ހުޅުމާލޭ ލިންކް ރޯޑްގައި ގާއިމުކުރާ ސޯލަރ ޕީވީ ނިޒާމުގެ އަމަލީ މަސައްކަތް ކުރިއަށް އޮތް މާރޗް މަހު ނިމޭނެ ކަމަށް އެންވައިރަމެންޓް މިނިސްޓްރީ އިން ބުނެފިއެވެ.
"ރާއްޖެ އެމްވީ" އަށް މައުލޫމާތު ދެއްވަމުން އެ މިނިސްޓްރީގެ އޮފިޝަލަކު ވިދާޅުވީ އެ މަސައްކަތް ވަރަށް ބާރަށް ކުރިއަށްދާ ކަަމަށެވެ. އެ މަސައްކަތަކީ ސަރުކާރުން އިއާދަކުރުވަނިވި ހަކަތައަށް އިސްކަން ދޭ މިންވަރު ހާމަވާ ކަމެއް ކަމަށް އޭނާ ވިދާޅުވިއެވެ. މިއީ ވޯލްޑް ބޭންކްގެ އެހީގައި މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އިން ހިންގާ އެކްސެލެރޭޓިންގ ސަސްޓެއިންބަލް ޕްރައިވެޓް އިންވެސްޓްމަންޓް އިން ރިނިއުވަބަލް އެނާރޖީ (އެސްޕަޔަރ) ޕްރޮޖެކްޓްގެ ދަށުން ކުރިއަށްގެންދާ މަޝްރޫއެކެވެ. އެންވައިރަމެންޓް މިނިސްޓްރީގެ އޮފިޝަލް ވިދާޅުވީ ސޯލަރ ޕީވީ ނިޒާމާއި އެކު ހަކަތަ އަށް ކުރާ ހޭދަ ވަރަށް ބޮޑުތަނުން ކުޑަ ކުރެވޭނެ ކަމަށެވެ. އަދި ބޭރުން ގެންނަ ތެލަށް ރާއްޖެ ބަރޯސާވާ މިންވަރު ވަރަށް ބޮޑަށް ކުޑަ ކުރެވޭނެ ކަމަށެވެ. އެގޮތުން ދައުލަތުން ކަރަންޓް އުފެއްދުމަށްޓަކައި ތެލަށް ކުރާ ހޭދައިން ގާތްގަނޑަކަށް 15 އާއި 20 މިލިއަން ދިވެހި ރުފިޔާ ކުޑަކުރެވޭނެ ކަމަށް އޭނާ ވިދާޅުވިއެވެ.
ހުޅުމާލެ ލިންކް ރޯޑްގެ އައިލެންޑް އޭރިއާގައި ގާއިމުކޮށްފައި ހުރި ސްޓްރަކްޗަރގައި ޕެނަލްތައް ހަރުކުރުމުގެ މަސައްކަތް ރަސްމީކޮށް ފަށާފައި ވަނީ ނިމިދިޔަ ޑިސެމްބަރު މަހުގެ ކުރީކޮޅެވެ. އެސްޕަޔަރގެ ދެވަނަ ފިޔަފަހީގެ ދަށުން ހުޅުލެ-ހުޅުމާލޭގައި 5 މެގަވޮޓްގެ އިރުގެ އަލިން ހަކަތަ އުފައްދާ ނިޒާމެއް ޤާއިމްކުރަން ހުޅުވާލި ފުރުސަތުގައި 21 ކުންފުންޏަކުން ވަނީ ޝައުގުވެރިކަން ފާޅުކޮށްފައެވެ.
އެ ފަރާތްތަކުގެ ތެރެއިން ފަންނީ އަދި މާލީ ޤާބިލުކަމަށް ބަލައި އަދި އޭގެ އިތުރުން އެންމެ ކުޑަ އަގެއް ހުށަހަޅައި މި މަސައްކަތުގެ ބީލަން ކާމިޔާބު ކުރީ ތައިލެންޑްގެ އެންސިސް ކޯ ލިމިޓެޑުންނެވެ. އެންސިސް ކޯ ލިމިޓެޑުންވަނީ ސޯލަރ ޕީވީ ޖެހުމަށް ލިންކް ރޯޑްގު މެދުގައި އޮންނަ އައިލެންޑް ސަރަހައްދުގެ އިތުރުން އިރުމަތީ ފަރާތު މޫދާވީ ފަޅިގައި ސްޓީލް ސްޓަރކްޗަރ އެއް ގާއިމުކޮށްފައެވެ. މި ސޯލަރ ޕީވީ ނިޒާމުގެ މުއްދަތަކީ 15 އަހަރު ދުވަހެވެ. މިމުއްދަތު ހަމަވުމުން އެނިޒާމުގެ ބެލެނެވެރި ފަރާތަކަށް ވަނީ ކަރަންޓުގެ ޙިދުމަތްދޭ ކުންފުންޏެވެ.
މިއީ ޕްރައިވެޓް ފައިނޭންސިންގެ އުސޫލުން ކޮންޓަރެކްޓަރުގެ އަމިއްލަ ފައިސާއާއި ތަކެތީގައި ސޯލަރ ޕީވީ ނިޒާމު ގާއިމުކޮށް އެ ނިޒާމުން ކަރަންޓް އުފެއްދުމަށްފަހު ޕަވަރ ޕާރޗޭސިންގ އެގްރީމެންޓް (ޕީޕީއޭ) މޮޑެލްގެ ދަށުން ކަރަންޓްގެ ޙިދުމަތް ދޭ ކުންފުންޏަށް ވިއްކާގޮތަށް ހަދާފައިވާ ޕްރޮޖެކްޓެކެވެ.
މި މަޝްރޫޢުގެ ދަށުން އުފައްދާ ކަރަންޓް ސްޓެލްކޯއަށް ވިއްކުމަށް ހަމަޖެހިފައިވަނީ ޔުނިޓަކަށް 10.09 ޔޫއެސް ސެންޓުގެ މަގުންނެވެ. އެއީ ދިވެހި ފައިސާއިން ބަލާ ނަމަ ކަރަންޓް ޔުނިޓަކަށް 1 ރުފިޔާ 68 ލާރިއެވެ. އެސްޕަޔަރ ގެ ފުރަތަމަ ފިޔަވަހީގެ ދަށުން ހުޅުމާލޭގައި 1000 ހައުސިންގް ޔުނިޓްތަކުގައި ޤާއިމްކޮށްފައިވާ 1.5 މެގަވޮޓްގެ ސޯލާ ޕީވީގެ ނިޒާމުން އުފައްދާ ކަރަންޓް ސްޓެލްކޯއަށް ވިއްކަމުން ދަނީ 21 ޔޫއެސް ސެންޓަށެވެ. އެހެންކަމުން 5 މެގަވޮޓް ސޯލާ ޕީވީން އުފައްދާ ކަރަންޓް ސްޓެލްކޯއަށް ގަންނަން ލިބެނީ މީގެ ކުރީން ސޯލަރ ހަކަތައިން އުފައްދާ ކަރަންޓް ޔުނިޓަކަށް ޖެހޭ އަދަދުގެ ދެބައިކުޅަ އެއްބައި އަގުހެޔޮ ރޭޓެއްގައެވެ.
