ހަތަރު މިނިޓްގެ ތެރޭގައި ދެ ލަނޑު ޖަހައިގެން ސިޓީ ބަލިކޮށް، ޔުނައިޓެޑްގެ ފޯމް ކުރިއަށް!
ޔުނައިޓެޑް މެޗު ކާމިޔާބުކުރީ 2-1ން
ޔުނައިޓެޑްގެ ފުރަތަމަ ލަނޑު ޖެހުމަށްފަހު ބުރޫނޯ ފެނާންޑޭޒް
ހަތަރު މިނިޓްގެ ތެރޭގައި ދެ ލަނޑު ޖަހައިގެން މެންޗެސްޓަރ ސިޓީ ބަލިކޮށް, ވާދަވެރި މެންޗެސްޓަރ ޔުނައިޓެޑްގެ ރަނގަޅު ފޯމް ދަމަހައްޓައިފިއެވެ.
ޔުނައިޓެޑްގެ ދަނޑުގައި ކުޅުނު މެޗު އެޓީމުން ކާމިޔާބުކުރީ ސިޓީން ފުރަތަމަ ގޯލް ޖަހައި ކުރިހޯދާފައި ވަނިކޮށް, ފަހަތުން އަރައި ދެ ގޯލް ޖަހައިގެންނެވެ. ލަނޑެއް ނުޖެހި ނިމުނު ފުރަތަމަ ހާފަށްފަހު ސިޓީއަށް ކުރިހޯދައިދިނީ، ދެވަނަ ހާފްގައި ފޮޑެންގެ ބަދަލުގައި ކުޅެން ނުކުތް ގްރީލިޝްއެވެ. 57 ވަނަ މިނިޓްގައި ކުޅެން ނުކުމެ ގްރީލިޝް ލަނޑުޖެހީ ކެވިން ޑި ބުރައިނާ ތަނަވަސްކޮށްދިން ފުރުސަތެއްގައި، 60 ވަނަ މިނިޓްގައެވެ. އެކަމަކު އެލީޑްގައި އޮވެވުނީ 18 މިނިޓެވެ. މެންޗެސްޓަރ ޔުނައިޓެޑްގެ ޕޯޗްގަލް މިޑްފީލްޑަރ ބުރޫނޯ ފެނާންޑޭޒް ލަނޑު ޖަހާ ނަތީޖާ ހަމަހަމަކޮށްދިނެވެ. އަދި އެ ލަނޑަށްފަހު ހަތަރު މިނިޓްގެ ތެރޭގައި ރަޝްފޯޑް ލަނޑު ޖަހައި ޔުނައިޓެޑަށް ކުރި ހޯދައިދިނެވެ.
މި މޮޅާއެކު ޔުނައިޓެޑް ވަނީ ދެވަނާގައި އޮތް ސިޓީއާ ޕޮއިންޓަކަށް ގާތްކޮށްފައެވެ. އަދި ސިޓީއަށް ލީގު ދިފާއުކުރުމުގެ ފުރުސަތު ވަނީ ވަރަށް ބޮޑަށް ހަނިވެފައެވެ. އެއްވަނާގައި އާސެނަލް އޮތީ ފަސް ޕޮއިންޓްގެ ލީޑަކާއެކުއެވެ. އަދި ސިޓީ އިތުރަށް މެޗެއް ކުޅެފައިވާތީ އެ ލީޑަށް ޕޮއިންޓް ފުޅާކުރުމުގެ ފުރުސަތު އާސެނަލްއަށް އެބައޮތެވެ. ސިޓީ މެޗަށް ނުކުތީ އިނގިރޭސި ލީގުކަޕުން ކެޓުމުގެ މާޔޫސްކަމާވެސް އެކުއެވެ.
