ޔާމީނުގެ ޙުކުމުގެ ޝަރީއަތް ނިމުނު ގޮތުގެ ރިޕޯޓު މުއްދަތުގެ ތެރޭގައި ދޫކުރެވޭނެ: ކޯޓު
މިހާތަަނަށްވެސް ޙުކުމް އިސްތިއުނާފަށް ހުށައަޅާފައެއް ނުވޭ
ކުރީގެ ރައީސް އަބްދުﷲ ޔާމީން
ވ އާރަށު ހިޔާނާތުގެ މައްސަލައިގައި ރައީސް އަބްދުﷲ ޔާމީނަށް ކޮށްފައިވާ ޙުކުމް އިސްތިއުނާފު ކުރުމަށް އަދި ދިވެހިރާއްޖޭގެ ހައިކޯޓަށް ހުށައަޅާފައެއް ނުވެއެވެ.
ވ އާރަށު ހިޔާނާތުގެ މައްސަލައިގައި ޔާމީނު 11 އަހަރަށް ޖަލަށް ލައި، 5 މިލިއަން ޑޮލަރުން ޖޫރިމަނާ ކުރުމަށް ނިންމީ މިދިޔަ ޑިސެމްބަރު މަހުގެ 25 ވަނަ ދުވަހުއެވެ.
އެ ޙުކުމް އިސްތިއުނާފު ކުރައްވާނެކަމަށް ޔާމީނުގެ ވަކީލުން ވިދާޅުވެފައިވެއެވެ. އެގޮތުން މައްސަލައިގެ ޚުލާސާ ރިޕޯޓު ނުލިބިގެން ޔާމީނުގެ ވަކީލުން އިހުތިޖާޖުވެސް ކުރައްވާފައިވެއެވެ.
އެހެންނަމަވެސް ކްރިމިނަލް ކޯޓުން ޖެހިގެން އައި ދުވަހު ވަނީ ޚުލާސާ ރިޕޯޓު ދޫކޮށްފައެވެ. އަދި ޔާމީނުގެ ވަކީލުން އޭރު ވަނީ އިސްތިއުނާފު މަރުޙަލާ އަށް ހުށަހެޅުމަށް ފޯމު ތައްޔާރު ކުރުމުގެ މަސައްކަތް ކުރިއަށްދާކަމަށް ވިދާޅުވެފައެވެ.
އެހެންނަމަވެސް މިހާތަަނަށްވެސް ޙުކުމް އިސްތިއުނާފަށް ހުށައަޅާފައެއް ނުވެއެވެ.
މިކަމާ ގުޅޭގޮތުން ޔާމީނުގެ ވަކީލު އާދަމް ޝަމީމް ވިދާޅުވީ، ހެޔޮވަރު ވަރަކަށް އޮޅިފަ އޮތް ކަންވާރު ބޮޅެއް ފިލުވާލަން ދުވަސްކޮޅެއް ނަގާނެ ކަމަށާއި، ޖިނާޢީ މައްސަލައެއްގައި ދިފާޢީ ވަކީލުކަން ކުރުމަކީ އެހާ ފަސޭހަ ކަމެއް ނޫން ކަމަށެވެ.
އަދި އެއީ ގިނަ ވަގުތު ބޭނުންވާ ކަމެއްކަމަށް ޝަމީމް ވިދާޅުވިއެވެ.
ޖިނާއީ މައްސަލަތައް ހައިކޯޓުގައި އިސްތިއުނާފު ކުރުމަށް ބަންދު ދުވަސްތައް ނުހިމަނައި 60 ދުވަސް ލިބެއެވެ.
މީގެ އިތުރުން، ޔާމީނުގެ ވަކީލު އަބްދުﷲ ޝިޔާޒު ވިދާޅުވީ، ކުރިމިނަލް ކޯޓުން ރައީސް ޔާމީންގެ މައްޗަށް އިއްވާފައިވާ ހުކުމްތައް އިސްތިއުނާފު ކުރުމަށްޓަކައި ޝަރީއަތް ނިމުނު ގޮތުގެ ރިޕޯޓު މަޙްޟަރު ބަޔާންތަކާއެކު ހޯދުމަށް 2022 ޑިސެމްބަރު 25 ވަނަ ދުވަހު އެދިފައިވީ ނަމަވެސް މިއަދާހަމައަށްވެސް އެ ރިޕޯޓް ލިބިވަޑައިގެންފައިނުވާ ކަމަށެވެ.
އެހެންނަމަވެސް، ޝަރީއަތުގެ ޚުލާސާއެއް އެކުލެވޭ ގޮަތަށް ޚުލާސާ ރިޕޯޓު ދޫކޮށްފައިވާކަމަށް ޝިޔާޒު ވިދާޅުވިއެވެ.
ކޯޓުން ދޫކުރި ރިޕޯޓުގައި ދެފަރާތުން ދެއްކި ވާހަކަ އަދި ޝަރީއަތުގައި ކަން ހިނގި ގޮތް ފުރިހަމައަށް ލިޔެފައި ނެތްކަން ފާހަގަކުރައްވައި ޝިޔާޒު ވިދާޅުވީ، އިސްތިއުނާފްގެ އެއް މަސްދަރަކަށްވާނީ، ދެފަރާތުން ޝަރީއަތުގައި ދެއްކި ވާހަކަ ހިމެނޭ މަޙްޟަރު ބަޔާންތައް ކަމަށެވެ.
ޚުލާސާ ރިޕޯޓު ދިނުމުގައި ކޯޓުން ޢަމަލުކުރި ގޮތަށް ބަލާއިރު، ޝަރީއަތް ނިމުނުގޮތުގެ ރިޕޯޓު ދޫކުރުމަށް ވެސް ޤާނޫނުގައި ބަޔާންކޮށްފައިވާ އެންމެ ދިގު މުއްދަތު ކޯޓުން ބޭނުން ކުރާނެ ކަމަށް ބެލެވޭކަމަށްވެސް ޝިޔާޒު ވިދާޅުވިއެވެ.
އެކަމާ ގުޅޭގޮތުން ރާއްޖެއެމްވީން ސުވާލުކުރުމުން ކްރިމިނަލް ކޯޓުގެ މީޑިއާ އޮފިޝަލު ވިދާޅުވީ، ޚުލާސާ ރިޕޯޓަކީ މީގެ ކުރިން ކޯޓުން ތައްޔާރުކުރަމުން ދިޔަ އެއްޗެއް ކަމަށެވެ.
އޭރު ޚުލާސާ ރިޕޯޓާއި، ޝަރީއަތް ނިމުނު ގޮތުގެ ރިޕޯޓު ދޫކުރަމުން ދިޔަ ނަމަވެސް މިހާރު ސުޕްރީމް ކޯޓުގެ އައު ޕްރެކްޓިސް ޑައިރެކްޝަންގެ ދަށުން ދޫކުރަނީ ޝަރީއަތް ނިމުނު ގޮތް ކަމަށް ވެބްސައިޓުގައި ހިމަނާފައިވާ ރިޕޯޓާއި، ޝަރީއަތް ނިމުނު ގޮތުގެ ރިޕޯޓެވެ.
ޙުކުމް ކުރި ދުވަހުން ފެށިގެން ރަސްމީ 14 ދުވަސް ތެރޭގައި ޝަރީއަތް ނިމުނު ގޮތުގެ ރިޕޯޓު ދޫކުރަން ޖެހޭކަމަށް ސުޕްރީމް ކޯޓުގެ ޕްރެކްޓިސް ޑައިރެކްޝަންގައި ބަޔާންކޮށްފައިވާއިރު، އެ މުއްދަތުގެ ތެރޭގައި ރިޕޯޓު ދޫކުރެވޭނެކަމަށް އޭނާ ވިދާޅުވިއެވެ.
