ރިޔާސީ އިންތިޚާބުގެ ޚަރަދު ކުޑަ ކުރަން މަސައްކަތްކުރާނަން، 10 މިލިއަން ކުޑަކުރެވިދާނެ ކަަމަށް ބެލެވޭ: އިލެކްޝަން
އިންތިޚާބު ބޭއްވުމަށް ޚަރަދު އަންދާޒާކުރީ 120 މިލިއަން ރުފިޔާ
އިލެކްޝަންސް ކޮމިޝަން
މި އަހަރުގެ ސެޕްޓެމްބަރު މަހު ބޭއްވުމަށް ތާވަލްކޮށްފައިވާ ރިޔާސީ އިންތިހާބުގެ ޚަރަދުތައް ކުޑަ ކުރުމަށް މަސައްކަތްކުރާނެ ކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަނުން ބޭއްވި ނޫސްވެރިކަންގެ ބައްދަލުވުމެއްގައި އެ ކޮމިޝަންގެ ރައީސް ފުއާދު ތައުފީގު ވިދާޅުވީ އިންތިޚާބުގެ ޚަރަދު ކުޑަ ކުރުމަށް ކުރާ މަސައްކަތުގެ ތެރެއިން 10 މިލިއަން ރުފިޔާ ޚަރަދު ކުޑަ ކުރެވޭނެ ކަމަށް ބެލެވޭ ކަމަށެވެ. އިންތިހާބަށް ތައްޔާރުވަމުން އަންނައިރު ހަރަދު ކުޑަކުރެވޭނެ ގޮތްގޮތް ފެންނަ ކަން ފާހަގަކުރައްވާ ފުއާދު ވިދާޅުވީ ދައުލަތުގެ ވަސީލަތްތައް އިންތިހާބުގެ ކަންކަމުގައި ބޭނުންކުރެވޭ މިންވަރު އިތުރު ކޮށްގެން ޚަރަދު ކުޑަ ކުރެވިދާނެ ކަމަށެވެ.
އެހެންނަމަވެސް ރިޔާސީ އިންތިޚާބުގެ ދެވަނަ ބުރަކަށް ދާން ޖެހޭ ނަމަ އިންތިހާބު ބޭއްވުމަށް މިހާރު ބަޖެޓުކޮށްފައިވާ އަދަދުގެ އިތުރަށް މަދުވެގެން 30 މިލިއަން ރުފިޔާ ބޭނުންވާނެ ކަމަށް އޭނާ ވިދާޅުވިއެވެ. ރިޔާސީ އިންތިޚާބު ބޭއްވުމަށް ޚަރަދު އަންދާޒާކުރީ 120 މިލިއަން ރުފިޔާ ކަމަށާއި އިންތިޚާބު ބޭއްވުމަށް ލިބުނީ 90 މިލިއަން ރުފިޔާ ކަމަށް ވުމުން ދަތިތަކެއް ހުރިކަމަށް އޭނާ ވަނީ ފާހަގަކުރައްވާފައެވެ. އިންތިޚާބުގެ ދެވަނަ ބުރަކަށް ބޭނުންވާ ފައިސާ ލިބޭނެކަމުގެ ޔަގީންކަން އެބަ އޮތް ކަމަށް ވެސް ފުވާދު ވަނީ ވިދާޅުވެފައެވެ. އެގޮތުން އިންތިޚާބުގެ ޚަރަދުތަކާއި މެދު ފިނޭންސް މިނިސްޓްރީ އާއި ވާހަކަދެކެވެމުންދާކަން އޭނާ ވަނީ ފާހަގަކުރައްވާފައެވެ.
މި އަހަރުގެ ރިޔާސީ އިންތިހާބު ބާއްވާނެ ތާރީހެެއްގެ ގޮތުގައި އީސީއިން ކަނޑައަޅާފައި ވަނީ އަންނަ ސެޕްޓެމްބަރު މަހުގެ 9 ވަނަ ދުވަހުއެވެ. އަދި ދެވަނަ ބުރަކަށް ގޮސްފި ނަމަ ބާއްވާނެ ތާރީހެއްގެ ގޮތުގައި ކަނޑައަޅާފައިވަނީ އެ މަހުގެ 30 ވަނަ ދުވަހެވެ. އިންތިހާބުގައި ކެނޑިޑޭޓުންނަށް ވާދަކުރުމުގެ ފުރުސަތު ހުޅުވާލުމަށް ހަމަޖެހިފައިވަނީ ޖުލައި 23 އިން އޮގަސްޓު މަހުގެ ތިންވަނަ ދުވަހާއި ހަމައަށެވެ.
