ޗާލު މިސްކިތް ހަރަކާތުން 7 ލައްކައަށްވުރެ ގިނަ ރުފިޔާ
މި ހަރަކާތުގެ ފުރަތަމަ ދުވަހު 313,397.90 ރުފިޔާ ލިބުނު
މާލޭގެ މިސްކިތްތައް މަރާމާތުކުރުމަށް ފަންޑު ހޯދުމުގެ ޓެލެތޯން
މާލެ ސިޓީ ކައުންސިލުން ކުރިއަށްގެންދިޔަ "ޗާލު މިސްކިތް" ހަރަކާތުން 744،713.90 ރުފިޔާ ލިބިއްޖެއެވެ.
ހަރަކާތް 2 ދުވަހެއްގެ މައްޗަށް ބަހާލައިގެން މާލެ ސިޓީ ކައުންސިލުން ކުރިއަށް ގެންދިޔައީ މާލޭގެ އާޓިފިޝަލް ބީޗް ސަރަހައްދުގައެވެ. މި ހަރަކާތުގެ ފުރަތަމަ ދުވަހު 313,397.90 ރުފިޔާ ވަނީ ލިބިފައެވެ.
މާލެ ސިޓީ ކައުންސިލުން މިސްކިތްތައް މަރާމާތު ކުރަން ފަންޑު ހޯދުމަށް ހަރަކާތެއް ބޭއްވުމަށް ނިންމީ މިސްކިތްތަކަކީ ސިޓީ ކައުންސިލުން އެންމެ އިސްކަމެއް ދީގެން ކުރަމުން އަންނަ ކަމެއް ކަމަށްވުމާއެކު، މިސްކިތްތައް ކައުންސިލާ ސަރުކާރުން ހަވާލުކުރީ އެ ތަންތަން މަރާމާތު ކުރުމަށް އެކަށީގެންވާ ބަޖެޓަކާއި ނުލާ ކަމަށް ވުމުން ކަމަށް ކައުންސިލުން ބުނެއެވެ.
މާލެ ސިޓީ ކައުންސިލުގެ މީޑީއާ ގްރޫޕުގައި ނޫސްވެރިންނަށް މައުލޫމާތު ހިއްސާ ކުރައްވަމުން މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވިދާޅުވީ 2021 އަދި 2022 ވަނަ އަހަރު ސަރުކާރުން މާލެ ސަރަހައްދުގެ މިސްކިތްތައް ބެލެހެއްޓުމަށް ހަމަޖައްސައިދީފައިވަނީ އެންމެ 1 މިލިއަން ރުފިޔާ ކަމަށާއި އޭގެ ބޭރުން މާލެ ސިޓީ ކައުންސިލުގެ އާމްދަނީ ބަޖެޓުން 10 މިލިއަން ރުފިޔާ މާލެ ސިޓީ ކައުންސިލުން މިސްކިތްތައް މަރާމާތު ކުރުމަށް ހަރަދުކޮށްފައިވާ ކަމަށެވެ.
ނޫސްވެރިންނާ މައުލޫމާތު ހިއްސާކުރައްވަމުން މޭޔަރު އިތުރަށް ވިދާޅުވީ ކައުންސިލުގެ އާމްދަނީ ބަޖެޓުން 10 މިލިއަން ރުފިޔާގެ މަރާމާތް ކުރި ނަމަވެސް އަދިވެސް ބައެއް މިސްކިތްތަކުގެ މަރާމާތްތައް ނުކުރެވި ހުރި ކަމަށާއި އެ މަރާމާތްތައް ކުރުމަށް 9 މިލިއަން ރުފިޔާ ހަރަދުވާނެ ކަމަށް ބެލެވޭ ކަމަށެވެ. އަދި އެ 9 މިލިއަން ހަރަދު ވާނީ ކޮންކޮން މަރާމާތްތަކަކަށް ކަން މޭޔަރު ވަނީ ނޫސްވެރިންނާ ހިއްސާ ކުރައްވާފައެވެ.
މާލެ ސަރަހައްދުގެ މިސްކިތްތައް ބެލެހެއްޓުމަކީ ލާމަރުކަޒީ ގާނޫނުގެ ދަށުން މާލެ ސިޓީ ކައުންސިލުން ކުރަންޖެހޭ ކަމެކެވެ. އެގޮތުން މިވަގުތު ސިޓީ ކައުންސިލުން މާލެއާއި ވިލިމާލޭގައި 34 މިސްކިތެއް ބަލަހައްޓަމުން ގެންދެއެވެ.
މާލެ ސިޓީ ކައުންސިލުން މިހެން ބުނެފައިވާއިރު އިސްލާމިކް މިނިސްޓަރު ޑރ. އަހްމަދު ޒާހިރު އަލީ ވިދާޅުވީ، އެ މިނިސްޓްރީގެ މިސްކިތު ފަންޑުން 2020 ވަނަ އަހަރު މިސްކިތްތައް މަރާމާތުކުރުމަށް މާލޭ ސިޓީ ކައުންސިލަށް އެއްމިލިއަން ރުފިޔާ ދީފައިވާއިރު، 2022 ވަނަ އަހަރު ނިމުނުއިރުވެސް އެ ފައިސާ ޚަރަދުކުރި ގޮތުގެ ތަފްސީލު މިނިސްޓްރީއަށް ހުށަހަޅާފައި ނުވާކަމަށެވެ.
އެ ތަފްސީލު ހުށަނާޅައިގެން ސުވާލުކުރުމުން، މިސްކިތްތައް މާރާމާތުކުރުމަށް ދީފައިވާ އެއްމިލިއަން ރުފިޔާ އަދިވެސް ބޭނުންނުކުރާ ކަމަށް ސިޓީ ކައުންސިލުން ބުނެފައިވާކަމަށް މިނިސްޓަރު ވިދާޅުވިއެވެ.
2022 ވަނަ އަހަރުގެ ރޯދަ މަހު މިސްކިތްތައް މަރާމާތު ކުރުމަށް 15 މިލިއަން ރުފިޔާ ހަމަޖެއްސިއިރު، އެއިން ދެ މިލިއަން ރުފިޔާ މާލެ ސިޓީ ކައުންސިލަށް ދޭން ނިންމި ކަމަށްވެސް މިނިސްޓަރު ވިދާޅުވިއެވެ. އެހެންނަމަވެސް ކުރީގެ އެއްމިލިއަން ރުފިޔާ ވެސް ޚަރަދުކުރި ގޮތުގެ ތަފްސީލު ކައުންސިލުން ހުށަހަޅާފައިނުވުމުން، މިސްކިތްތައް މަރާމާތުކުރުމަށްފަހު ބިލްތައް ފޮނުވުމުން ފައިސާ ދޭނެކަމަށް މިނިސްޓްރީން ބުނިކަމަށް މިނިސްޓަރު ވިދާޅުވިއެވެ.
އެހެންނަމަވެސް މިއަދާ ހަމައަށް އައިއިރު އެއްވެސް ބިލެއް ކައުންސިލުން މިނިސްޓްރީއަށް ހުށަހަޅާފައި ނުވާކަމަށް އިސްލާމިކް މިނިސްޓަރު ވިދާޅުވިއެވެ. މިސްކިތްތައް މަރާމާތުކުރުމަށް ސަރުކާރުން އެހީ ފޯރުކޮށްދޭން މަސައްކަތްކުރިނަމަވެސް ކައުންސިލްގެ ފަރާތުން އެކަމަށް އެއްބާރުލުން ނުލިބޭ ކަމަށް މިނިސްޓަރު ވިދާޅުވިއެވެ.
