ރާއްޖެއާއި އިންޑިއާގެ ކަރަންޓު ގްރިޑު ގުޅާލުމުގެ ދިރާސާއެއް ހަދާފައި ނުވޭ - މިނިސްޓްރީ
މަސައްކަތް ކުރަނީ ތެލަށް ބަރޯސާވާ މިންވަރު ކުޑަކުރުމަށް ކަމަށް މިނިސްޓްރީ އިން ބުނޭ
ހިޔާ ފްލެޓްތަކަށް ކަރަންޓް ގުޅައިދިނުމުގެ ތެރެއިން
ދިވެހިރާއްޖެއާއި އިންޑިއާގެ ކަރަންޓު ގްރިޑު ގުޅާލުމާބެހޭ ދިރާސާއެއް ހަދާފައިވާ ކަމަށް ބުނެ ބައެއް މީޑިއާތަކުން ޚަބަރު ފެތުރި ނަމަވެސް އެ ފަދަ އެއްވެސް ކަމެއް ހިނގާފައި ނުވާ ކަމަށް މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީން ބުނެފިއެވެ.
އެންވަޔަރަންމަންޓް މިނިސްޓްރީން ބުނީ، ކަރަންޓު އުފައްދާ ބޭނުން ކުރުމާގުޅޭ އައު ޓެކްނޮލޮޖީ އާއި ރަނގަޅު ގޮތުގައި ކަރަންޓު އުފައްދާ ބޭނުންކުރާ ގޮތްތަކާ ބެހޭގޮތުން ޤައުމުތަކުންނާއި، ކުންފުނިތަކުން ހޯދުންތައް ހޯދައި އެކަންކަން ތަންފީޒުކުރުމަށް އަބަދުވެސް އެ މިނިސްޓްރީ އަށް ތަފާތު ހުށަހެޅުންތައް ހުށަހަޅަމުންދާކަމަށެވެ.
އެހެންނަމަވެސް، ރާއްޖެ އާއި އިންޑިއާގެ ކަރަންޓު ގްރިޑު ގުޅާލުމާ ބެހޭ އެއްބަސްވުމެއްގައި ދިވެހިރާއްޖޭގެ ފަރާތުން އަދި މިހާތަނަށް ސޮއިކޮށްފައި ނުވާނެކަމަށެވެ. އެ މިނިސްޓްރީ އިން ވަނީ ރާއްޖެއިން އަބަދުވެސް މަސައްކަތްކުރަމުން ދަނީ ކަރަންޓު އުފައްދާ ފޯރުކޮށްދިނުމުގައި ތެލަށް ބަރޯސާވާ މިންވަރު ކުޑަކުރުމަށާއި ހަކަތައިގެ ރައްކާތެރިކަން އިތުރުކުރުމަށް ކަމަށް ބުނެފައެވެ. އެހެންކަމުން ކުރިއަށް އޮތްތާގައިވެސް ދިވެހިރާއްޖެއިން މަސައްކަތްކުރަމުން ދާނީ އެގޮތުގެ މަތީން ކަމަށް މިނިސްޓްރީ އިން ބުނެއެވެ.
