އިމާރާތްކުރުމުގެ މަސައްކަތްތައް އެވޯޑު ކުރެވޭނެ އަދަދު ކަނޑައަޅާނެ ގޮތުގެ އުސޫލުން އިސްތިސްނާވާ ޙާލަތްތައް އިތުރުކޮށްފި
11 ޖެނުއަރީ 2023 | ބުދަ 08:23އެވޯޑްކުރުމުގައި އަމަލުކުރަންވީ ގޮތުގެ ހާއްސަ އުސޫލުތައް ބަޔާން ކޮށްފައިވޭ
ފިނޭންސް މިނިސްޓްރީ
އިމާރާތްކުރުމުގެ މަސައްކަތްތައް އެވޯޑް ކުރެވޭނެ އަދަދު ކަނޑައަޅާނެ ގޮތުގެ އުސޫލަށް 1 ވަނަ އިޞްލާޙު ގެނައުމުގެ އުސޫލަށް އަމަލު ކުރަން ފަށައިފިއެވެ.
ބުދަ ދުވަހު އަމަލު ކުރަން ފެށީ މި އިސްލާޙުގައި ވަނީ ނޭށަނަލް ޓެންޑަރުން ކުރިޔަށްގެންދާ އިމާރާތްކުރުމުގެ މަސައްކަތްތައް އެވޯޑް ކުރެވޭނެ އަދަދު ކަނޑައަޅާނެ ގޮތުގެ އުސޫލުން އިސްތިސްނާ ވާ ޙާލަތްތައް އިތުރު ކޮށްފައެވެ.
މީގެ ކުރިން އިސްތިސްނާ ޙާލަތްތަކުގެ ތެރޭގައި ހިމެނެނީ، ކޮންޓްރެކްޓަރ ފައިނޭންސް ނުވަތަ ޑިފަރޑް ޕޭމަންޓް ގޮތުގައި އިއުލާނުކޮށްގެން ކުރިޔަށްގެންދާ މަސައްކަތްތަކާއި، ލޯނާއި ގްރާންޓުގެ ގޮތުގައި ލިބޭ ފައިސާއިން ކުރިޔަށްގެންދަން ނިންމައިފައިވާ ޕްރޮކިއުމަންޓްތަކުގައި، އެ ލޯނު ނުވަތަ ގްރާންޓް ދޭ ފަރާތުގެ ޕްރޮކިއުމަންޓް އުސޫލުތަކަށް އަމަލުކުރަން ލާޒިމުކުރާ ޕްރޮކިއުމަންޓްތަކުގެ މަސައްކަތްތަކުގެ އިތުރުން، ލޯނު ނުވަތަ ގްރާންޓް ދޭ ފަރާތުން، ވަކި ފަރާތަކަށް ނުވަތަ ފަރާތްތަކަކަށް މަސައްކަތް ހަވާލުކުރުމަށް ޝަރުތުކުރާ މަސައްކަތްތަކާއި، ދައުލަތުގެ މާލިއްޔަތުގެ ގަވާއިދުގެ 10.27 ވަނަ މާއްދާގެ ދަށުން އެވޯޑުކުރެވޭ މަސައްކަތްތަކެވެ.
އެހެންނަމަވެސް، ބުދަ ދުވަހު އަމަލު ކުރަން ފެށި އިސްލާޙުގެ ދަށުން ވަނީ ދައުލަތުގެ އާންމު މަންފާއަކަށް ޓަކައި ހާސިލުކުރަން ބޭނުންވާ އިޤްތިޞާދީ ސިޔާސަތެއްގެ ދަށުން ނުވަތަ އިޖުތިމާޢީ ސިޔާސަތެއްގެ ދަށުން ކްރޮސް ސަބްސިޑީގެ އުސޫލުން ހިންގާ ޢުމްރާނީ ތަރައްޤީގެ މަޝްރޫޢުތައްވެސް މި އުސޫލުގެ ދަށުން އިސްތިސްނާ ކޮށްފައެވެ.
އޭގެ އިތުރުން، މި އިސްލާޙުގައި ވަނީ ކްރޮސް ސަބްސިޑީ މާނަ ކުރާ ގޮތްވެސް ބަޔާންކޮށްފައެވެ. އެގޮތުން ކްރޮސް ސަބްސިޑީ ކަމަށް ބުނެފައިވަނީ ކްރޮސް ސަބްސިޑީގެ ގޮތުގައި ފަތުރުވެރިކަމުގެ ބޭނުމަށް ރަށް، ބިން ނުވަތަ ފަޅު ކުއްޔަށް ދިނުމާބެހޭ ގަވާއިދުގެ 10 ވަނަ މާއްދާގެ (ށ) ގައި ބަޔާންކޮށްފައިވާ ކްރޮސް ސަބްސިޑީއަށެވެ.
ނޭށަނަލް ޓެންޑަރުން ކުރިޔަށްގެންދާ އިމާރާތްކުރުމުގެ މަސައްކަތްތައް އެވޯޑް ކުރެވޭނެ އަދަދު ކަނޑައަޅާނެ ގޮތުގެ އުސޫލަކީ އިމާރާތްކުރުމުގެ އަމަލީ މަސައްކަތްކުރާ ފަރާތްތަކުގެ ގަވާއިދުގައި ބަޔާންކޮށްފައިވާ، ނޭށަނަލް ޓެންޑަރުން ކުރިޔަށްގެންދާ، ބައެއް ދާއިރާތަކުގެ ޕްރޮކިއުމަންޓުގެ މަސައްކަތް ކުރިޔަށް ގެންދިއުމުގައްޔާއި، އެވޯޑްކުރުމުގައި އަމަލުކުރަންވީ ގޮތުގެ ހާއްސަ އުސޫލުތައް ބަޔާންކުރުމަށް ޓަކައި، ދައުލަތުގެ މާލިއްޔަތުގެ ގަވާއިދުގެ ދަށުން އެކުލަވައިލައިފައިވަ އުސޫލެކެވެ.
މި އުސޫލުގެ ދަށުން މަސައްކަތް އެވޯޑު ކުރުމުގައި، އެންމެ ގިނަވެގެން އެވޯޑު ކުރެވޭނެ މިންވަރު ނުވަތަ އަދަދު ކަނޑައެޅުމުގައި އަމަލުކުރާނެ ގޮތުގެ ތާވަލެއް ވަނީ އެކުލަވާލާފައެވެ.
މި އުސޫލުގެ މަގުސަދަކީ ނޭށަނަލް ޓެންޑަރ ބޯޑުން އެވޯޑުކުރާ މަސައްކަތްތައް ވީހާވެސް ގިނަ ފަރާތްތަކަށް ލިބުމަށް މަގުފަހިކުރުމާއި، ނޭށަނަލް ޓެންޑަރ ބޯޑުން ބީލަންވެރިންނަށް އެވޯޑުކުރާ މަސައްކަތްތައް ކަނޑައެޅިފައިވާ މުއްދަތަށް ނިންމުމަށް ބާރުއެޅުމުގެ އިތުރުން، ނޭށަނަލް ޓެންޑަރ ބޯޑުން ބީލަންވެރިއަކަށް އެއްފަހަރާ އެވޯޑުކުރެވޭނެ މަސައްކަތުގެ އަދަދު ކަނޑައެޅުމެވެ.
