އާންމު ޝެޑިއުލާ އެއްގޮތަށް އާރްޓީއެލް މިނީ ބަހުގެ ދަތުރުތައް ފަށާފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.
ނީލަން ފިހާރާގައި ހިނގި އަލިފާނުގެ ހާދިސާއާ ގުޅިގެން ހޯމަ ދުވަހު އެމްޓީސީސީން ވަނީ އާރްޓީއެލް ބަހުގެ ޚިދުމަތްދޭ ރޫޓުތަކަށް ބަދަލުތަކެއް ގެނެސްފައެވެ. މިގޮތުން ރޫޓް 1 ކަމުގައިވާ ވެސްޓް ޕާކުން ހުޅުމާލެ ފޭސް 1ށް ބަސް ދާ ރޫޓް އަދި ރޫޓް 7 ކަމުގައިވާ ހުޅުމާލެ ފޭސް 2ން ވެސްޓްޕާކުގެ ބަހުގެ ޚިދުމަތް ވަގުތީ ގޮތުން ކާނިވާ ސަރަހައްދަށް ބަދަލުކޮށްފައިވެއެވެ.
އެމްޓީސީސީން އަންގާރަ ދުވަހު ބުނީ އަލިފާނުގެ ހާދިސާއަށްފަހު ބޮޑުތަކުރުފާނު މަގު ހުޅުވާލާފައިވުމާއެކު، އާންމު ޝެޑިއުލާ އެއްގޮތަށް ބަހުގެ ދަތުރުތައް ފަށާފައިވާކަމަށެވެ. މިގޮތުން ރޫޓު 1 ކަމުގައިވާ ވެސްޓް ޕާކުން ހުޅުމާލެ ފޭސް 1 އަށް ދާ ބަހުގެ ރޫޓާއި، ރޫޓު 3 ކަމުގައިވާ ވެސްޓްޕާކުން ވެލާނާ އެއަރޕޯޓަށް ދާ ރޫޓާއި، ހުޅުމާލެ ފޭސް 2 އިން ވެސްޓްޕާކަށް ދާ ރޫޓުގެ ދަތުރުތައް މިހާރު އާންމު ޝެޑިއުލާ އެއްގޮތަށް ދާނެ ކަމަށް އެ ކުންފުނިން ވަނީ ބުނެފައެވެ.
