ތަމްރީނުތަކަށް ގައުމީ ރިލޭ ޓީމު އިންޑިއާއަށް

ތަމްރީނުތަކެއް ފުރިހަމަކުރުމަށް ގައުމީ ރިލޭ ޓީމު އަވައްޓެރި އިންޑިއާއަށް ފުރުމަށް ތައްޔާރުވެއްޖެއެވެ.

މި ތަމްރީނު ދަތުރަކީ މި އަހަރު އޮންނަ އިންޑިއަން އޯޝަން އައިލެންޑް ގޭމްސް (އައިއޯއައިޖީ)އަށް ތައްޔާރުވުމުގެ ގޮތުން ކުރާ ދަތުރެކެވެ. ރާއްޖެއިން ވަނީ އައިއޯއައިޖީން މެޑަލެއް ހޯދުމަށް ޓާގެޓުކޮށްފައެވެ. މި ތަމްރީނު ކުރިއަށްދާނީ މި މަހުގެ 16 ވަނަ ދުވަހުން ފެށިގެން މާޗު މަހުގެ 15 ވަނަ ދުވަހާ ހަމައަށް، އިންޑިއާގެ ބެންގަލޫރުގައެވެ. ތަމްރީނުގައި ރާއްޖޭގެ 10 އެތުލީޓަކު ބައިވެރިވުމަށް ވަނީ ހަމަޖެހިފައެވެ. އެއީ ފަސް އަންހެން އެތުލީޓުންނާއި ފަސް ފިރިހެން އެތުލީޓުންނެވެ. ތަރްރީނުގައި ބައިވެރިވާ އަންހެން އެތުލީޓުންނަކީ އާމިނަތު ޖާއިޝާ ޖުނީޒް، ޒީވާ މޫސާ ޝަފީއު، ރިފާ މުހައްމަދު، މަރިޔަމް އަލްހާ ހުސެއިން އަދި އައިޝަތު ޝަބާ ސަލީމެވެ. ފިރިހެން އެތުލީޓުންނަކީ ހަސަން ސާއިދު، އަހުމަދު ނަޖުދާން އަބްދުﷲ، ހުސައިން ޒީކް ސުއާދު، ހުސައިން ރިޒާ އަދި އަބްދުއް ރަޝީދު އިސްމާއީލެވެ. މި ޓީމުގެ އޮފިޝަލުންނަކީ އަހުމަދު ފާއިލް، މަފާޒާ މުސްތަފާ އަދި ޝިފާޒް ރާޝިދެވެ.

އައިއޯއައިޖީގެ ކުރިން ފައިނަލް ސްކޮޑާއެކު މެއި މަހުގެ ފުރަތަމަ ދުވަހުން ފެށިގެން އޮގަސްޓު މަހުގެ 15 ވަނަ ދުވަހާ ހަމައަށް، ރާއްޖޭގެ ޓީމު ބޭރު ގައުމަކުން ތަމްރީނު ހޯދުމަށް ވަނީ ނިންމާފައެވެ.