ޑެނީ އަލްވޭސް އަންހެނަކަށް ޖިންސީ ގޯނާ ކުރި މައްސަލައެއް ބަލަން ފަށައިފި

ސްޕެއިންގެ ބާސެލޯނާ އަށް ކުރި ކުޅުނު ބްރެޒިލްގެ ޑިފެންޑަރު ޑެނީ އަލްވޭސް އަންހެނަކަށް ޖިންސީ ގޯނާ ކުރި ކަމަށް ބުނާ މައްސަލައެއް ބަލަން ފަށައިފި އެވެ.

ސްޕެއިންގެ ކެޓަލޯނިއާގެ ސްޕްރީމް ކޯޓުން ބަލަމުން އަންނަ މި މައްސަލަ އަކީ އުމުރުން 39 އަހަރުގެ އަލްވޭސް، މިދިޔަ ޑިސެމްބަރު މަހު ކެޓަލޯނިއާގެ ނައިޓް ކުލަބެއްގައި ޕާޓީ ކުރުމުގެ ތެރޭގައި އަންހެނަކަށް ޖިންސީ ގޯނާ ކުރި ކަމަށް ބުނާ މައްސަލަ އެކެވެ. އެ ކޯޓުން ބުނީ މިހާރު އެ މައްސަލައާ ގުޅިގެން ބަލަން ޖެހޭ އެންމެހާ ކަންކަން ބަލަމުން އަންނަ ކަމަށެވެ. އެ ކޯޓުން އާންމު ކުރި ސްޓޭޓުމަންޓެއްގައި އަލްވޭސްގެ ނަން ހާމަކޮށްފައެއް ނުވެ އެވެ. ނަމަވެސް އެ ކޯޓުގެ މީޑިއާ އޮފިޝަލު މީޑިއާތަކަށް މައުލޫމާތު ދެމުން ބުނީ، އެ މައްސަލަ އާއި އަލްވޭސްއާ ގުޅުމެއް އޮތް ކަމަށެވެ. ނަމަވެސް އެ މައްސަލައިގެ އިތުރު ތަފްސީލެއް ނޭނގޭ ކަމަށެވެ.

އެ ކޯޓުން އަލްވޭސްގެ މައްސަލަ ބަލަމުން އަންނައިރު، އޭނާ ވަނީ އެ ތުހުމަތުތަކަށް އިންކާރުކޮށްފަ އެވެ. އަލްވޭސް ބުނީ މިދިޔަ ޑިސެމްބަރު ރަހުމްތެރިންތަކަކާއެކު އޭނާ ޕާޓީ ކުރުމަށް ދިޔަ ކަމަށެވެ. ނަމަވެސް އޭނާއާ ގުޅުވައިގެން ދައްކަނީ އެއްވެސް އަސްލެއް ނެތް ވާހަކަތަކެއް ކަމަށެވެ. މީގެ އިތުރުން އަލްވޭސް ބުނީ އޭނާ އަކީ އަންހެނަކަށް އެފަދަ ކަމެއް ކުރާނެ މީހެއް ނޫން ކަމަށާއި، އަންހެނުންނަށް ނުހަނު އިޙުތިރާމް ކުރާ ކަމަށެވެ.

އަލްވޭސް ވަނީ މިދިޔަ އަހަރު ޤަތަރުގައި ނިމުނު ފީފާ ވޯލްޑް ކަޕްގައި ވެސް ކުޅެފަ އެވެ. މުބާރާތުގެ ގްރޫޕް ސްޓޭޖުގައި ބްރެޒިލް އިން ކެމަރޫންއާ ދެކޮޅަށް ކުޅުނު މެޗުގައި އޭނާ ކުޅުނެވެ. އެއާއެކު އަލްވޭސް ވެގެން ގޮސްފައިވަނީ ވޯލްޑް ކަޕްގައި ބްރެޒިލަށް ކުޅުނު އެންމެ ދުވަސްވީ ކުޅުންތެރިޔާ އަށެވެ. މީގެ އިތުރުން އަލްވޭސް އަކީ ފުޓުބޯޅައިގެ ތާރީޚުގައި ވެސް އެންމެ ގިނަ ޓްރޮފީ ކާމިޔާބުކޮށްފައިވާ ކުޅުންތެރިޔާ އެވެ. އަލްވޭސް ވަނީ ޖުމުލަ 43 ޓްރޮފީ ކާމިޔާބުކޮށްފަ އެވެ.