ޑިސެމްބަރު މަހު 309 ކައިވެންޏާއި 94 ވަރި
ޑިސެމްބަރު މަހު ފެމިލީ ކޯޓުން 158 މައްސަލައެއް ނިންމި
ފެމިލީ ކޯޓް
ނިމުނު ޑިސެމްބަރު 309 ކައިވެންޏާއި، 94 ވަރި ކޮށްދީފައިވާކަމަށް ފެމިލީ ކޯޓުން ހާމަކޮށްފިއެވެ.
ފެމިލީ ކޯޓުން ވަނީ ޑިސެމްބަރު މަހު އެކޯޓުން ކޮށްފައިވާ މަސައްކަތްތަކުގެ މައުލޫމާތު ހިއްސާކޮށްފައެވެ.
މިގޮތުން ޑިސެމްބަރު މަހު އެ ކޯޓުން 309 ކައިވެންޏެއް ވަނީ ކޮށްދީފައެވެ. އަދި 94 ވަރި ކޮށްދީފައިވެއެވެ.
ފެމިލީ ކޯޓުން ބުނީ ޑިސެމްބަރު މަހު އެ ކޯޓުން 158 މައްސަލައެއް ނިންމާފައިވާކަމަށެވެ. އޭގެ ތެރޭގައި ވަރީގެ 144 މައްސަލަ ނިންމާފައިވާއިރު ކުދިންނާ ގުޅުންހުރި 12 މައްސަލަ، ގެވެށި އަނިޔާއާގުޅޭ 4 މައްސަލަ, އަދި އާއިލީ އެހެނިހެން 18 މައްސަލަ ވަނީ ނިންމާފައެވެ. އަދި އާއިލީ މައްސަލަތައް ހައްލުކުރުމާބެހޭ ބައިން 25 މައްސަލައެއް ނިންމާފައިވެއެވެ.
ގެވެށި އަނިޔާގެ 4 މައްސަލަ ޑިސެމްބަރު މަހު އެކޯޓަށް ހުށަހަޅާފައިވާއިރު، ރައްކާތެރިކުރުމުގެ 4 އަމުރެއް ނެރެދީފައިވާކަމަށް ފެމިލީ ކޯޓުން ބުނެފައިވެއެވެ. އަދި މިފަދަ 2 މައްސަލައެއް ނުނިމިވާކަން ފެމިލީ ކޯޓުން ހާމަކުރެއެވެ. އެކޯޓުން ބުނީ ގެވެށި އަނިޔާއާ ގުޅޭ 50 އިންސައްތަ މައްސަލައަކީ އަންހެނުން ހުށަހަޅާފައިވާ މައްސަލަތައް ކަމަށެވެ.
މީގެ އިތުރުން ކުޑަކުދިންނާ ގުޅޭ 7 މައްސަލަ އެކޯޓުން ނިންމާފައިވާއިރު، ޚަރަދުގެ މައްސަލައިގެ ގޮތުގައި ހުށަހެޅުނު 11 މައްސަލަ ނިންމާފައިވެއެވެ.
