މުޒާހަރާ ތެރެއިން، އުމުރުން ދުވަސްވީ މީހާ ހައްޔަރުކުރި މައްސަލަ ބަލާނެ: ސީޕީ
9 ޖެނުއަރީ 2023 | ހޯމަ 11:01ސީޕީ ކުރެއްވި ޓްވީޓްގައި ވިދާޅުވީ، ފުލުހުންގެ ބެލުމުގެ ދަށަށް އަންހެން މީހާ ގެންދިޔަގޮތް ސަމާލުކަމަށް އައިސްފައިވާކަމަށާއި، އެކަން ބަލަމުންދާކަމަށް
އާދިއްތަ ދުވަހުގެ ރޭ ކުރިއަށްދިޔަ މުޒާހަރާގައި ފުލުހުން، އުމުރުން ދުވަސްވީ މީހަކު ހައްޔަރުކުރަނީ
ކުރީގެ ރައީސް އަބްދުﷲ ޔާމީން މިނިވަންކުރުމަށް ގޮވާލައި އިދިކޮޅު ޕީޕީއެމް/ޕީއެންސީ ކޯލިޝަނުން ކުރިއަށްގެންދާ ސިލްސިލާ މުޒާހަރާތަކުގެ ތެރެއިން، އާދިއްތަ ދުވަހުގެ ރޭ ކުރިއަށްދިޔަ މުޒާހަރާގައި އުމުރުން ދުވަސްވީ އަންހެނަކު ހައްޔަރުކުރުމުގައި ފުލުހުން އަމަލުކުރި ގޮތާމެދު ގިނަ ބައެއްގެ ފާޑުކިޔުން ފުލުހުންނަށް އަމާޒުވެއްޖެއެވެ.
އެއްވުމުގައި އަންހެން ބައިވެރިންތަކަކާ ދިމާއަށް ދެ ފުލުހަކު ދުވެ އެ ތަނުން އުމުރުން ދުވަސްވީ އަންހެނަކު ހައްޔަރުކުރުމުގައި އަމަލުކުރި ގޮތް ފެންނަ ވީޑިއޯތަކެއް ސޯޝަލް މީޑިއާގައި އަންނަނީ ދައުރުވަމުންނެވެ. ވީޑިއޯއިން ފެންނަނީ އިހުތިޖާޖުކުރަމުން ދިޔަ އުމުރުން ދުވަސްވީ އަންހެން މީހާ ދުވެފައި ދަނިކޮށް ދެ ފުލުހަކު އޭނާ ހިފަހައްޓާ މަންޒަރެވެ. އަދި އަތުގައި އޮތް ދިދަ އަތުލައެވެ. އަތް ކުޑަ ހުޅާ ހަމައިން ލަންބުވާލުމަށްފަހު އޭނާ ގަދަކަމުން ގެންދާތަންވެސް ފެނެއެވެ.
އަންހެން މީހާ ހައްޔަރުކުރި މަންޒަރު ދައްކުވައިދޭ ވީޑިއޯއާއި ފޮޓޯ ސޯޝަލް މީޑިޔާގައި ޕޯސްޓު ކުރަމުން ބައެއް އާންމު ރައްޔިތުން ވަނީ "އެހާ އަނިޔާވެރިވާން ނުވާނެ" ކަމަށް ބުނެފައެވެ. މިކަމާގުޅިގެން ރައްޔިތުންގެ މަޖިލީހުގެ ބައެއް މެމްބަރުންވެސް ޝުއޫރު ފާޅުކުރައްވާފައިވެއެވެ. އެގޮތުން މަޑަވެލީ ދާއިރާގެ މެމްބަރު ހުސައިން ފިރުޝާން ވަނީ "ހެޔޮ ނުވާނެ އެހެން ހަދަން" މިފަދައިން ވިދާޅުވެ ޓްވީޓްކުރައްވާފައެވެ.
އަދި މާފަންނު އުތުރު ދާއިރާގެ މެމްބަރު އިމްތިޔާރު ފަހުމީ ވަނީ، ފަހަތުން ދުވެގޮސް، ޝުއޫރުފާޅުކުރާ އުމުރުން ދުވަސްވީ އަންހެން ބޭފުޅުން ހިފާ ހައްޔަރުކުރަންޖެހޭ ސަބަބަކީ ކޮބައިތޯ ސުވާލުކުރައްވާފައެވެ.
ކުރީގެ ޑިފެންސް މިނިސްޓަރު އަދި އެމްއެންޕީގެ ރައީސްގެ އިތުރުން، ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު މުހައްމަދު ނާޒިމް ވަނީ، ސިޔާސީ އެއްވުންތަކުގައި ހާލަތާ ނުބައްދަލު ބާރުގެ ބޭނުންކޮށްގެން މީހުން ހައްޔަރުކޮށް އަދި އުމުރުން ދުވަސްވީ މީހުންނަށް ފުރައްސާރަކުރުމަކީ ވަރަށް ދެފުށް ދެގޮތްކަން އަންގައިދޭ ހެތްކެއްކަމަށް ވިދާޅުވެ ޓްވީޓްކުރައްވާފައެވެ.
ފުލުހުންނަށް ގިނަ ބަޔެއްގެ ފާޑުކިޔުން އަމާޒުވެފައިވާއިރު، އެކަމާގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓްވީޓްގައި ވިދާޅުވީ، ފުލުހުންގެ ބެލުމުގެދަށަށް އަންހެން މީހާ ގެންދިޔަ ގޮތް ސަމާލުކަމަށް އައިސްފައިވާކަމަށާއި، އެކަން ބަލަމުންދާކަމަށެވެ.
ޕީޕީއެމްގެ ވަކީލުންވަނީ، އެ އެއްވުންތަކުގައި ބައިވެރިވާ މީހުން ހައްޔަރުކުރަނީ އެއްވެސް އުސޫލެއް ނެތި "މީހުންތައް ޖަހައިގަނެގެން" ދާފަދަ ގޮތަކަށް ކަމަށް ތުހުމަތު ކުރައްވާފައެވެ. އަދި އެމައްސަލަ ނޭޝަނަލް އިންޓެގްރިޓީ ކޮމިޝަނަށާއި އެޗްއާރުސީއެމްއަށް ހުށަހަޅާނެކަމަށް ވަނީ ވިދާޅުވެފައެވެ.
