އިދިކޮޅު ހަރަކާތުގައި ފުލުހުން އަމަލުކުރަމުންދާ ގޮތާއި ގުޅޭ މައްސަލަ އެއް ޕޮލިސް އިންޓަރގްރިޓީ ކޮމިޝަން އާއި އެޗްއާރުސީއެމް އަށް
ޕީއެންސީ އިން ދަނީ ކުރީގެ ރައީސް އަބްދުﷲ ޔާމީން 11 އަހަރަަށް ޖަލަށް ލުމާއި އެކު ސިލްސިލާ ސިޔާސީ ހަރަކާތްތަކެއް ހިންގަމުން
އިދިކޮޅު ކޯލިޝަނުން ބޭއްވި މުޒާހަރާ
ޕްރޮގްރެސިވް ޕާޓީ އޮފް މޯލްޑިވްްސް އިން ކުރިއަށް ގެންދާ ސިޔާސީ ހަރަކާތްތަކުގައި ފުލުހުން ގަވާއިދާއި ޚިލާފަށް އަމަލުކުރަމުންދާ ކަމަށް ބުނެ ހިއުމަން ރައިޓްސް ކޮމިޝަން އެޗްއާރުސީއެމް އާއި ނޭޝަނަލް އިންޓަރގްރިޓީ ކޮމިޝަން އަށް މައްސަލަ އެއް ހުށަހަޅަން އެ ޕާޓީ އިން ނިންމައިފިއެވެ.
އެ ކަމާއި ގުޅޭގޮތުން ހުކުރު ދުވަހު ބޭއްވި ނޫސްވެރިންގެ ބައްދަލުވުމުގައި ޕީޕީއެމްގެ ވަކީލް މުހައްމަދު ރާގިބް ވަނީ ފުލުހުން އަމަލުކުރަނީ ޖިނާއީ އިޖުރާއަތުގެ ޤާނޫނާއި ޤާނޫނުތަކާއި ވެސް ޚިލާފަށް ކަމަށެވެ. ފުލުހުން ސިޔާސީ ހަރަކާތްތަކުން މީހުން ހައްޔަރު ކުރާ އިންޒާރު ދިނުމުގައި އަމަލުކުރަން ޖެހޭ ގޮތަށް އަމަލުކުރަމުން ނުދާ ކަމަށާއި ހައްޔަރުކުރުމަށް ފަހު ހައްޔަރު ކުރާ މީހުން ހައްޔަރުކުރާތާ 12 ގަޑި އިރަށް ވުރެ ގިނަ އިރު ވާއިރު ވެސް ލިޔުމުން އިންޒާރު ނުދޭ ކަމަށް އޭނާ ވިދާޅުވިއެވެ. މީގެ އިތުރުން ހައްޔަރު ކުރާ ބައެއް މީހުން ފުލުހުން ހައްޔަރުކުރާ މީހުންގެ އެއްޗެހި ބާލުވައިގެން، ބަލާ ފާސްކުރާ ކަމަށް ޕީޕީއެމް އިން ބުނާކަމަށް އޭނާ ތުހުމަތު ކުރެއްވިއެވެ. މިފަދަ އަމަލުތައް ފުލުހުން ކުރަނީ ޤާނޫނާއި ޤަވާއިދުތަކަށް ބެލުމެއް ނެތި ކަމަށް އޭނާ ވިދާޅުވިއެެވެ.
ރާގިބް ވިދާޅުވީ ޕީޕީއެމްގެ ހަރަކާތްތައް ހިންގަމުން ދަނީ ފުލުހުންގެ އިރުޝާދާއި އެއްގޮތަށް ޤާނޫނާއި އެއްގޮތަށް ކަމަށެވެ. އެގޮތުން ޕީޕީއެމްގެ އެއްވުންތައް ބާއްވަނީ އެއްވުން ހުއްދަ ސަރަހައްދުގައި ކަަމަށް އޭނާ ފާހަގަކުރެއްވިއެވެ. ނަަމަވެސް ފުލުހުން އިންޒާރަކާއި ނުލާ އުޅަނދުތައް އާއްމުންގެ ތެރެއަށް ވައްދާ މީހުން ހައްޔަރުކޮށްގެން ދަނީ އެއްވެސް އުސޫލެއް ނެތި ކަމަށް އޭނާ ވަނީ ވިދާޅުވެފައެވެ. ރާގިބްގެ އިތުރުން އެ ނޫސްވެރިންގެ ބައްދަލުވުމުގައި ވާހަކަދައްކަވަމުން ޕީޕިއެމްގެ ވަކީލް އަހުމަދު ޝާފިއު ވިދާޅުވީ ފުލުހުން ބައެއް ފަހަރު އަމަލު ކުރަނީ އިދިކޮޅު ސިޔާސީ ހަރަކާތުގެ ބައިވެރިންނަށް ނަފްސާނީ ބިރުވެރިކަމަކާާއި ކުރިމަތިލާން ޖެހޭ ގޮތަށް ކަމަށާއި އެކަމާއި ކަންބޮޑުވާ ކަމަށެވެ.
ޕީޕީއެމް އިން މިފަަދަ މައްސަލަތަކެއް ހުށަހެޅި ނަަމަވެސް އެއީ ކިހާ އަދަދެއްގެ މައްސަލަތަކެއްކަން ހާމައެއް ނުކުރެއެވެ. އަދި މައްސަލަ ހުށަހަޅާނީ ކޮން އިރަކުކަން ހާމައެއް ނުކުރެއެވެ. ޕީޕީއެމް އަދި ޕީއެންސީ އިން ދަނީ ކުރީގެ ރައީސް އަބްދުﷲ ޔާމީން 11 އަހަރަަށް ޖަލަށް ލުމާއި އެކު ސިލްސިލާ ސިޔާސީ ހަރަކާތްތަކެއް ހިންގަމުންނެވެ. އެ ހަރަކާތްތަކުގައި ރައީސް ޔާމީން މިނިވަން ކުރުމަށް ދަނީ ގޮވާލަމުންނެވެ.
