އިނގިރޭސި ޕްރިމިއާ ލީގުގައި ޗެމްޕިއަން މެންޗެސްޓަރ ސިޓީއާ ދެކޮޅަށް ނިކުންނާނީ ކުރީ މެޗުން ފިލާވަޅުތަކެއް ލިބިގަނެގެން ކަމަށް މެންޗެސްޓަރ ޔުނައިޓެޑުގެ ކޯޗު އެރިކް ޓެން ހާގް ބުނެފި އެވެ.

ޓެން ހާގް މިހެން ބުނީ ޔުނައިޓެޑުގެ އަމިއްލަ ދަނޑުގައި ހޮނިހިރު ދުވަހު ސިޓީއާ ދެކޮޅަށް ކުޅޭ މެޗުގެ ކުރިން ވާހަކަ ދައްކަމުންނެވެ. މި ސީޒަންގެ ލީގުގައި މި ދެ ޓީމު ވަނީ ސިޓީގެ ދަނޑުގައި ކުރިން ބައްދަލުކޮށްފަ އެވެ. މިދިޔަ އަހަރުގެ އޮކްޓޫބަރު މަހުގެ ދެ ވަނަ ދުވަހު ކުޅުނު މެޗުން ޔުނައިޓެޑު ބަލިވީ 6-3 އިންނެވެ. އެ މެޗުގައި ސިޓީގެ އާލިން ހާލަންޑު އާއި ފިލް ފޮޑެން ހެޓްރިކު ވެސް ހެދި އެވެ. ނަމަވެސް އޭގެ ފަހުން ޔުނައިޓެޑުން އަންނަނީ އެ ޓީމުގެ ކުޅުން ރަނގަޅު ކުރަމުންނެވެ.

ލީގުގައި ޔުނައިޓެޑު އެންމެ ފަހުން ކުޅުނު އަށް މެޗުން ވެސް މޮޅުވެފައިވާއިރު، އެ ޓީމު ވަނީ އެފްއޭ ކަޕާއި ކަރަބޯ ކަޕްގެ މެޗު ވެސް ކާމިޔާބުކޮށްފަ އެވެ. ޓެން ހާގް ބުނީ ކުރިން މެޗުން ލިބުނީ ރަނގަޅު ފިލާވަޅެއް ކަމަށާއި، އޭގެން ކަންކަން ދެނެގަނެ ބޮޑު ކުރިއެރުމެއް ލިބިފައިވާ ކަމަށެވެ. ޓެން ހާގް ބުނީ އެ މެޗަކީ ނިމިފައި އޮތް މެޗެއް ކަމަށާއި، އެ މެޗުގެ ވާހަކަ ދައްކައިގެން ކުރެވޭނެ ކަމެއް މިހާރު ނޯންނާނެ ކަމަށެވެ. އޭގެ ބަދަލުގައި ކުރިއަށް އޮތް މެޗުން ރަނގަޅު ނަތީޖާއެއް ނެރެން މަސައްކަތް ކުރަން ޖެހޭ ކަމަށް އޭނާ ބުންޏެވެ. އޭނާ ބުނީ އެއީ މާޒީ ކަމަށާއި، އެއްވެސް މީހަކަށް މާޒީ ބަދަލު ނުކުރެވޭނެ ކަމަށެވެ. ނަމަވެސް ކޮންމެ މީހަކަށް ވެސް މުސްތަޤުބަލު ބަދަލު ކުރެވިދާނެ ކަމަށެވެ. އިތުރަށް ޓެން ހާގް ބުނީ، ކޯޗެއްގެ ހައިސިއްޔަތުން ކޮންމެ މީހަކު ވެސް ގިނަ ކަންކަން ހުރަސްކުރަން ޖެހޭނެ ކަމަށާއި، ނަމަވެސް ދާން ބޭނުންވާ މިސްރާބަކާއި ހާސިލް ކުރަން ބޭނުންވާ ކަންތައްތަކެއް އޮންނަން ޖެހޭނެ ކަމަށެވެ.

މީގެ އިތުރުން ޓެން ހާގް ބުނީ ސިޓީން އެންމެ ފަހުން ކުޅުނު ދެ މެޗުގެ ނަތީޖާ އަށް ބަލަން މާބޮޑަށް ބޭނުންނުވާ ކަމަށެވެ. އޭނާ ބުނީ ސިޓީން ކުޅޭ ބައިވަރު މެޗުތައް ފެންނަ ކަމަށާއި، ބޭނުންވަނީ ޔުނައިޓެޑުގެ ރަނގަޅު ކުޅުން ދައްކައި މެޗު ކާމިޔާބު ކުރުމަށް ކަމަށެވެ. ލީގުގައި އެންމެ ފަހުން ސިޓީން ކުޅުނު މެޗު އެއްވަރުވެފައިވާއިރު، ސައުތެމްޓަން އަތުން ބަލިވެ އެ ޓީމު ވަނީ ކަރަބޯ ކަޕް އިން ވެސް ކަޓައިފަ އެވެ.

ލީގުގައި ޔުނައިޓެޑާއި ސިޓީ ބައްދަލު ކުރާ މެޗު ފަށާނީ ހޮނިހިރު ދުވަހުގެ ހަވީރު ރާއްޖެ ގަޑިން 17:30 ގައެވެ.