މިއަދު ދިވެހި ފުލުހުންގެ ލީޑަރޝިޕް ހަރުދަނާކުރެވިއްޖެ: އިމްރާން
15 ޖެނުއަރީ 2023 | އާދީއްތަ 02:05ފުލުހުންގެ ޚިދުމަތަށް ބޭނުންވާ މިންވަރަށް މީގެ ކުރިން އިންސާނީ ވަސީލަތް ގާއިމްކުރެވިފައެއް ނެތް
ހޯމް މިނިސްޓަރު އިމްރާން އަބްދުﷲ
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ފުރިހަމަ އިރުޝާދުގެ ދަށުން ކުރެވުނު މަސައްކަތުން މިއަދު ދިވެހި ފުލުހުންގެ ޚިދުމަތުގެ ލީޑަރޝިޕަށް ހަރުދަނާކަމެއް ގެނެވިފައިވާކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ ހޮނިހިރު ދުވަހުގެރޭ ކުރިއަށްދިޔަ 34 ވަނަ ޕޮލިސް ޓްރެއިނިން އިނީޝަލް ކޯހުގެ ދަސްވެނިވުމުގެ ރަސްމިއްޔާތުގައި ވާހަކަފުޅުދައްކަވަމުންނެެވެ.
2018 ވަނަ އަހަރު މި ސަރުކާރުން ފުލުހުންގެ ޚިދުމަަތާ ހަވާލުވެ، އެ ޚިދުމަތް ހަރުދަނާކުރުމަށް އެތައް ވަސީލަތެއް ގާއިމްކޮށް އެތައް ކަމެއް ރަނގަޅުކުރަންޖެހުނުކަން ފާހަގަކުރައްވައި މިނިސްޓަރު އިމްރާން ވިދާޅުވީ ރާއްޖޭގައި ފުލުހުންގެ ޚިދުމަތް ބޭނުންވާ މިންވަރާ ގާތްކުރާ އަދަދަށްވެސް ރާއްޖޭގައި އިންސާނީ ވަސީލަތް އޭރު ގާއިމްކުރެވިފައިނުވާކަމަށެވެ. ފުލުހުންގެ ލީޑަރޝިޕްވެސް އޮތީ ވަރަށް ނިކަމެތި ހާލަތެއްގައި ކަމަށާއި، މިކަންކަން ރަނގަޅުކުރުމަށް ވަރަށް ގިނަ މަސައްކަތްތަކެއް ކުރަންޖެހުނު ކަމަށެވެ.
މިހާތަނަށް އައިއިރު މި ސަރުކާރުން ކުރި ބުރަ މަސައްކަތުން ހަރުދަނަ ލީޑަރޝިޕެއް ގާއިމްކުރެވިފައިވާކަން މިނިސްޓަރު އިމްރާން ފާހަގަކުރެއްވިއެވެ.
ފުލުހުންގެ ފަރާތުން ރައްޔިތުންނަށް ފޯރުކޮށްދޭ ޚިދުމަތް އިތުރަށް ފުރިހަމަކުރެވޭނީ ފުލުހުންނަށް ރަނގަޅު ތަމްރީނެއް ދެވިގެން ކަމަށް އިމްރާން ވިދާޅުވިއެވެ. ނެޝަނލް ކޮލެޖް އޮފް ޕޮލިސިން އެންޑް ލޯ އެންފޯސްމެންޓް ވުޖޫދަށް ގެނެވުމާއެކު މިއަދު މި ތަމްރީނުތައް އިތުރަށް ފުރިހަމަކުރެވިގެން ގޮސްފައިވާކަމަށް މިނިސްޓަރު އިމްރާން ވިދާޅުވިއެވެ. އަދި އެއްބައެއްގެ ގޮތުގައި ތިބެ، އެންމެ ފުރިހަމަގޮތުގައި ފުލުހުން ތަމްރީނުކޮށްދިނުމަށް މިނިސްޓަރު ވަނީ ފުލުހުންގެ ލީޑަރޝިޕަށް އިލްތިމާސްކުރައްވާފައެވެ.
