ކޮވިޑް-19 ގެ ހާލަތުގެ ކުރިން ހައްޖުވެރިން ހައްޖުވުމަށް ފުރުސަތުދިން އަދަދަށް މިއަހަރު ފުރުސަތު ދޭނެކަން ސައުދީ ސަރުކާރުން ހާމަކޮށްފިއެވެ.

ކޮވިޑް-19ގެ ބަލިމަޑުކަމާއެކު ސައުދީ ސަރުކާރުން މި ފުރުސަތު ހުޅުވާލާފައިވަނީ ވަކި އުމުރުފުރާއަކަށް އަދި ވަކި އަދަދެއް ކަނޑައަޅައިގެންނެވެ. މިމަހުގެ 9 އިން 12 އަށް ޖިއްދާގައި ކުރިއަށްދާ "އެކްސްޕޯ ހައްޖު" ކޮންފަރެންސް ފެށުމުގެ ގޮތުން ވާހަކަދައްކަވަމުން ސައުދީގެ މިނިސްޓަރ އޮފް ހައްޖު އެންޑް އުމްރާ ޑރ. ތައުފީގް އަލް ރަބީއާ ވަނީ 3 އަހަރަށްފަހު ލުއިތަކެއް ދޭން ނިންމަވާފައިވާކަން އިއުލާންކުރައްވާފައެވެ.

އޭނާ ވިދާޅުވީ މިއަހަރުގެ ހައްޖުގެ އަޅުކަމަށް، ދުނިޔޭގެ އެކި ކަންކޮޅުތަކުން ހައްޖަށް މީހުން ފޮނުވުމުގެ ހުއްދަ އޮތް މިޝަންތަކަށް ފުރުސަތު ދެވިގެންދާނެ ކަމަށެވެ. އަދި ކޮވިޑްގެ ކުރިން ދިން އަދަދަށް ފުރުސަތު ދެވިގެންދާނެ ކަމަށާއި، ހުރިހާ އުމުރުފުރާއެއްގެ މީހުންނަށްވެސް ފުރުސަތު ދޭން ނިންމަވާފައިވާކަމަށް އޭނާ ވިދާޅުވިއެވެ.

ޑރ. ތައުފީގު ވިދާޅުވީ ހައްޖުވެރިންނަށް ރަނގަޅު ތަޖުރިބާއެއް ހޯދައިދިނުމަށް ގިނަ މަސައްކަތްތަކެއް ކޮށްފައިވާނެ ކަމަށެވެ. މިގޮތުން ވިސާގެ މުއްދަތު 30 ދުވަހުން 90 ދުވަހަށް އިތުރުކޮށްފައިވާކަމަށާއި، އިތުރު ފެސިލިޓީތައް ގާއިމްކުރުމުގެ މަސައްކަތް ކުރަމުންދާކަމަށް އޭނާ ވިދާޅުވިއެވެ.

ކޮވިޑް-19ގެ ކުރިން 2019 ވަނަ އަހަރުގެ ހައްޖުގެ އަޅުކަމުގައި 2.5 މިލިއަން މުސްލިމުން ބައިވެރިވެފައިވެއެވެ. 2009 ވަނަ އަހަރުން 2019 ވަނަ އަހަރުގެ ނިޔަލަށް ސައުދީ ސަރުކާރުން ވަނީ އެވަރޭޖްކޮށް 2.3 މިލިއަން މުސްލިމުންނަށް ހައްޖުގެ އަޅުކަން އަދާކުރުމަށް ފުރުސަތު ދީފައެވެ.