ޕީޕީއެމްއިން ލާމަރުކަޒީ ނިޒާމް ކޮށާ ކުދިކޮށްލައިފި: ފަލާހް
ކައުންސިލް އިންތިހާބު އޮތީ މެއި 6 ގައި
މާފަންނު ހުޅަނގު ދާއިރާގެ މެމްބަރު މުހައްމަދު ފަލާހް ކެމްޕޭން ޖަލްސާގައި ވާހަކަދައްކަވަނީ
ލާމަރުކަޒީ ނިޒާމަކީ އެމްޑީޕީގެ އުފެއްދުމެއް ކަމަށާއި ޕީޕީއެމުން ލާމަރުކަޒީ ނިޒާމް ކޮށާ، ކުދިކޮށްލައިފައިވާ ކަމަށް މާފަންނު ހުޅަނގު ދާއިރާގެ މެމްބަރު މުހައްމަދު ފަލާހް ވިދާޅުވެއްޖެ އެވެ.
ލޯކަލް ކައުންސިލް އިންތިހާބަށް މާފަންނު ހުޅަނގު ދާއިރާއިން ކުރިމަތިލާފައިވާ ކެންޑިޑޭޓަށް ކެމްޕެއިން ކުރުމަށްޓަކައި ބޭއްވި ބައްދަލުވުމުގައި ވާހަކަދައްކަވަމުން ފަލާޙް ވިދާޅުވީ އެމްޑީޕީއަށް ނޫނީ ލާމަރުކަޒި ނިޒާމުން އިދާރީ ދާއިރާތައް ހިންގޭނެ ކަމަށް ޤަބޫލު ނުކުރައްވާ ކަމަށެވެ. އޭގެ ސަބަބުތަކެއް ދައްކަމުން ފަލާޙް ވިދާޅުވީ ރަށްތައް ތަރައްޤީކުރެވެންއޮތީ، މިސަރުކާރަށް ވޯޓް ދީގެން ކަމަށް ބުނާ ކަމަށާއި އެހެންނަމަވެސް ލާމަރުކަޒީ ނިޒާމަކީ އެމްޑީޕީގެ ނިޒާމެއް ކަމަށެވެ.
މާލެ ސިޓީ ކައުންސިލްގެ އަގުލަބިއްޔަތު މިސަރުކާރަށް ނުލިބުމުން ކައުންސިލް މެމްބަރުންގެ މުސާރަތައް ކޮށާ ކުދިކޮށްލިތަން ފެނިގެންދިޔަ ކަމަށާއި، މާލޭ ސިޓީ ކައުންސިލްގެ އިންތިހާބު މިސަރުކާރަށް ކާމިޔާބުނުކުރެވޭނެ ކަމަށްވެސް ފަލާޙް ވިދާޅުވި އެވެ.
ރާއްޖޭގައި ހިނގި އެންމެ ބޮޑު ކޮރަޕްޝަން ހިނގާފައިވަނީ އެމަނިކުފާނުގެ ވެރިކަމުގައި ކަމަށް ރައީސް ޔާމިން އެއްބަސްވެވަޑައިގެންފައިވާއިރު، އެ ވާހަކަ ނޫސްވެރިން ދައްކަން ފެށުމުން ނޫސްވެރިންގެ މިނިވަންކަން ހިފަހައްޓަން ފެށި ކަމަށެވެ. މިރާއްޖެއަށް ބަދަލު ގެންނަން ޖެހޭ ކަމަށާއި މިބަދަލު ގެނެސްގެން ނޫނީ ރާއްޖެއެއް ނުލިބޭނެ ކަމަށް ފަލާޙް ވިދާޅުވި އެވެ.
