ސައުދީ ޕްރޯ ލީގުގައި އައްނަސްރާއި އައްތާއީ ބައްދަލު ކުރަން އޮތް މެޗު ފަސްކޮށްފިއެވެ.

މި ދެ ޓީމު ބައްދަލު ކުރަން އޮތް މެޗު ފަސްކޮށްފައި ވަނީ ވިއްސާރަވެ، ކަރަންޓަށް ދިމާވި މައްސަލައަކާ ގުޅިގެންނެވެ. އައްނަސްރުން ކުރި ޓުވީޓެއްގައި ބުނީ، މެޗު 24 ގަޑިއިރަށް ފަސްކޮށްފައިވާ ވާހަކަ އެ ކުލަބަށް އަންގާފައިވާ ކަމަށެވެ. ސަބަބީ ވިއްސާރަވުމުގެ ސަބަބުން، މެޗު ކުޅުމަށް ހަމަޖެހިފައި އޮތް ދަނޑުގެ ކަރަންޓަށް ދިމާވި މައްސަލައަކުން ކަމަށް އެ ކުލަބުން ވަނީ ބުނެފައެވެ.

މެޗު ފަސްކޮށްފައިވާއިރު، މިއީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އެ ކުލަބަށް ބަދަލުވިފަހުން އައްނަސްރުން ކުޅެން އޮތް ފުރަތަމަ މެެޗެވެ. ނަމަވެސް އެ މެޗުގައި ރޮނާލްޑޯއަކަށް ނުކުޅެވޭނެއެވެ. ރޮނާލްޑޯއަށް އެ މެޗުގައި ނުކުޅެވެނީ އޭނާ އެންމެ ފަހުން ކުޅުނު މެންޗެސްޓަރ ޔުނައިޓެޑުގައި ހުރެ ހިންގި އަޚުލާގީ މައްސަލައަކާ ގުޅިގެންނެވެ. މިދިޔަ އަހަރުގެ އޭޕްރީލް މަހުން ޕްރިމިއަރ ލީގުގައި އެވަންޓަން އަތުން ޔުނައިޓެޑު ބަލިވި މެޗަށްފަހު، ރޮނާލްޑޯ ވަނީ ދަނޑުން ފައިބައިގެން ދަމުން ސަޕޯޓަރެއްގެ ފޯނަށް ހަމަލާ ދީފައެވެ. މި މައްސަލަ ބެލުމަށްފަހު ރޮނާލްޑޯ އަށް ވަނީ ފިޔަވަޅު ވެސް އަޅާފައެވެ. އެގޮތުން ދެ މެޗަށް ސަސްޕެންޑު ކުރުމާއެކު، ރޮނާލްޑޯ 50،000 ޕައުންޑުން ޖޫރިމަނާކުުރުމަށް އިނގިރޭސި އެފްއޭއިން ވަނީ ނިންމާފައެވެ. އެ އަދަބު ރޮނާލްޑޯއަށް ދިނީ، ޔުނައިޓެޑާއެކު އޭނާ ހަދާފައިވާ އެއްބަސްވުން އުވާލިފަހުންނެވެ.

މެޗު ފަސްކޮށްފައިވާއިރު، ދިމާވި މައްސަލަ ހައްލުކޮށް އެ މެޗު އަލުން ކުޅޭނީ ހުކުރު ދުވަހު ކަމަށް ސައޫދީގެ މީޑިއާތަކުގައި ވަނީ ރިޕޯޓުކޮށްފައެވެ.