ޗެލްސީ ބަލިކޮށް, މެންޗެސްޓަރ ސިޓީން ޕްރިމިއަރ ލީގު ތާވަލްގެ ދެވަނާގައި ލީޑް ފަސް ޕޮއިންޓަށް ކުޑަކޮށްފިއެވެ.

އެއްވަނާގައި އާސެނަލްއާ ދެމެދު އޮތް ފަރަގު ސިޓީން ކުޑަކުރީ 1-0 ން ޗެލްސީގެ ދަނޑުގައި ޗެލްސީ ބަލިކޮށްގެންނެވެ. މެޗުގެ ހަމައެކަނި ލަނޑު ދެވަނަ ހާފްގައި ޖެހީ ރިޔާދު މާރޭޒްއެވެ. އޭނާ ލަނޑުޖެހީ ގްރީލިޝް ތަނަވަސްކޮށްދިން ފުރުޞަތަކުން 63 ވަނަ މިނެޓުގައެވެ. މިމޮޅާއެކު ސިޓީ ދެވަނާގައި އޮތީ 17 މެޗުން 39 ޕޮއިންޓާއެކުއެވެ. އެއަދަދަށް މެޗު ކުޅެގެން އެއްވަނާގައި އާސެނަލް އޮތީ 44 ޕޮއިންޓާއެކުއެވެ. ޗެލްސީ އޮތީ 25 ޕޮއިންޓާއެކު 10 ވަނާގައެވެ. ޗެމްޕިއަންސްލީގުގެ ޖާގައަކާ ޗެލްސީއާ ދެމެދު 10 ޕޮއިންޓްގެ ފަރަގެއް އެބައޮތެވެ.

މެޗުގެ ފުރަތަމަ ހާފްގައި ރަނގަޅަށް ކުޅުނީ ޗެލްސީންނެވެ. އެކަމަކު އަނިޔާގެ މައްސަލަތަކާއެކު މެޗަށް ނުކުތް ޗެލްސީއަށް ގޯލެއް ޖެހުމުގެ ކާމިޔާބީއެއް ނުލިބުނެވެ. އުނދަގޫ ފުރަތަމަ ހާފަކަށްފަހު ޕެޕް ގާޑިއޯލާ ގެނައި ބައެއް ޓެކްޓިކަލް ބަދަލުތަކާއެކު ސިޓީން ދެވަނަ ހާފްގައި ނަތީޖާ ނެރުނީއެވެ.