ކަޑަޖެހި ސަރުކާރުތައް މާޒީވެފައިވާކަމަށާއި ރައީސް އިބްރާހީމް މުހައްމަދު ސާލިހުއަކީ އެމަނިކުފާނު ރަށްރަށަށް ކޮށްދެއްވާނެ ކަމަށް ވިދާޅުވާ ކަންކަން އެ ވިދާޅުވި ގޮތަށް ކޮށްދެއްވާނެ ބޭފުޅެއް ކަމަށް, މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
އޭނާ މިފަދައިން ވިދާޅުވީ ރ. އަލިފުށީ އެއަރޕޯޓްގެ ޓަރމިނަލްގެ ބިންގާ އެޅުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. ރައީސްގެ އިލްތިމާސަކީ ރައްޔިތުންނަށް އޮޅުވާނުލުން ކަމަށާއި، ރައީސަކީ ބަސްފުޅާއި އަމަލުފުޅު ދިމާވާނެ އިތުބާރުހުރި ބޭފުޅެއް ކަމަށް އޭނާ ވަނީ ވިދާޅުވެފައެވެ. ރައީސް ކަމެއް ކޮށްދެއްވާނެ ކަމަށް ވިދާޅުވެއްޖެނަމަ އެކަން ކޮށްދެއްވާނެކަން ގަބޫލު ނުކުރާނެ އެކަކުވެސް ނުހުންނާނެކަމަށް އާޒިމް ވިދާޅުވިއެވެ. އަލިފުށީ އެއަރޕޯޓުގެ ޓަރމިނަލްގެ މަސައްކަތާ ގުޅޭގޮތުން ވާހަކަފުޅުދައްކަވަމުން އާޒިމް ވިދާޅުވީ، އެ މަސައްކަތް ފެށުމަށް މަޝްވަރާކުރިއިރު އެކަން ކުރާނެކަމާމެދު ބައެއް މީހުން ސުވާލު އުފެއްދި ކަމަށެވެ. އެކަން އެގޮތަށް ވަނީ ކުރީ ސަރުކާރުތަކުން އިންތިޚާބުތަކާ ދިމާކޮށް ކަޑަޖެހުމަށްފަހު އެ މަޝްރޫއުތައް ނުނިންމާތީ ކަމަށް އާޒިމް ވިދާޅުވިއެވެ. އާޒިމް ވިދާޅުވީ އެމްޓީސީސީން ކަންކަން ކުރަމުން ދަނީ އެ ކުންފުނިން އަމަލުކުރާނެ ކަަމަށް ބުނާ ގޮތާ އެއްގޮތަށް ކަމަށާއި، އެ އިތުބާރު ކައުންސިލްތަކަށްވެސް އޮންނާނެ ކަމަށެވެ.
އަލިފުށީ އެއަރޕޯޓާއި ބިން ހިއްކުމުގެ މަސައްކަތަކީ ސަރުކާރަކުން ކުންފުންޏަކާ ހަވާލުކުރި އެންމެ ބޮޑު މަސައްކަތް ކަމަށާއި، އެކަމުން ރަމްޒުކޮށްދެނީ މި ސަރުކާރުން ދިވެހި ކުންފުނިތަކަށް ކުރާ އިތުބާރުކަމަށް އޭނާ ވިދާޅުވިއެވެ. އެމްޓީސީސީއަކީ ހަވާލުކުރާ ކޮންމެ މަސައްކަތެއް އިތުބާރާއި ޔަގީންކަމާއެކު ކުރާ ކުންފުންޏެއް ކަމަށް ވެސް އާޒިމް ވިދާޅުވިއެވެ. މި އަހަރުގެ ތެރޭގައި އެ އެއަރޕޯޓުގައި ފްލައިޓް ޖެއްސުމުގެ އުންމީދު އެބައޮތް ކަމަށް އާޒިމްގެ ވާހަަކަފުޅުގައި ވަނީ ފާހަގަކުރައްވާފައެވެ.
