާ ހުރީ ލިވަޕޫލްގައި އެ ޓީމުގެ ކުޅުންތެރިންނާއެކު ކަމަށާއި، ކުޅުންތެރިން އޭނާ ދައްކާ ވާހަކަ އަޑު އަހާ ކަމަށެވެ.

މި ސީޒަންގައި ލިވަޕޫލްގެ ކުޅުން ވަނީ ވަރަށް ބޮޑަށް ދަށްވެފަ އެވެ. އެކަމުގެ ސަބަބުން ބޭރުގެ މީޑިއާތަކުގައި އަންނަނީ ކްލޮޕްގެ ކުރިމަގާމެދު ސުވާލު ވެސް އުފައްދަމުންނެވެ.

ކްލޮޕް ބުނީ ކުޅުން ދައްވުމަކީ އޭނާ ވެސް ކަންބޮޑުވާ މައްސަލައެއް ކަމަށެވެ. އަދި އޭނާ އަށް އަޑުއިވޭ ވާހަކަތަކާއި، މީހުން އޭނާ ގާތު ދައްކާ ވާހަކަ ތަފާތުވާނެ ކަމަށެވެ. އެކަން ފާހަގަކޮށް ކްލޮޕް ބުނީ އޭނާ ޓީމު ދޫކޮށް ނުލާނެ ކަމަށާއި، އޭގެ މާނައަކީ އެހެނިހެން ބައެެއް ކަންކަން ބަދަލުކުރަން ޖެހިދާނެ ކަމަށެވެ. އެގޮތުން އެކަންކަމަށް ވަރަށް ބޮޑަށް ބަލާނެ ކަމަށާއި، ނަމަވެސް އެއީ މުސްތަޤުބަލަށް ކުރަން ޖެހޭ ކަމެއް ކަމައްގެ އިތުރުން، އެކަންކަމާދު ވިސްނަން ވަގުތު ލިބޭނެ ކަމަށެވެ. ލިވަޕޫލްގެ ކުޅުމާމެދު ވާހަކަ ދައްކަމުން ކްލޮޕް ބުނީ، ޓީމުގެ ކުޅުން ވަރަށް ބޮޑަށް ބަދަލު ކުރަން ޖެހޭ ކަމަށާއި، އަންނަ ސީޒަނުގައި އެ މައްސަލަތައް އޮވެގެން ނުވާނެ ކަމަށެވެ. އޭނާ ބުނީ މިއީ ވަރަށް ދިގު ދަތުރެއް ކަމަށާއި، މާދަމާ ލިވަޕޫލް އުހަށް އަރައިގެންދާނެ ކަމުގެ ޔަޤީންކަން ނުދެވޭނެ ކަމަށެވެ. ނަމަވެސް އޭނާ އަށް ދެވޭނެ ޔަޤީންކަމަކީ، މަސައްކަތް ކުރާނެ ކަމަށާއި އަދި އެންމެނަށް އެކަން ފެންނަން ވެސް ފެންނާނެ ކަމަށެވެ.

އެފްއޭ ކަޕްގައި ވުލްވްސްއާ ދެކޮޅަށް ނުކުންނައިރު، ލިވަޕޫލް އޮތީ ޕްރިމިއާ ލީގުގައި އެންމެ ފަހުން ކުޅުނު މެޗުގައި ބްރައިޓަން އަތުން ބަލިވުމުގެ ނުތަނަވަސްކަމާއެކު އެވެ. ލިވަޕޫލާއި ވުލްވްސް ވާދަކުރާ މެޗު ފަށާނީ އަންގާރަ ދުވަހުގެ ރޭ ރާއްޖެ ގަޑިން ދަންވަރު 12:45 ގައެވެ.